ЖИНХЭНЭ ЖДҮ: Хүүдээ зориулж урласан баривч ЖДҮ эрхлэгч болох замд хөтөлжээ

Жижиг,  дунд үйлдвэрлэл эрхлэгчдийг дэмжих зорилготой "ЖИНХЭНЭ ЖДҮ" булангийнхаа энэ удаагийн зочноор "Нархан" баривчийг үйлдвэрлэгч С.Дөлгөөнзулыг урьж,  сонирхолтой яриа өрнүүллээ.

Уул уурхайн маркшейдер мэргэжилтэй бүсгүй ээж болсноосоо хойш хүүхдийн биед хамгийн тухтай баривч урлахад дурлаж,  "Нархан" баривчийг урлаж эхэлжээ.

Анх нөхрөөсөө авсан 100, цалинтай ээжийн 50,  нийт 150 мянган төгрөгөөр 10 метр даавуу авч эхлүүлж байсан түүний бизнес өнөөдөр хэрэглэгч, үйлчлүүлэгчдээ татсан үйлдвэр болтлоо өргөжсөн байна.

Тодруулбал, ганцхан жилийн дотор өөрийн гэсэн үйлдвэртэй болж, гурван хүнийг ажлын байраар ханган ажиллаж байгаа юм байна. 

-Анх яагаад хүүхдийн баривч урлаж эхэлсэн бэ?

-Хүүгээ төрсний дараа ээжээрээ заалгаад,  баривч оёж байсан. Тэр баривчныхаа зургийг ээжүүдийн группэд "хүүдээ зориулж урлалаа" гэх тайлбартай оруулаад,  маш олон захиалга авсан. Эхэндээ зөвхөн ээжүүдийн группээс захиалга авдаг байсан бол сүүлдээ өөрийн гэсэн пэйж хуудастай болоод өөр олон ээжүүдийн захиалгаар хүүхдэд нь зориулж баривч урлаж өгсөн. 

-"Нархан" баривчний бусдаас ялгарах хамгийн том давуу тал нь юу вэ?

-Хүүхдийн биед харшил өгөхгүй хөвөн даавуун материалыг Солонгосоос захиалж авдаг. Мөн манай даавуунууд будаг гарч, бөөсрөхгүй, шинжилгээнд орсон гэдгээрээ онцлогтой. 

-Өдөрт хэчнээн баривч урлаж байна вэ?

-Анх сурч байхдаа өдөрт 2-3 баривч гаргадаг байсан бол сүүлдээ 10 гаруй баривч, өмдний хослол гаргадаг болсон. Үүнийг дагаад захиалга маань ч өссөн. Тиймээс нэмж оёдолчид авсан. Одоо манай үйлдвэр өдөрт 50-60 баривч, өмдний хослол гаргадаг. Номингийн салбаруудаар болон пэйж хуудсаараа дамжуулан баривчаа худалдаалж байгаа.

-Пэйж хуудсаар холбогдоод захиалга өгвөл хүргэлттэй юу?

-Хүргэлттэй. Бид хот дотроо үнэгүй хүргэдэг. Хөдөө орон нутаг руу бас явуулдаг.

-Авахыг хүссэн ээжүүд яаж захиалах вэ?

-"Нархан" баривч пэйж хуудсанд хандаж болно. Мөн 91882696 гэсэн утсаар захиалга өгөөд гэртээ хүргүүлээд авах боломжтой.