Б.Ертөнц: Хүмүүс маскгүй хэцүү байгаадаа гэж бодоод цуглуулсан мөнгөөрөө 400 ширхэг маск авсан

      БНСУ-д сурдаг зургаан настай Б.Ертөнц хүү өөрийн цуглуулсан мөнгөөрөө 400 ширхэг хүүхдийн амны хаалт авч эх орондоо илгээсэн нь олон хүний хайр хүндэтгэлийг хүлээгээд байна. Тэрбээр 400 ширхэг амны хаалтныхаа 200 ширхэгийг нь ЭМЯ-нд хандивлаж, улмаар ЭМЯ-наас талархсан сэтгэгдлээ өөрсдийн пэйж хуудсаар илэрхийлсэн юм. Тиймээс бид БНСУ-д сурдаг Б.Ертөнц хүүтэй холбогдож, цөөн асуултад хариулт авлаа. 

-Юуны өмнө Монгол хүүхдүүддээ амны хаалт илгээсэн чамд маш их баярлалаа. Манай уншигчдад өөрийгөө болон гэр бүлээ танилцуулахгүй юу? 

-Намайг Бүрэнбатын Ертөнц гэдэг. Би зургаан настай. Манай аавыг Бүрэнбат, ээжийг маань Уянга гэдэг. 

-БНСУ-д хэр удаан амьдарч байгаа вэ. Ямар сургуульд суралцдаг вэ? 

-Би Солонгост ирээд гурван жил болж байна. Солонгос дахь Монгол сургуулийн нэгдүгээр ангид сурдаг. 

-Гурван жилийн хугацаанд Монголдоо хэдэн удаа ирсэн бэ? 

-Зун аав, ээжтэйгээ очдог. Монголдоо очих сайхан байдаг. 

-Чи цуглуулж байсан хуримтлалын мөнгөөрөө Монгол хүүхдүүддээ амны хаалт бэлэглэсэн байна. Яагаад амны хаалт бэлэглэх санаа төрсөн бэ? 

-Аав ээж хоёр Монгол руу явчихсан байсан. Тэгээд эмээтэй утсаар ярихдаа "Энд хүмүүс маскгүй болчихсон байна, маск олдохгүй байна" гээд яриад байсан. Тэгээд маскгүй хүмүүст хэцүү байгаа байхдаа гэж бодоод цуглуулж байгаа мөнгөөрөө хүүхдүүдэд маск авч өгье гэдгээ эмээдээ хэлсэн. Тэгсэн чинь эмээ инээгээд "Ухаантай мундаг хүү" шүү гэсэн. 

-400 ширхэг амны хаалтны 200 ширхэгийг нь ЭМЯ-нд хандивласан байна. Үлдсэн 200 ширхэгийг нь хэнд өгсөн бэ? 

-Миний цуглуулсан мөнгө 400 ширхэг маск авч хүрсэн. Тэгээд 200 ширхэгийг нь эмнэлгийн яаманд /ЭМЯ/ хандивлаад, үлдсэн 150 ширхэгийг нь эгч маань Налайх дүүргийн гэр хороололд амьдардаг маскгүй явж байгаа хүүхдүүдэд тараасан гэсэн. Харин 50 ширхэгийг нь хамаатны хүүхдүүддээ өгсөн. 

-Ёстой мундаг юмаа. Ер нь чи байнга мөнгө цуглуулдаг уу. Цуглуулсан мөнгөөрөө юу авна гэж бодож байсан бэ? 

-Би байнга мөнгө цуглуулдаг. Энэ удаа мөнгө цуглуулаад, мөнгөөрөө гоё "РОБОТ" авна гэж бодоод зөндөө их мөнгө цуглуулсан байсан.

-Хуримтлалаа яаж бий болгодог вэ?

-Энэ юу гэсэн үг вэ?

-Хаанаас яаж мөнгө цуглуулдаг вэ?

-Аав, ээж, эмээ, өвөө надад мөнгө өгдөг. Бас ёлкон дээр тавьсан мөнгөө цуглуулдаг.

-Ирээдүйд ямар хүн болохыг хүсдэг вэ? 

-Би монголдоо пуужин хийнэ. Бас робот зохиогч болно. 

-Монголд байгаа хүүхдүүддээ юу гэж захимаар байна?

-Хүүхдүүдээ маскаа сайн зүүгээрэй. Гараа сайн угаагаарай. Бас бээлийгээ сайн өмсөөрэй. Хичээлээ сайн хийгээрэй. Аав ээжийнхээ үгэнд сайн ороорой. Сайн хүүхдүүд болоорой. Би та нарт итгэж байна шүү. Та нар чадна шүү.

Б.Аз

Энэхүү зураг нь 10 гаруй хүүхдээс шалгараад сургуулийнхаа нээлтэд үг хэлж байжээ. Энэ үеэрээ "Монгол эх орноо хамгаалсан, хайрласан Ерөнхийлөгч болно оо. Амлаж байна" гэж хэлснийг эмээ нь бидэнд хуучиллаа.