Далайд “гарц”-тай болж, иргэний хөдөлгөөнийхэн Ноён уулаа аврав

-Долоо хоногийн тойм-

Зуны тэргүүн сар эхлээд тэг дундаа орж байна. Өнгөрөгч долоо хоногийн хамгийн их хүлээлт хот хөдөөгүй хур бороо байлаа. Харамсалтай нь тэнгэр хангай хур бороогоор ивлэхдээ нэг л дурамжхан байна. Монгол нутгийн ихэнх хэсэг нь гантай буюу гандуу байна.

ШХАБ-д элсэх эсэх асуудлын эргэн тойронд

Зуны эхэн сарын нар салхитай өдрүүдтэй зэрэгцэн улирч буй долоо хоногт улстөрчид Шанхайн Хамтын ажиллагааны байгууллагад /ШХАБ/ элсэх асуудлаар ухаан уралдуулав. Ерөнхийлөгч А.Баттулгын ШХАБ-д ажиглагчийн статусаа ахисан түвшинд хүргэх тухай мэдээлэл Засгийн газрыг тус байгууллагад элсэх талаархи нууцын зэрэглэлтэй асуудлыг УИХ-д өргөн барихад хүргэв бололтой.

Өнөөдрөөс буюу зургадугаар сарын 9-ний өдрөөс БНХАУ-ын Чиндао хотноо ШХАБ-ын гишүүн орнуудын Төрийн тэргүүн нарын 18 дахь удаагийн өргөтгөсөн хуралдаан эхэлж байна. БНХАУ-ын Дарга Ши Жиньпиний урилгаар энэ уулзалтад Монгол Улсын Ерөнхийлөгч Х.Баттулга оролцож байгаа юм.

ШХАБ-ын дээд түвшний уулзалтын үеэр Монгол Улсын Ерөнхийлөгч, ОХУ-ын Ерөнхийлөгч, БНХАУ-ын Дарга нар гурван талт дээд түвшний ээлжит дөрөвдүгээр уулзалтыг хийнэ гэсэн мэдээлэл байна.

Монгол Улс ШХАБ-д гишүүнээр элсэх асуудал маргаантай байгаа хэдий ч энэ талаархи улс төрийн шийдэл удахгүй гарах нь бараг тодорхой байна. Асуудлыг УИХ-д нэгэнт өргөн барьсан болохоор тун удахгүй энэ тухай хэлэлцэж таарна. Түүнчлэн Үндэсний Аюулгүй байдлын зөвлөл бас авч хэлэлцэнэ. Тус байгууллагад элсэх эсэх асуудлаар судлаачид хангалттай байр сууриа илэрхийлж байгаа болохоор энд бусдын үгийг дахин дамжуулах нь илүүц биз. Хамгийн чухал нь олон нийт асуудалд ач холбогдол өгч тал талаас нь шүүн хэлэлцэж байгаа нь оновчтой шийдвэр гаргахад нөлөөлөх нь дамжиггүй.

УИХ ба намын бүлгүүдийн хурал

-Улирч буй 7 хоногт УИХ-ын дарга М.Энхболд ОХУ-ын Москва хотноо “Парламентаризмын хөгжил” олон улсын чуулга уулзалтад оролцов. ОХУ-ын Холбооны Хурлын Төрийн Думээс санаачлан зохион байгуулсан энэ чуулга уулзалтад дэлхийн 96 орны парламентын төлөөлөгчид оролцов. Тэдгээрээс 19 орны парламентын тэргүүн, 15 улсын парламентын дэд дарга нар хүрэлцэн ирсэн юм.

-УИХ дахь намын бүлгүүд долоо хоног бүрийн даваа гарагт хуралддаг бол энэ  олоо хоногт хоёр удаа хуралдав. Даваа гарагт хуралдсан МАН-ын бүлгийн хурлаар хоёр асуудал хэлэлцэв. Тодруулбал, Төрийн өмчийн хувьчлал болон Арилжааны банкуудыг дахин санхүүжүүлэх хуулийн төслийг хаалттай хэлэлцсэн юм.  

Банкуудыг дахин санхүүжүүлж, банкуудад өөрийнх нь хөрөнгө дутагдах үед яаж эрх зүйн санхүүжилт үзүүлэх вэ гэдгийг тодорхой болгох зорилгоор хуулийн төсөл өргөн барьсныг УИХ хэлэлцэх нь зүйтэй гэж үзсэн билээ. Мэдээллээр эдүгээ арилжааны банкууд 500 тэрбум гаруй төгрөгийн өөрийн хөрөнгийн дутагдалтай байгаа аж.

