Чингэлтэй дүүргийн 19 дүгээр хороо, Ар- Гүнтийн даваанд шалган нэвтрүүлэх хяналтын цэг үйл ажиллагаа явуулахад бэлэн боллоо. Энэ нь Улаанбаатар хотод анх удаа дүүргийн хөрөнгө оруулалтаар баригдсан шалган нэвтрүүлэх байгууламж юм. Уг хяналтын цэг ашиглалтанд орсноор хот хоорондын зорчигч тээвэрлэлтийн үед үүсдэг асуудлуудыг шуурхай шийдвэрлэж, зам тээврийн осол, хулгайгаар түүхий нүүрс, мод зөөвөрлөх, гарал үүслийн бичиггүй зэрлэг ан амьтан болон малын мах арьс шир хотруу оруулах зэрэг олон зөрчилд хяналт тавих боломжтой болжээ. Тэгвэл өчигдөр Чингэлтэй дүүргийн Засаг дарга Ж.Эрдэнэбат, тус дүүргийн Мэргэжлийн хяналтын газрын хэлтсийн дарга Д.Хишигбаатар тэргүүтэй албаны хүмүүс энэхүү шалган нэвтрүүлэх цэгийн үйл ажиллагаатай танилцлаа.
Тус хяналтын цэгийг мэргэжлийн байгууллагуудын алба хаагчид байрлах камержуулалт, мэдээ мэдээллээр хангах удирдлагын функц бүхий тусгай зориулалтын өрөө тасалгаагаар тохижуулсан бөгөөд ирэх хавраас тээврийн хэрэгсэл ариутгах терминал, тусгаарлах журмын хашаа, ногоон байгууламжаар тохижуулах юм байна. Мөн аваар осол, гэмт хэрэг зөрчлөөс сэргийлэх үүднээс Гүнтийн даваа хүртэл зуслангийн замд гэрэлтүүлэг, камержуулалтын ажлыг бүрэн хийсэн аж.
Энэ талаар Чингэлтэй дүүргийн Засаг дарга Ж.Эрдэнэбат "Улаанбаатар хотын хойд чиглэл рүү иргэд ихээр зорчиж, замын ачаалал нэмэгдэж байгаатай холбогдуулан Чингэлтэй дүүргийн төсвийн хөрөнгө оруулалтаар Гүнтэд хяналтын пост байгуулаад байна. Энэхүү хяналтын пост мэргэжлийн байгууллагуудын хяналт явуулах нөхцлийг бүрдүүлж байгаа юм. Энэ замаар өдөртөө 300-400 тээврийн хэрэгсэл зорчиж, энэхүү постоор нэвтэрч байна. Зуны улиралд нэлээд өндөр ачааллыг авдаг. Энэ цэгт байнгын үйл ажиллагаа явуулж, хяналт тавьснаар байгаль орчны эсрэг зөрчил багасах боломжтой" хэмээлээ.
Тэгвэл Чингэлтэй дүүргийн Мэргэжлийн хяналтын газрын хэлтсийн дарга Д.Хишигбаатар "Энэхүү постод Чингэлтэй дүүргийн хяналтын байгууллагууд хамтарч ажиллана. Үүний нэг нь манай Мэргэжлийн хяналтын газар байгаа. Мэргэжлийн хяналтын газрын байцаагчид хот руу орж байгаа түүхий нүүрс, хууль бус бараа, бүтээгдэхүүнд хяналт тавина" хэмээн ярилаа.
Харин Чингэлтэй дүүргийн Цагдаагийн хоёрдугаар хэлтсийн дарга, цагдаагийн хошууч Ц.Сугаржав "Энэ хяналтын цэг ашиглалтад орсноор цагдаагийн байгууллагын зүгээс замын хөдөлгөөнд оролцогчдод 24 цагийн хяналт тавих боломжтой болж байна. Энэ хяналтын цэгт замын цагдаа, байгаль орчны чиглэлээр хяналт тавих албан хаагчид ажиллана. Улаанбаатар хотод түүхий нүүрс түлэхийг хориглосон шийдвэр гарсан. Энэ шийдвэрийн биелэлтэд хяналт тавих чиглэлээр ч ажиллана" хэмээн ярьсан юм.
Албаны хүмүүс Гүнтийн давааны хяналтын цэгийн үйл ажиллагаатай танилцах үеэр Чингэлтэй дүүргийн цагдаагийн хэлтсийн алба хаагчид болон өрхийн эмнэлгийн эмч нар хотоос гарах болон орох хөдөлгөөнд хяналт тавин автомашины ачаа, тээшийг шалгаж, жолооч нарын халууныг тусгай багажаар шалган ажиллаж байлаа.
Т.Эрдэнчимэг
2 сэтгэгдэлСэтгэгдэл бичих
ЭНЭ ХЯНАЛТЫН ЧУХАЛ ЦЭГИЙГ ДАВААНЫХАА ОРОЙ ДЭЭР 2 ТИЙШЭЭ САЙН ХАРАГДАХ ӨНДӨРЛӨГ ЦЭГТ БАЙГУУЛАХ БАЙСАН ЮМ ДАА.ОДОО БАЙГАА НЬ АЙЛУУДАД ДЭНДҮҮ ОЙРТСОН МӨН ДАВЖ ИРСЭН МАШИН ПОСТ ХҮРЭХГҮЙГЭЭР АЙЛУУД ДУНДУУР ОРООД ЗОГСОЖ АНГИЙН МАХАА ДАМЖУУЛДАГ БОЛОМЖТОЙ ЗЭРГИЙГ САЙН ТООЦСОНГҮЙ Л ХИЙЛЭЭ ДЭЭ.ХАЙРАН ХӨРӨНГӨ.ДАРААГЫН ЗАСАГ НААДАХЫГ ЧИНЬ ЗАРЧИХААД ЗӨВ ОНОВЧТОЙ ГАЗАРТ НЬ ШИЛЖҮҮЛЭХ БОЛНО.
Hot ruu ordog gardag bvh zamuud n tsagdaa tsereg bolson eren neg Iraq Afghanistan maygiin bolgoj bgam bna.