Монголын сэтгүүлчдийн нэгдсэн эвлэл “Ган үзэг-2019” цэнгүүнээ зохион байгуулж, оны шилдгүүдээ тодрууллаа.
Сэтгүүлзүйн салбарын оны шилдгүүдийг тодруулан алдаршуулдаг энэ наадмаас “Талын түрлэг” ТББ-ын гишүүн, “Зууны мэдээ” сонины тоймч Ч.Үл-Олдох ӨДӨР ТУТМЫН СОНИНЫ ШИЛДЭГ СЭТГҮҮЛЧээр, УЗ-ийн гишүүн, “Сүхбаатарын өнгө” сонины эрхлэгч Д.Улаанхүүхэн ОРОН НУТГИЙН СОНИН, СЭТГҮҮЛИЙН ШИЛДЭГ СЭТГҮҮЛЧээр тодорлоо.
Түүнчлэн “Талын түрлэг” ТББ-аас эрхлэн гаргасан “Монголын шилдэг нийтлэл” 99 дүгээр боть МСНЭ-ийн харилцагч байгууллагын шагнал хүртлээ. Уг бүтээлд СГЗ О.Дашбалбар агсан, Г.Мэнд-Ооёо, Ай.Төмөр-Очир, Н.Лутбаяр, Ц.Дашдондов нарын нэрт уран бүтээлчдээс гадна хэвлэл мэдээллийн байгууллагад ажиллаж байгаа энэ үеийн сэтгүүлчид, оюутны ширээнээс дөнгөж ажлын талбарт гарсан шинэхэн сурвалжлагчдын бүтээл ч орсон юм.
“Монголын шилдэг нийтлэл”-ийн 99 дүгээр ботийн ерөнхий редактор, сэтгүүлч, "Талын түрлэг" ТББ-ын УЗ-ийн гишүүн Ж.Цэсэн МСНЭ-ийн харилцагч байгууллагын шагналыг бидний эмхэтгэн хэвлүүлсэн бүтээлд олгож байгаа нь мэргэжлийн сэтгүүлзүйн бүтээлийг үнэлсэн явдал гэж бодож байна. Бид үе үеийн мэргэжлийн сэтгүүлчдийнхээ сор болсон бүтээлүүдийг энэ номдоо баринтаглаж, өнгөрсөн гуравдугаар сард нээлтээ хийсэн юм. Манай хамт оны энэ оны ажлыг үнэлсэн том шагнал байлаа. Өнөөдөр Сүхбаатарын сэтгүүлчдийн, Талын түрлэгийнхний өдөр байлаа" гэлээ.
МСНЭ-ийн харилцагч байгууллагын энэ оны шагналыг “Tomo building” ХХК-ийн гүйцэтгэх захирал М.Отгонбаяр гардуулж, мэргэжлийн сэтгүүлзүйг хөгжүүлэх үйлсийг дэмжиж байгаагаа илэрхийллээ.
Сэтгэгдэл бичих