САЙН МЭДЭЭ:Хувийн хэвшлийнхэн хүнд үйлдвэрийн салбар уу хөл тавилаа. Анхных нь гангийн үйлдвэр

Ерөнхий сайд У.Хүрэлсүх өнгөрөгч амралтын өдөр Эрдэнэт хотод ажиллах үеэрээ “Бэрэн” группийн  барьж байгуулж байгаа төмөрлөгийн үйлдвэртэй танилцсан юм.  Энэ бол манай хувийн хэвшлийнхэн хүнд үйлдвэрийн салбарт хүчээ сорьж буй сайхан жишээ байв.  Тус үйлдвэрийг  цогцолбор  байдлаар барьж байгуулж байгаа бөгөөд Архангайгаас хүдрээ олборлож,  баяжуулалт хийгээд Эрдэнэт дэх “Хөх ган” үйлдвэртээ хайлж бүтээгдэхүүн үйлдвэрлэж байна.

Аливаа улс орны хөгжлийн том боломж нь гангийн үйлдвэрлэл юм. Япончууд дайны дараа ард түмнээ өлсөж байхад гангийн үйлдвэрээ түрүүлж барьж байгуулж байсан гэдэг. Тэд ингэж эдийн засгийн мөнхийн хөдөлгүүрээ “асаасан” нь өнөөгийн хөгжлийн гараа байв.

Бидний өнөөдрийн магтан шагшдаг БНСУ бүр 1960-аад онд гангийн үйлдвэр байгуулсан нь хожим автомашин үйлдвэрлэлийн том суурь болсон гэдэг.

Монгол улсын гангийн жилийн хэрэглээ 500 мянга орчим тонн.  Үүнийхээ 400 мянган тонныг импотоор хангадаг. Харин “Бэрэн” группийн энэ үйлдвэр ашиглалтад орсноор эхний удаад жилд 200 мянган тонн ган бүтээгдэхүүн үйлдвэрлэнэ.  Өөрөөр хэлбэл дотоодын нийт гангийн хэрэгцээний 40-50 хувийг хангах юм. Эхний ээлжинд дотоодод нэн хэрэгцээтэй байгаа  арматур үйлдвэрлэнэ. Энэхүү 200 мянган тонн бүтээгдэхүүн буюу арматур 40 мянган айлын орон сууц барихад хүрэлцэнэ.  Энэ хэрээр гадагшаа урсах валютын урсгалыг  эх орондоо үлдээнэ. Ер нь ойрын жилүүдэд Монгол Улсын гангийн үйлдвэрлэл  сая тоннд хүрэх боломжтой аж.

Тус үйлдвэр ирэх 10 дугаар сарын 10-нд нээлтээ хийх бөгөөд 2020 оноос бүрэн хүчин чадлаараа ажиллана.  

Тус үйлдвэр  хүдэр хайлуулах 35 болон 70 шоо метрийн багтаамжтай хоёр домен зуухтай. Хамгийн орчин үеийн техник технологийн шийдэлтэй энэ хоёр зуухаа Уралын нуруунаас Цагаан хэрэм хүртэлх орон зайд байгаа хоёрхон домен зуух хэмээн тодотгоно билээ.

Гангийн үйлдвэрлэлд төмрийн хүдэр, шохой,  кокс гэсэн үндсэн гурван түүхий эд хэрэгтэй. Манай улсын хувьд энэ гурван эрдэсийн  хангалттай нөөцтэй.  Тухайлбал, төмрийн хүдрийн баталгаажсан нөөц  600 сая тонн. Цаашдаа хоёр тэрбум ч байх боломжтой гэх таамаг бий. Монгол оронд төмрийн хүдрийн 17,100 орчим илэрцтэй, нөөцөөрөө дэлхийд 29 дүгээрт жагсдаг.

Тэгэхээр энэ их нөөцийг эдийн засгийн эргэлтэд оруулбал ногоон мөнгөний урсгалыг эх орон руугаа чиглүүлэх бүрэн боломжтой юм.

Жишээ нь,  бид нэг сая тонны хүчин чадалтай гангийн үйлдвэртэй болоход л 10 тэрбум долларын ашигтай ажиллах урьдчилсан тооцоо байдаг аж.  Боломж мөн байгаа биз.

М.Нэргүй