О.Ариунтуяа: "Ковид-19"-ийн нууц үе 1-12.5 хоног буюу дунджаар 5-6 өдөр гэж тогтоогдсон

 ДЭМБ-ын мэргэжилтэн О.Ариунтуяа хэлэхдээ "2020 оны хоёрдугаар сарын 17-ны өдрийн 10:00 цагийн байдлаар нийт тохиолдлын тоо 71269, нас баралт 1773 байна. Хоёрдугаар сарын 13-наас эхлэн эмнэл зүйн шинж тэмдгээр батлагдсан тохиолдлыг давхар бүртгэж эхэлсэн. Ингэснээр өвчтөнүүд лабораторийн шинжилгээний хариуг хүлээлгүйгээр томограф ба эмнэл зүйн шинж тэмдгээсээ хамааран эмчилгээг түргэн эхлүүлэх боломжтой болоод байна. Агаар дуслын зам нь эмнэлгийн ажилтнууд болон өвчтний ар гэрийнхэнд шинэ коронавирус халдварлах гол зам хэвээр байгаа. Найман судлаачийн хийсэн судалгаагаар ковид-19-ийн нууц үе нь 1-12.5 хоног буюу дунджаар 5-6 өдөр гэж тогтоогдсон. " гэв. 

 

ОБЕГ-ын дарга Т.Бадрал “21 аймаг, нийслэлд шуурхай штабууд байгуулагдсан. Бүх аймаг, орон нутгийн засаг захиргаа ажлын тусгай горимд шилжээд ажиллаж байна. Гамшгаас хамгаалах  252 албадыг 24 цагийн горимд шилжүүлээд, удирдлага зохион байгуулалтаар хангаж ажиллаж байна. 546 мэргэжийн ангийг бэлэн байдалд шилжүүлж, 2045 техник хэрэгслийг дайчлаад, 462 төлөвлөгөөнд тодотгол хийгээд ажил жигдрээд явж байна.

Төв, орон нутгий 68 телевизээр урьдчилан сэргийлэх мэдээллүүдийг явуулж байна. Мөн 93 зах худалдааны төвийн үзель, 89 сайтаар дамжуулан ард иргэдэд урьдчилан сэргийлэх мэдээлэл хүргэж байна. Нийт хэвлэл мэдээллийн байгууллагууддаа талархал илэрхийлье.

Цагаан сартай холбоотой зар сурталчилгааг нийт 68 телевизээр дамжуулж байсныг зогсоосон. Нэг хоёр мэдээлэл ирж байгаа. Газар дээр нь зогсоогоод явж байгааг мэдэгдэж байна. Улсын болон орон нутгийн хөрөнгийг дайчилна гэсэн заалт байгаа. Өнөөдрийн байдлаар 14 аймаг хөрөнгөө хуваарилаад коронавирусын эсрэг үйл ажиллагаанд зарцуулаад эхэлсэн. Харамсалтай нь Баянхонгор, Дархан-Уул, Дунговь, Увс, Ховд, Сүхбатар аймгуудын мэдээлэл ирээгүй байна. Аймаг орон нутгийн онцгой комиссын дарга, Засаг дарга нарт мэдэгдэл хүргүүлээд байна.” Гэв.

 ЭМЯ-ны Эм, эмнэлгийн хэрэгслийн хэлтсийн дарга хэлэхдээ “Шаардлагатай эм  эмнэлгийн хэрэгсэл, хувийн хамгаалах хэрэгсэл, ариутгал халдваргүйжүүлэлтийн бодис, оношлуур худалдан авахад шаардагдах 4,1 тэрбум төгрөгийг Засгийн газрын нөөц хөрөнгөнөөс шийдвэрлэсэн. Иргэд, аж ахуй нэгж байгууллагуудаас маск, хувийн хамгаалах хэрэгсэл, гар ариутгалын бодис зэргийг бусад хэрэгцээтэй газруудад хүргэж өгөөч гэсэн сайхан сэтгэлийн хандив өргөж байгаа. ЭМЯ хүлээж аваад хэрэгцээтэй газруудад хуваарилаад явж байгаа.

Польш улсад ажиллаж амьдарч байгаа иргэд амны хаалт хандивласныг өрхийн эрүүл мэндийн төвүүд болон орон нутгийн эмнэлгүүдэд хүргүүлсэн.

Гадуур янз бүрийн мэдээлэл явж байна. Коронавирусыг эмчлэх вакцин, олон төрлийн эм гарлаа гэсэн хуурамч мэдээлэл олон нийтийг төөрөгдүүлж байгаа. ДЭМБ-аас зөвлөж байгаа вирусын өвөрмөц эмчилгээ хараахан гараагүй байна. Олон улсын эрдэмтэд ажиллаж байна. Сүүлийн мэдээллээр Америкийн компанийн гаргасан вирусын эсрэг эмийн талаар яригдаж байна. Энэ эм анх эбола вирустэй тэмцэхэд зориулагдаж гарсан эм. Үүнийг Хятадын Засгийн газраас коронавирустэй халдвартай хүмүүст эмнэлзүйн туршилт хийхээр зөвшөөрлийг нь авсан. Туршилт хоёрдугаар сарын 06-нд эхэлсэн. Туршилтад 18 нас хүрсэн 452 өвчтөнийг хамруулж судалгаа хийж байна. Дөрөвдүгээр сарын 03-нд судалгааны үр д үн гарна гэсэн хариулт өгч байгаа. Коронавирусын эсрэг вакцин үйлдвэрлэхэд олон улс бас хамтарч байна. Тухайлбал Америкийн коронавирусын эрсэг вакцин гаргаж авахаар судалгаа хийж байна. Зун гэхэд эмнэлзүйн анхан шатны судалгаа дуусч, хүн дээр хийгдэх туршилт эхэлнэ. Ингэхээр 18 сарын дараанаас энэ вакцин худалдаанд гарна гэсэн урьдчилсан төлөв байдал байна. БНХАУ болон ОХУ-ын эмнэлзүйн удирдамжид янз бүрийн вирусын эрсэг эм  туршаад явж байгаа тохиолдол бий.