Шинэ жилийн баяр болгон гайхалтай дурсамжийг үлдээдэг. Хүүхэд байхад шинэ жилээр өвлийн өвгөн ааваас бэлэг авах, шилдэг сурагч болох тун ч гоё. Аравдугаар анги төгсөх жилээ найз охинтойгоо хамт шилдэг сурагч болоод, бэлэг авсан минь санаанаас огт гардаггүй. Ангийнхандаа гайхуулаад л. Оюутан байхад ч шинэ жилийг янз бүрээр л тэмдэглэж, хуучин оноо үдэж, шинэ оноо угтаж явлаа. Олон сайхан дурсамж үлдсэн.
Тэр дундаас хамгийн сайхан, сэтгэл дүүрэн тэмдэглэсэн шинэ жил өнгөрсөн жилийнх. 2018 оноо үдэж, 2019 оноо угтах шинэ жилийг хамгийн ихээр сэтгэл догдолж, баярлаж тэмдэглэсэн юм. Учир нь би өөртөө тавьсан том зорилгуудынхаа нэгд хүрсэн.
Оюутан нас, хүсэл мөрөөдөл дүүрэн, сэтгэл зүрх гэнэхэн. Хайртай хүнтэйгээ л хамтдаа байвал хаана ч амьдарч болмоор бодогдоод л. Сургуулиа ч төгсөөгүй байж хүүхэдтэй болчихоод айх, гайхах зэрэгцэж явлаа. Мэдээж асуудал ар араасаа ундарна. Загнах боломжтой хүн бүхэн л бухимдлынхаа зүү болгоныг бидэн рүү цацна. Хэзээ ч мартагдахааргүй олон хатуу үгийг сэтгэл зүрхээрээ сонсч явсан тэр өдрүүдэд би өөртөө нэг том амлалт өгч байсан юм.
Тэр нь "30 нас хүрээд би орон байртай, унах унаатай болсон байна" гэдэг амлалт. Зарим хүний хувьд энэ инээдтэй ч байж мэдэх л амлалт. Аав, ээж нь байр, машин аваад өгчихдөг залуучуудад бүр ч элгийн санагдах байх. Харин хүсэл мөрөөдлөөс өөр дэмжлэггүй надад их л том амлалт юм шүү. Энэ амлалтаа зөвхөн өөртөө өгөөд байсан юм биш. Эргэн тойрныхон, эхнэртээ, найзууддаа амласан. Өдөр болгон "Би 30 нас хүрээд байртай болно" гэж хэлж, түүнийхээ төлөө зүтгэж явлаа.
Зорилгодоо яг 29 настайдаа хүрсэн. Харин барилгын компанийг 3 жил гаруй хүлээж байж 2018 оны намар байрандаа орсон юм. 2009 оноос хойш 2017 он хүртэл 8 жил хөлс хүчээрээ барьж босгосон таван ханатай гэртээ шинэ жилээ угтаж, үдэж, сэтгэл тэнэгэр сайхан амьдарсан. Хоёр жилд нь байр хөлсөлж явлаа. Харин зорилгодоо хүрээд, өөрийн гэсэн байрандаа ороод, шинэ жил тэмдэглэх үнэхээр гайхалтай байсан.
Тэр шинэ жилээр би өөртөө "Би чадлаа. 30 наснаас ганц хоёр жил өнгөрсөн ч гэсэн би зорилгодоо хүрч, байрандаа шинэ жилээ тэмдэглэж байна. Одоо шинэ зорилго тавьж, түүнийхээ төлөө зүтгэнэ дээ" хэмээн хэлж байсан юм. Шинэ жил болгон сайхан. Харин эр хүн зорилгодоо хүрчихээд, түүнийгээ давхар тэмдэглэж байгаа шинэ жил бүр ч сайхан. Гэртээ тэмдэглэсэн шинэ жил минь.
1 сэтгэгдэлСэтгэгдэл бичих
saihan baina byh zaluus maani ingeed yavj baigaa baih saihan shyy oorsdiin hodolmoroor amdraliin zovlon jargaliig tuulj olson amdral, ezeg ehees um harahgui amdarch surval ter chin tom amjilt shyy, az jargal hysie