Цуврал 10 - Япон улсын соёлоос

Тэд толгой эргэмээр их магтана. Бүр амны уншлага нь ч байж мэднэ. "Сүгой сүгой, дэкита нэ дикита нэ" гэсэн дуу цэцэрлэгт нь хүргэж өгөхөөс аваад очиж авах хүртэл үргэлж чихэнд хадаастай. Тэгээд л учиргүй алгаа ташина. Хааяа тэдэнд хайр хүрдэг. Нүд нь гялалзаад л хүүхэд шиг баярлан алга ташиж суух нь хайр хүргэхгүй байхын аргагүй. Гэвч энэ хүүхдүүдийг зүгээр нэг магтаад байдаггүй бололтой. Хоёр төрлийн магталттай танилцна уу.

1) Үйлдийг магтах

2) Зүгээр л оршихуйг нь магтах

1)Үйлдлийг магтах.

 Бүхий л амжилттай яваа хүмүүс нэг л өдөр БИ хэмээн оройлон гарч ирдэггүй. Тэд өдөр бүр ёстой л чимх чимхээр үйлдлээ цуглуулан бөөгнүүлж аваад тэсэрдэг. Өөрөөр хэлбэл цуглуулагч билээ. Том хүмүүс ухамсартайгаар үйлдлээ цуглуулж чаддаг нь багадаа аль хэр тэдгээр үйлдлийг магтуулж байсантай холбоотой.

Жижиг гэлтгүй хийсэн зүйлд нь ач холбогдол өгөн магтах хэрэгтэй. Ингэхдээ зүгээр л "Мундаг" гэчихээд өнгөрөлгүй яагаад мундаг гэж хэлэх болсон шалтгаанаа тоочвол сайн. Товч тодорхой байх тусмаа хүүхэд яагаад магтуулаад байгаагаа ойлгоно шүү дээ. "Зургаа удаан төвлөрч суун зурж чадлаа, ёстой мундаг!" гэж.

2) Зүгээр л оршихуйг нь магтах

Эцэг эх хүүхдээ эгдүүтэй, бумбак, байж байгаа нь хайр хүргэмээр "жолиг" шүү гэж магтдаг. Энэ нь сайн. Ингэж байгаагаараа магтуулахдаа хүүхэд хайрыг эцэх эхийнхээ харцнаас, дуу хоолойноос, арьсаар, энергээр мэдэрч байдаг. Японы цэцэрлэгийн багш нар зөвхөн үйлдлийг нь магтдаггүй. Тэд оршихуйг нь бас магтдаг. Ингэхдээ skin ship буюу арьсанд нь хүрэх юм. Миний ажигласнаар толгой дээр нь гараа тавих эс бөгөөс нурууг нь илнэ. Бас их тэвэрдэг. Би анхандаа бүр гайхаж байсан. Хүлээж авахдаа учиргүй тэврээд нэрийг нь чангаар хэлж "өглөөний мэнд", "хамтдаа сайхан тоглоё" гэхчлэн дотночилон хүүхдийг өөртөө дасгаж байв. Хүүхдэд ч гэсэн нэн таатай байгаа нь илт хоёр гараа дэлгэн тэврэлдэнэ. Ээж аав, элгэн саднаас хөндлөнгийн хүн ийм гоё дулаан уур амьсгалыг бий болгоход хэн баярлахгүй байх билээ.

Өдөржин хүүхдээ нээлттэй, баяр хөөр дүүрэн, бас үйлдэл бүрт нь гярхай ажиглалт хийн магтах багшийн дэргэд орхихдоо санаа амар явдаг юм.

(Цэцэрлэгийн багш нараас юугаар дутах вэ, хамтдаа хүүхдүүдээ магтацгаая. Хэрэгтэй гэж бодвол цааш түгээгээрэй)

Ээнээгийн тэмдэглэл