Таарсан биш хайрласан хоёр

"Та нар бод доо, бид саяхан л хоёр өрөө байр хайгаад явж байсан. Гэтэл өнөөдөр хоёр давхар хаусанд орох гээд явж байна шүү дээ". Эхнэр, хоёр хүүхдийнхээ өмнө үүрэг, хариуцлага хүлээсэн эр хүнд зорьсон зорилгодоо хүрэхэд ойрхон болоод, хэчнээн баяртай байдгийг зөвхөн эрчүүд л мэдэх байх. Яг тийм амьдралын төлөө, орон байртай болохын төлөө тэмцэж яваа аав Онон /М.Баярмагнай/. Эр нөхрөөрөө бахархах эхнэр Солонго /Э.Урангоо/. Хоёр давхар хаусанд амьдрахаар болж буйдаа баярлах охидууд.  Энэ бол "Таарсан хоёр" уран сайхны киноны жаргалтай эхлэл.  

Гэр бүлээ тэжээхийн тулд гадаадад жорлон угааж, гахай хээлтүүлгийн ажил хийж байсан Онон зовж зүдэрч байж цуглуулсан хэдэн төгрөг, дотор нь амьдардаг бүхээгтэй машинаа нийлүүлж, урьдчилгаа маягаар өгөөд, хаус авдаг.  Байрны зар харж яваад Цэцэнбаатар /Б.Баттөмөр/-тай тааралдана. Ингэж л "Таарсан хоёр" таардаг юм.   Эхнэр хүүхдийнхээ төлөө, хайрласан бүхнийхээ сайн сайхны тулд ажил гололгүй хийж, зүтгэсэн Ононгийн хажууд Цэцэнбаатар шатрын хөлгийн хар нүд л гэсэн үг. 

"Ах нь чамд ажлын санал тавих уу. Бид гоо сайхны эмнэлэгтэй юм. Чи нүдэндээ давхраа хийлгэчихвэл гайхалтай бүсгүй байна.  Харин чи дээд зовхиноосоо 40 грамм мах авахуулчих. Тэгвэл хорвоо мэлсхийгээд ирнэ. Утас чинь хэд юм". Хаа газар л хүмүүсийг хэл амаараа онхолдуулдаг зальт этгээдүүд байдаг даа. Тийм хүнтэй тааралдаж, далаараа цэвэр савуулсан нэгэн л мэдэх байх.   Хэнийг ч хамаагүй зажилахгүй, хайрлахгүй залгихад бэлэн хаустай, Америк явах гэж байгаа Баатар.  Үгээр онхолдуулагч Цэцэн.  Дээр дурьдсан хэсэг бол "Таарсан хоёр" уран сайхны киноны хөгжилтэй бас түгшүүртэй өрнөл. 

Гэхдээ тэр ч байсан хайрласан хайрынхаа төлөө юу ч хийхэд бэлэн яваа нэгэн.  Ахиунхан мөнгө олох л түүний зорилго. Тэгээд л амьдарч байсан хаусаа зардаг.  "Таарсан хоёр" ингэж тааралдсан.  Хайрласан нэгнийхээ төлөө тэмцэж яваа, гэхдээ буруу талаас нь.  Цэцэнбаатарын хажууд Онон шатрын хөлгийн цагаан нүд л гэсэн үг. 

Гэвч  шатрыг хар, цагаан хосолсон хөлөг дээр тоглодог. Хорвоо ч гэсэн хар, цагаан хоёрын сүлэлдээн. Хайрынхаа, хайрласан нэгнийхээ төлөө хүмүүс юу ч хийхээс буцдаггүй.  Тэр нь хар эсвэл цагаан байх нь хамаагүй. Шаардлагатай үед хар талаар ч шатар тоглох үе бий. Гол нь зөв үйлдлийн төлөө буруу замаар явж буйгаа мэдэх. Мэдсэнийхээ дараа зөв зүйлд зөв замаар хүрэхийг хичээх л амьдралын хамгийн гоё өөрчлөлт. Эсвэл киноны хамгийн гоё төгсгөл. "Таарсан хоёр" хоёулаа л хайрласан бүхнийхээ төлөө тэмцсэн.   Харын талын "ноён"-ы сэтгэлд ч хайрын гэгээ татаж л байдаг. Түүнийг нь цагааны "ноён" сэдрээж өгсөн. Сэдрээх ч гэж дээ, хүчээр цагаан талаа нуусан хүнд хар муухайг хаях чадалтай байдаг.   Миний бодлоор тэд "Таарсан хоёр" биш хайрласан л хоёр.  Хайрласан хүмүүс үргэлж л сайн талынх байдагсан. 

 Эцэст нь, жаахан нэмэлт мэдээлэл оруулчихъя. "Хайрласан хоёр" энэ сарын 1-ий өдөр нээлтээ хийсэн.  "Гурван сая инээд"-ийн шүүгчдийн хослол хар, цагааны хослолыг хэрхэн харуулж чадсаныг үзэхийг хүсвэл кино театруудыг зориорой.