Монгол Улс 2019 онд 7.6 тэрбум ам.долларын экспорт хийжээ

Үндэсний статистикийн хорооноос мэдээлснээр Монгол Улс 2019 онд нийт 152 улстай худалдаа хийж, гадаад худалдааны нийт бараа эргэлт 13.7 тэрбум америк доллар, үүнээс экспорт 7.6 тэрбум америк доллар, импорт 6.1 тэрбум америк долларт хүрчээ. Нийт бараа эргэлтийн хэмжээ өмнөх оны мөн үеэс 860.6  сая америк доллар буюу 6.7,  экспорт 608 сая америк доллар буюу 8.7, импорт 252.6  сая америк доллар буюу 8 хувиар өссөн байна. 

Монгол Улсын гадаад худалдааны тэнцэл 2014 оноос эхлэн ашигтай гарч эхэлсэн бөгөөд 2019 оны урьдчилсан гүйцэтгэлээр ашгийн хэмжээ 1.5 тэрбум ам.долларт хүрч өмнөх оноос 355.4 сая америк доллароор буюу  31.3 хувиар өсчээ. Экспорт 2019 оны 12 дугаар сард 564.2, импорт 543.6 сая америк доллар болж, өмнөх сараас экспорт 37.3, импорт 24.4 сая америк доллароор  өсжээ. Гадаад худалдааны тэнцэл 2019 оны 12 дугаар сард 20.5 сая америк долларын ашигтай гарч, өмнөх сараас 12.9 сая америк доллароор өссөн байна.

Манай 2 хөрш улс нь гадаад худалдааны нийт эргэлтэд хамгийн өндөр дүнг эзэлж, БНХАУ-тай 8.9 тэрбум ам.долларын худалдааг хийжээ. Энэ нь гадаад худалдааны нийт бараа эргэлтийн 64.4, нийт экспортын 89.1 хувийг эзэлж байна. БНХАУ-д экспортолсон бараа бүтээгдэхүүний 44.4 хувийг чулуун нүүрс, 26.4 хувийг зэсийн баяжмал эзэлж байгаа бол Их Британи Улсад экспортолсон барааны 77.5, Сингапур Улсад экспортолсон барааны 76.7, Швейцар Улсад экспортолсон барааны 98.8 хувийг алтны экспорт эзэлж байна. 

Импортын гол түнш улсуудын дүнг авч үзвэл, 2019 оны урьдчилсан гүйцэтгэлээр БНХАУ 33.6, ОХУ 28.2, Япон Улс 9.6, АНУ 4.7, БНСУ 4.4 хувийг эзэлж, нийт импортын 80.5 хувийг бүрдүүлж байна. ОХУ-аас импортолсон барааны 55.8 хувийг нефтийн бүтээгдэхүүн, Япон Улсаас импортолсон барааны 60.9 хувийг суудлын автомашин, БНХАУ-аас импортолсон барааны 13.8 хувь нь ачааны тэрэг, үлдсэн хувийг олон нэр төрлийн бага жинтэй, бараа бүтээгдэхүүнүүд эзэлжээ. 

Импорт өмнөх оноос 252.6 сая америк доллароор өсөхөд эрдэс бүтээгдэхүүний импорт 46.5 сая америк доллар, үүнээс дизелийн түлш 92.6 сая америк доллар, тээврийн хэрэгсэл, тэдгээрийн эд анги 267.0 сая америк доллароор өссөн нь голлон нөлөөлжээ.