Н.Номтойбаяр: Би өөрөө бүрэн эрхээсээ түдгэлзэх шийдвэр гаргана гэж хэлээгүй

УИХ-ын гишүүн Н.Номтойбаярын бүрэн эрхийг түдгэлзүүлэх эсэх асуудлыг Халдашгүй байдлын дэд хороогоор өнөөдөр хэлэлцэж байгаа билээ. Тэрбээр өөрийн биеэр Халдашгүй байдлын дэд хорооны хуралдаанд оролцож, нотлох баримтаа тайлбарлаж, мэдээлэл өгсөн юм. Тэгвэл дөнгөж сая тэрбээр сэтгүүлчдэд мэдээлэл өглөө.  

Тэрбээр "Халдашгүй байдлын дэд хороо одоо шийдвэрээ гаргах гэж байна. Нэгдүгээрт, шийдвэр гаргахад холбогдох хүмүүс нь байж болохгүй нь ойлгомжтой.  Ажлын албаны хүмүүсийг ч гаргачихсан байсан. Сая намайг дахиж дууддаг шалтгаан нь  ХНХ-ын сайд байхдаа гаргаж байсан шийдвэртэй холбоотой. Тэр чинь уг нь нийтэд ил шийдвэр шүү дээ.   Энэ юу вэ гэхээр, Хөдөлмөр эрхлэлтийг дэмжих тухай хууль, Хөдөлмөр эрхлэхэд хүү тооцох энэ тэр гэсэн урт нэртэй Засгийн газрын тогтооолоор батлагдсан журамтай холбоотой асуудлыг асуусан юм. Нэршил, нэр томъёоны хувьд ижил төстэй зүйлүүд байдаг. 

Салбарын бус битгий хэл салбарынхан нь будилдаг. Түүнд нь тодруулга өглөө. Чуулганыг нээлттэй явуулаач гэдэг хүсэлтийг ч би тавиад байгаа. Энэ асуудал та бүхэнд нууцлалтай юм шиг харагдаад байгаа байх. Ирэх долоо хоногт байнгын хороо, Их хурлаар орж, хэлэлцэгдэнэ" хэмээлээ. Дараа нь сэтгүүлчдийн асуултад хариулсан юм.  

-УИХ-ын чуулганы хуралдааныг нээлттэй явуулж өгөөч гэсэн таны хүсэлтийг яаж хүлээж авсан бэ?

-УИХ-ын Дэгийн тухай хуулиар нээлттэй явуулж болохоор зохицуулалттай юм билээ. Би нэг зүйлийг Бүлгийн хурал руу орохоосоо өмнө яарч байгаад мартчихаж. Хэвлэлийнхнээсээ миний хэлсэн үгийг үг үсэггүй гаргаасай гэж хүсэж байна. Яагаад гэвэл ноцтой алдаанууд гараад байна шүү дээ.  Жишээлбэл, олон тоон дээр хэлж байхад, хүмүүс гэхээр хүн гэж бичдэг. Энэ чинь логикийн том алдаа.  

Гол асуудал юу гэхээр, талийгаач Б нас барсантай холбогдуулаад өнөөдрийг хүртэл хэрэг бүртгэлийн хэрэг нээгээд л явж байгаа. Намайг тэнд яллагдагчаар татаж шалгасан зүйл огт байхгүй.  Гурван удаа буюу өнгөрсөн жилийн тавдугаар сард хоёр, зургадугаар сард нэг мэдүүлэг авсан. Мэдүүлэг нь гэрчийн мэдүүлэг шүү. Одоо шалгаад байгаа нь болохоор гэрчийн мэдүүлэг өгөхдөө худал мэдүүлэг өгсөн гэдгээр. Санкци нь 4.5 сая төгрөгөөр торгох, 6 сар нийтийн хөдөлмөр эрхлүүлэх. Цас цэвэрлэдэг ч юм уу. Гурав дахь нь 6 сар гадаадад зорчих эрхийг хасдаг. Шүүхийн шийдвэрээр аль нэгээр ялладаг ийм зүйл анги. Худал мэдүүлэг өгөх гэдэг чинь.

Би худлаа яриагүй гэдгээ нотлоод, дээрээс нь Ерөнхий прокурор, түүнээс өмнө хуулийн процессын дагуу өргөдлөө өгсөн. Лабораторийн шинжилгээ энэ тэрийг нь шалгачихаач гэж. Бүлгийн хурлын өмнө уржигдар талийгаачийн ар гэрийнхэн, өмгөөлөгч Батбаяр нар маш ноцтой хэдэн зүйлийг ярьсан. Нэгдүгээрт, тавдугаар сарын 20-ны өдөр миний хийсэн мэдээллийг гуйвуулсан.  Хоёрдугаарт, холиграфи тестийн хариуг санаатайгаар буруу мэдээлсэн. Зураг үзүүлээд, хүзүүн дээр нь боолтоос үүсдэг улайлт байсан гэсэн. 

Миний нэг буруутай үйлдлийг дэвсгэр болгож, ярьсан. Зодоон цохионы асуудлыг. Нийгэмд энэ чинь ийм л нөхөр байна гэдэг ойлголтыг өгчихлөө. Би өнөөдөр цагдаад гомдол гаргасан. Хүн алчихсан мэтээр над руу дайрлаа. Үүнийгээ шалгуулъя. Үүнийг юу гэж ойлгож болох уу гэхээр би тэр хүний үхэлтэй холбоотойгоор намайг шалгаад өгөөч гэж өргөдөл өгсөн.  

-Таныг намын дарга чинь өөрөө хүсэлтээрээ бүрэн эрхээсээ түдгэлз гэсэн юм уу?

Би намын даргатай ойрд уулзаагүй. Зарим гишүүд өөрийн хүсэлтээр түдгэлзэх саналаа өгөх хувилбар байна гэж хэлсэн. Би юу гэсэн гэхээр, би УИХ-ын гишүүний  дархан эрхээ давуу байдал болгож, мөрдөн байцаах ажиллагаанаас зугтаагүй. Харин ч эсрэгээрээ, 11 сарын 26-аас хойш өөрөө очиж, хөөцөлдөж яваа. Дуудсан цагт нь очиж байгаа. Хоёр сар болоход надаас мэдүүлэг аваагүй байна.  Би бүрэн эрхийнхээ байдлаар түрий барьж, зугтаасан зүйл алга. Тиймээс энэ өөрөө саналаараа бүрэн эрхээсээ түдгэлзэх үндэс биш.

Мэдээлэл задалсан гэсэн. Хэн мэдээлэл задалсныг би баримтаар үзүүлсэн. Анхдагч нь хэн байсан гэж.

-Та өөрөө түдгэлзэх санал гаргахыг бодож үзье гэсэн юм биш үү. Д.Тогтохсүрэн дарга тэгсэн шүү дээ? 

Би өөрөө түдгэлзэх асуудлыг бодож үзье гэж хэлээгүй. Надад бодоод байх юм байхгүй. Түдгэлзэх шийдвэр гаргах эсэх нь УИХ-ын л шийдвэр.