“Монгол-Оросын санаачилга-2018”

-Энэ долоо хоногт болсон томоохон арга хэмжээ гэвэл “Монгол-Оросын санаачилга-2018” цуврал арга хэмжээ юм. Энэ хүрээнд болсон Эдийн засгийн чуулга уулзалтыг нээж Монгол Улсын Ерөнхийлөгч Х.Баттулга үг хэлcэн юм. “Монгол-Оросын санаачилга-2018”  ажиллагаанд ОХУ-ын Ерөнхийлөгч В.В.Путины бие төлөөлөгч Игорь Евгеньевич Левитин, ОХУ-ын Аж үйлдвэр, худалдааны сайд Денис Валентинович Мантуров тэргүүтэй тус улсын албаны болон бизнесийн  төлөөллүүд оролцов.

Есөн жил хүлээсэн түүхэн гэрээгээ байгууллаа

Долоо хоногийн онцлох үйл явдлын нэг гэвэл Монгол Улсын Зам тээврийн хөгжлийн  сайд Ж.Бат-Эрдэнэ  болон ОХУ-ын Тээврийн сайд Е.И.Дитрих нар Монгол, ОХУ-ын Засгийн газар хоорондын Төмөр замаар дамжин өнгөрөх ачаа тээвэрлэх нөхцөлийн тухай хэлэлцээрт гарын үсэг зурсан явдал байлаа.  Үүнийг түүхэн хэмээн тодотгож байгаа нь учиртай

Учир нь есөн жилийн хугацаанд ярилцсан гэрээндээ гарын үсэг зурж байгаа нь энэ юм. Энэ гэрээ байгуулагдснаар Монголд эдийн засгийн томоохон боломж нээгдэж байна. Тухайлбал,  ОХУ-аар дамжаад Владивостокоор далайд гарах, цаашаа Европ руу гарах гарцтай болох боломж бий болно.  ОХУ-аар дамжин өнгөрөх гол магистрал замууд дээр хамтарч ажиллах, бөгөөд тэр дундаа Оросын талаас манайд тарифын хөнгөлөлт үзүүлэхээр болж байна. 

Тарифын хэлэлцээрийн дагуу олон улсын хэмжээнд нэгдсэн тариф гэж бий. Харин энэ гэрээ ёсоор нэгдсэн тарифаас 40 орчим хувиар хөнгөлөлт үзүүлэхээр болж байна.  Түүнчлэн энэ хөнгөлттэй тарифыг 25 жилийн турш тогтвортой мөрдөхөөр тохиролцжээ.

 

“Сентерра Гоулд Монголия” компанийн зөвшөөрлийг шүүхээс цуцаллаа

 Ноён уул дахь “Сентерра Гоулд Монголия” компанийн лицензтэй холбоотой шүүх хурал 37 удаа хойшилсон билээ. Харин  энэхүү маргааны эцсийн шийдвэр энэ долоо хоногт гарч Сентерра Гоулд ХХК-ийн эзэмшсэн дөрвөн ашиглалтын тусгай зөвшөөрлийг шүүхээс цуцалсан шийдвэр гаргалаа. Ингэснээр ноён уулыг Сентерра Гоулд Монголиа ХХК ухахааргүй болж байна.

2016 оны нэгдүгээр сараас шүүхэд үргэлжилж байгаа энэхүү маргаанд нэхэмжлэгчээр “Ноён уулаа аваръя хөдөлгөөн” ТББ, хариуцагчаар Ашигт малтмал, газрын тосны газрын Кадастрын хэлтэс, гуравдагч этгээдээр “Сентерра Гоулд Монголия” компани, Засгийн газар оролцсон юм.

Үйл явдлын товчоон:

- Монгол Улсын Ерөнхий сайд У.Хүрэлсүх Олон улсын валютын сангийн дэд тэргүүн Мицүхиро Фурусаваг хүлээн авч уулзлаа.

-Урьдчилан хорих төв буюу 461-р ангиас биеийн эрүүл мэндийн шалтгаанаар Улсын нэгдсэн хоёрдугаар эмнэлэгт ирсэн Ерөнхий сайд асан С.Баяр, Ч.Сайханбилэг нарыг  батлан даалтад гаргаж, хилийн хориг тавихаар шүүхээс шийдвэрлэв.

-