Д.Баттөмөр: Монголчуудыг байлдан дагуулсан Ким Ду Ханы дүрийг бүтээсэн Ан Жэмутай хамтарч  кинонд тоглолоо  

Сүүлийн үед “3 сая инээд” нэвтрүүлгийн шүүгчээр ажиллаж, “Монголд нэг удаа” хошин хөтөлбөрт тоглохын хажуугаар “Таарсан хоёр” уран сайхны кино бүтээсэн  жүжигчин Д.Баттөмөртэй ярилцлаа.

-Хамгийн сүүлийн үеийн уран бүтээл гэвэл “Таарсан хоёр” кино. Киноныхоо тухай ярьвал?

-Танай сайтыг уншиж байгаа бүх уншигчиддаа энэ өдрийн мэнд хүргэе.  “Таарсан хоёр” уран сайхны киног энэ сарын 1-ээс үзэгчдийн хүртээл болголоо. Киног маань үзэгчид маш сайхан хүлээж авч байгаа. Киноны фэйсбүүк хуудсанд үзэгчид сэтгэгдлээ үлдээж, урам өгч байна. Залуу.ком сайтын уншигчид маань ч гэсэн сэтгэгдэл хэсэгт киноны талаар бодол, сэтгэлээ хуваалцаарай. Манай киноны фэйсбүүк хуудаснаас мэдээлэл авч болно. Шинэ уран бүтээлээ үзэгчдэд хүргэчихээд, магтаал, шүүмжлэлийг нь сонсч, уншиж суух сайхан байдаг. Олон сар бодож, сэтгэж, хөдөлмөрлөж, хөлсөө дуслуулж, эмэгтэй хүнтэй зүйрлэвэл хүүхэд төрүүлэх шахам болж байж нэг уран бүтээлийн ард гардаг. Тэр дундаа кино гэдэг маш их хөдөлмөр шаарддаг. Одоо уран бүтээлийнхээ идэвхжүүлэлтийг хийгээд л байж байна даа.

-Энэ кинонд Гавьяат жүжигчин М.Баярмагнайтай хоршиж тоглосон. Өмнө нь хамтдаа кинонд голлох дүрд тоглож байгаагүй санагдана?

-Сүүлийн үед бид хоёр чинь их хамтарч ажиллаж байгаа. Уран бүтээл хамтарч хийх боломж их гарч байна аа. “3 сая инээд” шоунд хамтдаа шүүгчээр суусан. “Монголд нэг удаа” хошин хөтөлбөрт хамтарч тоглосон. Наадам, шинэ жилээр хоёр ч удаагийн хөтөлбөрт хамтраад ажиллачихлаа. Сая “Таарсан хоёр” киноны гол дүрүүдэд хамт тоглосон. Өмнө нь хамт кинонд тоглож байгаагүй. М.Баярмагнай гавьяат чинь надаас хоёр жилийн өмнө төгссөн ах. Найз ахтайгаа хамт тоглосон кино маань үзэгчдэд хүрээд, хүмүүст их таалагдаж байгаа. Энэ киноны зохиолыг уншаад л надад таалагдсан. Нийгэмд болж байгаа залилан, орон байрны хулгай, дээрмийн талаар энэ кинонд хөндөж харуулсан. Одоо “Ятгах тусам нягтал” аянг хэрэгжүүлж байна. Яг энэ үед бид залилан, хууран мэхлэлтийн тухай харуулсан киногоо үзэгчдэд хүргэж эхэллээ. Инээдмийн өнгө аясаар залилан хийдэг этгээдийн тухай харуулсан кино. Зохиолыг илүү чамбай болгохын тулд найруулагч, продюссерын багтай хамт сар гаруй хамтарч ажилласан. Амьдралд их ойрхон сэдэв болохоор амьтай кино болсон гэж би дүгнэж байгаа.

-Өмнө нь та их гарын залилагчийн дүрд тоглож байгаагүй санагдана. Энэ дүрийг илэрхийлж гаргахад ямархуу байв?

-Өмнө нь “Рашаантын 18” кинонд халаас ухдаг жижиг гарын хулгайчийн дүрд тоглож байсан. Тэр кино маань ч гэсэн монголчуудын үзэх дуртай сайхан уран бүтээл болсон. Энэ удаад их гарын залилагчийн дүрд тоглолоо. Өмнө нь би хүн залилдаг, суусан газраасаа шороо атгадаг нөхрийн дүрд тоглох юмсан гэж бодож байсан. Тэр хүсэл маань биелсэн нь энэ. Надад эерэг талын дүрд тоглох санал тавьсан. Би эсрэг талын дүрд нь тогломоор байна гэсээр байгаад л тоглосон.

-Сонирхолтой байна, өөрийгөө эвдэх гэсэн эрэлхийлэл үү?

