2020 оны Европын аварга шалгаруулах хөлбөмбөгийн тэмцээний урьдчилсан шатны тэмцээн дууслаа. Ингэснээр "Евро-2020"-д оролцох эрхээ шууд авч буй 20 багийн нэр тодорхой болж байна. Үндсэндээ ихэнх хэсгээс нэг, хоёроор гарах багийн нэр тодорхой болсон. Тэгвэл өнгөрсөн шөнө Е хэсгээс хоёроор гарч, Европын аваргад оролцох эрхээ авсан улсын нэр тодорлоо.
Тодруулбал, Уэльс улсын шигшээ баг 10 дугаар тойрогт талбайдаа Унгарыг хүлээж авч, тулсан. Хоёр багийн аль хожсон нь Европын аваргын эрхээ авах боломжтой болох байсан юм. Тэгвэл Уэльс талбайдаа илүү байж, өрсөлдөгчөө 2:0-ээр буулгаж авлаа. Ингэснээр 14 оноотой болж, Хорватын араас хоёроор гарснаар Европын аварга шалгаруулах тэмцээнд оролцох эрхтэй боллоо. Тоглолтын 15, 47 дахь минутад "Ювентус"-ын хагас хамгаалагч Рамси хоёр гоол оруулж, шигшээ багаа Европын аваргад оролцох замыг нь заслаа.
Нөгөө талд Уэльс болон Унгарыг тэнцээсэй хэмээн залбирч байсан Словак өөрсдийнхөө даалгаврыг амжилттай гүйцэтгэж, Азербайжаныг 2:0-ээр буулгаж авсан. Гэвч тэдний хүслээр нөгөө хоёр баг нь тэнцсэнгүй. Тиймээс хэсгээс хоёроор гарах боломжгүй боллоо. Тоглолтын 19 дэх минутад Боженик, 86 дахь минутад Гамшик нар нэг нэг гоол оруулжээ.
Сэтгэгдэл бичих