"Ливерпүүл"-ийн аманд "Атлетико" очиж, "Манчестер Сити" Зиданы "Реал"-тай учраа таарлаа

Европын Хөлбөмбөгийн холбооны хамгийн нэр хүндтэй тэмцээн болох Аваргуудын лигийн шөвгийн 16-гийн сугалаа сугалах ёслолын ажиллагаа дөнгөж сая Швейцарийн Нёон хотноо боллоо. Шөвгийн 16-д Английн "Ливерпүүл", "Тоттенхэм", "Манчестер Сити", "Челси", Испанийн "Реал Мадрид, "Барселона", "Атлетико Мадрид", "Валенсия" гэсэн тус бүр дөрвөн баг үлдсэн. 

Тэгвэл Германаас "Байерн Мюнхэн", "Боруссия Дортмунд", "Лейпциг", Италиас "Ювентус", "Наполи", "Аталанта" гэсэн тус бүр гурван баг. Францаас "ПСЖ", "Лион" үлдсэн билээ. Хэсгээс нэгээр гарсан 8 баг хоёроор гарсан багтай учраа таарч тоглох ёстой байсан. Гэхдээ нэг хэсэгт байсан бол нутаг нэгт багууд шөвгийн 16-д таарахгүй дүрэмтэй. 

Сугалаа эхнээсээ л хатуу таарч, шөвгийн 16-д жинхэнэ гал гарсан тулаанууд болохоор боллоо. Германы шилдэг "Боруссия Дортмунд" Францын аварга "ПСЖ"-тэй таарлаа. Тэгвэл Английн шилдэг багууд болох "Манчестер Сити", "Ливерпүүл" клубүүд Испанийн "Реал Мадрид", "Атлетико Мадрид" гэсэн Мадрид хотын хоёр багтай таарлаа. "Сити" энэ улиралд Аваргуудын лигт түрүүлэх чин зорилготой. Тэр хүслээ биелүүлнэ гэвэл "Реал Мадрид"-ыг эрт хасах хэрэгтэй болох нь. Аваргыг хамгаалагч "Ливерпүүл"-ийн хувьд "Атлетико Мадрид" зөөлөн "боорцог" байхгүй нь лавтай. 

Английн нөгөө төлөөлөл "Челси" Германы алдарт "Байерн Мюнхэн"-ий аманд очив. Харин "Тоттенхэм" мөн л Германы төлөөлөл болсон "Лейпциг"-тэй сугалаа таарлаа. Хоёр багийн хувьд аль алинд нь боломж бий.  Энэ жил анх удаагаа Аваргуудын лигт оролцож, хэсгээсээ гарч шуугиан тарьсан Италийн "Аталанта" Испанийн "Валенсия"-тай  учраа таарав. Аль аль багт нь байж болох хамгийн сул өрсөлдөгч. Тэгвэл Роналдо тэргүүтэй "Ювентус" Францын "Лион"-тай таарлаа.  Шөвгийн 8-д шалгарах боломж мэдээж Турины багт илүү байх нь ойлгомжтой.  Тэгвэл "Наполи" клуб эцсийн дүнд хамгийн хүсэхээргүй өрсөлдөгч болох Испанийн "Барселона"-тай "туналаа" 

Шөвгийн 16-гийн эхний тоглолтууд ирэх оны хоёрдугаар сарын 18, 19, 25, 26-ны өдөр болно. Харин хариу тоглолт гуравдугаар сарын 10, 11, 17, 18-ны өдрүүдэд болох билээ.