-Эсрэг дүрд тоглож үзэх л хэрэгтэй. Батаа чинь нөгөө л гэнэн цагаан, итгэмтгий, бүтэлгүй залуугийн дүрд тоглож гэж үзэгчид харна биз дээ. Тийм болохоор эсрэг талын, муу залуугийн дүрд тоглохыг хүссэн. Сонголт ч буруу байгаагүй. Ийм дүрд тоглох сонирхолтой байсан. Үзэгчдэд ч нэлээд хүрч, таалагдаж байгаа юм шиг байна билээ. Хүүхдүүдийн амралт дуусахаар хөдөө орон нутгаар явж, киногоо гаргахаар төлөвлөөд, аймгуудаа хуваарилаад л сууж байна даа.

-Гэмт муу зүйлийг хийдэг хүн бусдыг өрөвдөж, хайрлах сэтгэлгүй л байж таарна. Хүнийг өрөвдөх сэтгэлгүй залилагчийн дотоод мөн чанарыг илэрхийлэхийг л зорьсон байх. Ямар мэдрэмж төрж байв?

-Манай киноны гол дүрд тоглосон М.Баярмагнай маань  залилангийн хохирогч болсон. Кино зураг авах  үеэр “Миний амьдралд тохиолдсон, мэддэг сэдэв” гээд л тоглоод байсан. Энэ киноны санааг гаргасан продюссер маань ч гэсэн залилангийн хэргийн хохирогч болж байсан юм. Тэгээд энэ сэдвээр кино хийж, үзэгчдэд санаа сэдэл өгч буй хэрэг. Хүнд юмаа алдана гэдэг ямар л олиг байх вэ дээ. Хүний голыг харлуулсан хүмүүсийн амьдрал яаж өнгөтэй өөдтэй явах юм. Хэзээ нэгэн цагт далийж, мурийж л таараа. Үйлийн үр гэж байдаг бол түүнийгээ эдэлж л таарна. Үйлийн үр гэж юу байдаг вэ гэдгийг энэ кинонд бид харуулж өгсөн. Хүнд итгэмтгий, сайхан сэтгэлтэй залууг завсар зайгүй залилж, сэтгэл санаа, гэр бүл, амьдралаар нь тоглож байгаа хүний л дүрд тоглосон. Манай киноны текст байдаг юм. “Чиний бүх юм чинь худлаа. Газар гишгэж байгаа чинь л үнэн” гэж. Тийм л айхтар луйварчны дүрийг чадан ядан гаргалаа. Бас л сонин мэдрэмж төрдөг юм билээ.

-“Таарсан хоёр” кинонд охин чинь бас тоглосон. Охинтойгоо хамт кинонд тоглох ямар байв?

-Манай охин “Том 6 толгой” гэдэг кинонд тоглосон. Түүнээс гадна, олон зар сурталчилгаанд тоглож байлаа. Бүр багаасаа живх, тарагны рекламанд тоглож байсан. Манай хоёр охин багаасаа л аавтайгаа хамт сурталчилгаанд тоглодог байсан болохоор одоо туршлагажаад байх шиг байна. Өөрсдөө ч кинонд тоглох дуртай. “Таарсан хоёр” кинонд охин маань тоглоход битүүхэндээ айж л байлаа. Гэтэл харин ч зохиолынхоо дагуу их сайн тоглосон.    Би чинь их гэр амьтай. Ажил дууссан л бол хурдхан гэртээ харьж, хүүхдүүдээ эрхлүүлэхийг л хүсдэг. Манайх чинь нялх хүүхэдтэй болсон. Нялхыгаа бүр ч их санана. Ажлаа хийж чадахгүй байнга нь фэйсбүүкээр видео колл хийнэ. Саяхан бид Филиппин рүү гэр бүлээрээ аялчихаад ирсэн. Гэр бүл маань аз жаргалтай, уран бүтээл урагштай сайхан байна. 

 Хамтлагийнхаа залуустай ярилцаж шийдээд, "Мөрөөдлийн театр"-аасаа гарсан 

-Таныг сонгуульд нэр дэвшинэ гэдэг мэдээ гараад байсан?

-Өнөө цагт болохгүй зүйл их байна. Дээр, доргүй л бүгд худалч, луйварчин, залилагч болчихсон. Бид амьдралыг энэ өнцгөөс битгий хараарай л гэж үзэгчдэд хэлэхийг хүссэн. Киноны төгсгөлд миний тоглосон Цэцээ гэдэг залуу УИХ-д нэр дэвшдэг юм. Бид санаатайгаар сонгуульд нэр дэвшиж байгааг харуулсан. Биднийг иймэрхүү хүмүүс л удирдаж байна шүү гэдгийг үзэгчдэд хүргэчих юмсан гэж зорьсон. Киноныхоо идэвхжүүлэлтийг хийж байхдаа зориудаар сайтуудаар Батаа УИХ-д нэр дэвшихээр боллоо гэсэн мэдээлэл цацсан. Киноны маркентингийн л ажил. Мэдээ оруулсны дараа олон хүн сэтгэгдэл бичиж байна билээ. Янз бүрээр л хэлсэн. Зарим нь “За чи л дутав гэж”, “За юухэв, урлагийнхаа ажлыг л хий” гэх мэтээр олон шүүмжлэл бичсэн байсан. Би хэзээ ч нэр дэвшихгүй. Хүн хаана байхаа үргэлж мэддэг байх хэрэгтэй.   Болж байгаа сайхан амьдралыг харлуулж, зүгээр байж байгаад хулгайч болоод яахав дээ.  Энэ зүгээр л киноны маркетингийн ажил байсан шүү гэдгийг танай сайтаар дамжуулаад хэлье.

