Цуврал 6 - Япон улсын соёлоос

Зах зээлд үй олон ном зарагддагаас багагүй хувийг хүүхэд хүмүүжлийн ном эзлэх ажээ. Японы аль ч номын дэлгүүрт энэ чиглэлийн номнууд өргөн дэлгэр байх ба нарийвчилж үзвэл нас насанд нь тохирох хүүхэд хүмүүжлийн ном эгнээтэй. Тэд хүүхэд хүмүүжлийг хоёр үндсэн хэсэгт хуваажээ. Бага насны хүүхэд, түүнээс дээш насны хүүхдүүд гэж. Номнууд ч гэсэн уншигч хэдтэй хүүхэдтэйгээс хамаарч сонголтуудтай. 
Ном бүхэн авууштай мэдээллээр дүүрэн байх боловч хэтэрхий төгстөгөлдөр санагдах нь бий. Эцэг эхийн хэлсэн болгоныг ягштал даган мөрдөх хүүхэд, ямагт ядарч цуцдаггүй эрч хүчтэй ээжүүд номд өгүүлэгдэнэ. 
Нэг гэр бүл өглөөнөөс орой хүртэл зурагт асааж хэвшжээ. Тасралтгүй арван гурван жил хүүхэдтэйгээ зурагт үзэж байгаад нэг л өдөр хүүхэд нь маш их уур бухимдалтай болсныг анзаарч гэнэ. Хүүгээ засах гэж элдэв арга чарга туршиж үзсэн боловч тусыг эс олон, арга буюу хүүхдийн мэргэжлийн сэтгэлзүйчид ханджээ. Сэтгэд зүйч гэрт нь орж өдөр тутамтай нь танилцсанаар зурагтаа унтраахыг зөвлөв. Ийн эцэг эх зурагтыг гэрээсээ хол чуулдаж гэртээ анир чимээгүй, амар амгаланг авчирсан түүхийг уншив. Хүүхэд ч аав ээжтэйгээ чөлөөтэй ярих нь элбэгшин тэдний хүссэн үр дүн ирсэн юм байх. 
Энэ мэтчлэн дийлэнх ном бүхнийг амар хялбар болгон бичдэг. Гэтэл бодит амьдрал дээр тэр зурагтыг авч хаяхын тулд эцэг эхээс ямар их зориг шаардагдсаныг, өнөөдрийг хүртлэх тогтсон хэвшлээсээ салахаар тэсвэр тэвчээр гаргасан хэсгийг дурсахгүй орхидог. 
Бидний ном уншихдаа хийдэг нийтлэг үзэгдэл бол ухамсаргүйгээр өөртөө хэрэгтэй мэдээллээ эрж хайдаг явдал билээ. Өөрөөр хэлбэл нэг ном атал хүмүүст өөр өөр тал, өнцгийг харуулна. Уншигчийн одоогийн байр суурь, нөхцөл байдал, хэрэгцээ юу байна тэр талын мэдээллүүд нүдэнд нь тусч хөврөнө гэсэн үг. Гэхдээ тухайн цагт сонин жигтэй санагдаад өнгөрсөн зүйл хэзээ хойно учрыг нь тайлах тохиолдолд ч бий. 
Номд юу ч гэж өгүүлсэн бай, та түүнийг уншиж түүнээс өөртөө наах санааг олж авч байна гэдэг том ерөөл юм. Тэртээ тэргүй танд хэрэггүй мэдээллүүд цаг хугацааны шидээр мартагдан одно.
Ганц санууштай зүйл гэвээс хичнээн алдартай ном байсан ч одоогийн нөхцөл байдалд тань нийцэхгүй ном өч төчнөөнөөрөө гэдгийг мартаж болохгүй. Мөн танд тохирсон номоо олж авлаа гэж бодож байтал агуулга нь дээрх зурагтын жишээ шиг зарим хэсэг нь далд утга санаатай, өгүүлээгүй орхисон хэсгийг уншмаар санагдах товчлол ихтэй байж болно. 
Та уншигч! Танд барьж тавих, хаах, орхих, сөхөх, унших, тэмдэглэл хөтлөх бүрэн эрх нь байгаа. Хувь хүн хөгжлийн ном, тэр дундаа хүүхэд хүмүүжлийн ном бидэнд санаа сэдэл өгөхөөр бичигдсэнээс биш биднийг тулган шаарддаггүй. Мөрдөж боломгүй эд байвал орхиод мөрдөж болохуйц сайхан санаатай учирвал өөрийн арга барилаасаа нэмж хачирлан өөриймшүүлээрэй.

Ээнээгийн тэмдэглэл 

https://www.facebook.com/chuluudai.eenee?__tn__=%2CdC-R-R&eid=ARDRuhRjgc8G_k_Ew-sRoMVOdZw7WfLYgPvvYiNLk4AtfMtytix0Xwk7h5FkH41oXxWnVtQV0gBracCU&hc_ref=ARTd5wCzGtxNQqRUOqCG4xKmD7dheTZXUxoiKjHaV7wcFFkc1CwE7cCt9qYimvMQi2A&fref=nf