Х.Бат-Ялалт: Би 2020 оны сонгуульд нэрээ дэвшүүлэхгүй

Хуульч Х.Бат-Ялалт энэ жилийн сонгуульд нэр дэвшихгүй гэдгээ өөрийн фэйсбүүк хуудсаараа дамжуулан мэдэгдсэн байна. Түүний мэдэгдлийг бүрэн эхээр нь хүргэж байна.

За миний бие 2020 оны Улсын Их хурлын сонгуульд нэрээ дэвшүүлэхгүй гэдгээ албан ёсоор зарлаж байна. Харин 2020 оны УИХ-ын сонгуулийг шударгаар зохион байгуулахын төлөө бүхнээ зориулнаа. Учир нь:

1. 2020 оны сонгууль шударга сонгууль болохгүй. Мөнгөний сонгууль болно. Сонгогчид улс төрийн мэдлэг боловсрол дутмаг учраас УИХ гэдэг байгууллага ямар чухал болох, хэн өөрийг нь чин үнэнчээр төлөөлж чадах эсэх тухай юу ч бодохгүйгээр хэн илүү худлаа ярьсан, шоудсан, мөнгө тараасан этгээдийг сонгож байгаа учраас энэхүү шударга бус өрсөлдөөнд ялах ямар ч боломжгүй гэж үзэж байна.

2. Надад албан тушаал, эд хөрөнгөний шунал байхгүй. Би зүгээр л тайван амьдармаар байна.
Миний бие эрүүгийн эрх зүйч буюу гэмт хэрэг судалдаг хүн. Тиймээс ч өнгөрсөн хугацаанд өөрийнхөө чин сэтгэлээр хууль, шүүхийн байгууллага, тэдгээрийн албан тушаалтнуудын хууль бус үйлдэл, эс үйлдлийг тэвчилгүй тэдний буруутай үйл ажиллагаанаас болж хохирсон олон арван иргэдэд өөрийнхөө чадлын хэмжээнд тусалж, дээрээс нь нийгэмд нүүрлээд буй авилга, хээл хахууль, албан тушаалын гэмт хэргийн хор уршиг, нийгэмд үзүүлэх сөрөг нөлөөллийг илрүүлэх, таслан зогсоох, урьдчилан сэргийлэхээр ажилласан юм. Миний хүсэл бол гэмт хэрэг зөрчил үйлдэгддэггүй, нэгнээ хайрлан хүндэлдэг нийгмийг байгуулах, хүн бүхэн ялангуяа төрийн албан хаагчид, төрийн удиардлагууд амин хувийн эрх ашгаас эх орон, ард түмнийхээ эрх ашгийг илүүд үзэж өргөсөн тангарагтаа үнэнч байхыг л хүссэн төдий.

3. Би амьдралынхаа 15 жилийг шударга нийгмийг байгуулахын төлөө зориулсан. Шударга бустай тэмцсэн. Оюуны бүтээл туурвисан. Олон эх орончдыг үйлдвэрлэсэн. Нийгмийг соён гэгээрүүлэх ажлуудыг хийсэн. Одоо нэгэнт нийтээрээ шүүх, хууль хяналтын байгууллагын үйл ажиллагааны алдаа завхралаас болж нийгэм эмх цэгцгүй болсныг ухаарсан учраас миний бие цаашдаа нийгмийг соён гэгээрүүлэх үйл хэрэгт хүчээ өгөхөөр шийдсэн болно.

Эцэст нь хэлэхэд одоо бүгдээрээ зөвхөн сонгууль бодож, зөвхөн сонгуулийн өдрийн тухай, хэн ялах тухай ярьдаг өчүүхэн байхаа больцгооё. Хэн ялах нь чухал бус ялагч ажлаа хийж байгаа эсэхэд нь хяналт тавьж хариуцлага тооцдог тогтолцоо л хэрэгтэй. ЖДҮ нэртэй гэмт хэрэг үйлдчихээд гүлдийгээд суудаг Гишүүнцэр бидэнд хэрэггүй. Мөнгөөр албан тушаал, гавъяа шагнал худалдаж өөрийгөө бас өрөөлийг хуураад суудаг өрөвдөлтэй төрийн түшээд бидэнд хэрэггүй. Тендер сонгон шалгаруулалтанд чадваргүй компани тэнцүүлчихээд дундаас нь авилга хүртэж оймсондоо нуудаг төрийн түшээд бидэнд хэрэггүй. Шударга дүр эсгэчихээд бузрын дээдийг үйлддэг Нямдорж шиг, Оюун-Эрдэнэ шиг, Батзандан шиг, Хүрэлсүх шиг, Баттулга шиг, Элбэдорж шиг, Бат-үүл шиг, Алтанхуяг шиг, Энхболд шиг, өнгөрсөн ухаанд төр удирдсан бүхэн шиг дарга нар бидэнд огт хэрэггүй.

Ард түмнээ ухаарсан цагт, ард түмнээ хүссэн цагт миний бие Монгол улсынхаа төлөө зүтгэхэд хэзээд бэлэн. Зүтгэсээр ч байгаа.

УИХ-д нэрээ дэвшүүлнэ гэхээр хулгайч гэж төсөөлдөг, УИХ-д нэрээ дэвшүүлнэ гэхээр урвагч мэтээр айдаг нөхдүүдэд хэлэхэд та бүхний тэр айдаг хулгайч, урвагч нар чинь одоо МАН, АН гэдэг 2 намд хуваагдчихаад та бүхнийг маллан удаа дараа сонгогдоод сууцгааж байна. 2020 онд сонгуулийн хувьсгал хийх ёстой.
Би та бүхнийг сонгуулийн хувьсгалд уриалж байна.
Эх орноо аврахыг уриалж байна. Монголын хүнийй төлөө намд нэгдэж байгуулсан төрөө хянадаг ард түмэн болохыг уриалж байна. Хариуцлага алдсан хэн боловч хууль шүүхийн өмнө эрх тэгш зогсдог байхын төлөө нэгдэхийг уриалж байна.

Нам бол нэгдэл юм. Харин намыг буруу хөгжүүлэхээр МАФИ болдог юм.

Монголын хүний төлөө намын дарга Х.Бат-Ялалт