-Кино зохиолчоор ажилласан хоёр хүний нэг нь та байсан. Танилцуулга дээр киноны зохиолыг Д.Баттөмөр гээд биччихсэн байна билээ. Ер нь зохиол бичдэг үү. Нууц авьяас байна уу?

-Оролцсон кино болгондоо л зохиол дээр нь ажилладаг. Киноны хамгийн гол зүйл зохиол шүү дээ. Нэгдүгээрт зохиол, хоёрдугаарт зохиол, гуравдугаарт зохиол гэдэг. Зохиол л сайн байвал тэр кино хөрвөж, цаашаа үргэлжилнэ, чанартай уран бүтээл болдог. Тийм болохоор зохиолд маш  их ач холбогдол өгч, ажиллах ёстой. Зохиол дутуугаас болж тэр кино юу өгүүлэх гээд байгаа юм, ямар санааг илэрхийлэх вэ гэдэг нь мэдэгдэхгүй гэдэг шүүмжлэлд өртдөг. Шүүмжилж байгаа хүмүүсийн ч зөв. Тиймээс уран бүтээлчид киноны зохиолоо маш чамбай бичиж, сайжруулах хэрэгтэй. Би оролцон тоглож байгаа бүхий л киноныхоо зохиолыг аль болох сайжруулахын төлөө ажиллах юмсан гэж боддог.

-Өөрөө бие дааж кино зохиол бичиж байв уу?

-Одоохондоо бие дааж бичсэн зохиол байхгүй. Тоглож байгаа киноны зохиолд оролцож, өөрийнхөө зүгээс сайжруулж болох юу байна, тэр чинээгээр чадахаараа л хичээдэг. Редакторлах ажлыг сайн хийдэг гэхэд болно. Илүү үйл явдал нэмэх, текст, диалоги оруулах, магадгүй зохиолыг 360 эргүүлэх ч тохиолдол байдаг. Тэр болгондоо зохиолчоор нэрээ тавиулахыг хүсдэггүй. Өөрөө продюссероор ажилласан  “Ээжийн дайсан” 1, 2, “Микроны босс”, “Приусны босс”, “Ээжээ надтай гэрлээч”, “Боссын босс” гээд олон киноны зохиолыг чанаржуулахын тулд оролцсон, санаа оноогоо нэмэрлэсэн. “Таарсан хоёр” кинонд ч гэсэн продюссерын ажил хийж байна. Уран бүтээлд нэр холбогдож, оролцож байгаа л бол сайн хийхийн тулд шамдаж ажилладаг.

-Манайд мэргэжлийн зохиолч их дутмаг байна уу даа. Мэдээж олон сайхан зохиолч байгаа, тэднийг үгүйсгэх аргагүй. Гэхдээ л дутмаг байна. Тиймдээ ч найруулагчид, жүжигчид өөрсдөө зохиол бичээд байх шиг?

-Хоёр талтай. Сайн бичиж байгаа зохиолчид олон байна. Саар дутуу нь ч бий. Гэхдээ мэргэжлийн зохиолчид ховордсон гэдэгтэй санал нийлнэ. Кино зохиол бичиж байгаа, зохиолч гэдэг автор зүүж байгаа хүмүүс их л юм уншиж, судалж, мэдэрч байж илүү сайжрах юм шиг санагддаг. 

-Сүүлийн үед “Мөрөөдлийн театр”-ынхаа уран бүтээлд оролцохгүй байна уу. Тэгж анзаарсан?

-Хувь уран бүтээл хийгээд ирэхээр хамтлагийн ажил орхигддог юм байна. Тиймээс хамтлагынхаа залуустай ярилцаад, “Мөрөөдлийн театр”-аасаа гарсан.   

-Ойрын болон цаашдын уран бүтээлийн төлөвлөгөө юу байна. Сонирхолтой уран бүтээл байвал манай уншигчдад сонирхуулаач?

-Ерөнхийдөө хувийн уран бүтээлээ хийнэ. Улиастайн 2000 цэргийн бослогын тухай “2000” нэртэй кино хийлээ. Солонгосын алдарт жүжигчин Ан Жэму буюу бидний сайн мэдэх Ким Ду Хан Монголд ирж тоглосон. Миний ангийн охин “U art entertainment”-ийн захирал Ч.Ундрал  тэр жүжигчинтэй холбогдож, Монголд урьсан. “Women” нэртэй кино хийж, Ан Жэмуг тоглуулсан юм. Тэр кинонд би оролцож, нэг дүрд тоглосон. Гайхалтай жүжигчинтэй хамт нэг кинонд тоглох хувь заяа тохиолоо.  Кино маань тун удахгүй нээлтээ хийнэ.