Европын Хөлбөмбөгийн холбооны хамгийн нэр хүндтэй тэмцээн болох Аваргуудын лигийн 2019-2020 оны улирал хасагдах шатны тоглолтуудаар эргэн ирлээ. Өнөө шөнө Улаанбаатарын цагаар 04:00 цагаас Испанийн "Атлетико Мадрид" клуб талбайдаа Английн "Ливерпүүл"-ийг хүлээж авч, эхний тоглолтоо хийнэ. Мөн Германы "Боруссия Дортмунд" клуб талбайдаа Францын "ПСЖ" багийг хүлээж авах юм.
Энэ хоёр тоглолтоос онцлох нь аваргаа хамгаалагч "Ливерпүүл" клуб Испанид "Атлетико"-гийн талбайд зочлох "тулаан" юм. Европын Хөлбөмбөгийн холбооны албан ёсны цахим хуудсаар хоёр багийн аль нь хожих вэ гэсэн санал асуулга явуулж байгаа. Өчигдөр оройн 22:20 цагийн байдлаар саналаа өгсөн хүмүүсийн 73 хувь нь "Ливерпүүл"-ийг хожно гэжээ. Мэдээж "Ливерпүүл" хожих магадлал арай илүү. Тэгвэл шөвгийн наймд шалгарах эрхийн төлөө тулах хоёр багийн зарим статистик үзүүлэлтийг танилцуулъя.
Хоёр баг сүүлийн 3 удаа хоорондоо тулахад "Атлетико Мадрид" 2 хожиж, "Ливерпүүл" нэгд нь өрсөлдөгчөө буулгаж авчээ. 2010 оны дөрөвдүгээр сарын 22-ны өдөр Европа лигийн хагас шигшээд "Атлетико"-гийн талбайд тулахад Испанийн баг 1:0-ээр хожсон. Хариу тоглолтод 7 хоногийн дараа болоход "Ливерпүүл" өрсөлдөгчөө 2:1-ээр буулгаж авсан юм. Гэхдээ финалд үлдсэн нь мэдээж "Атлетико". Хамгийн сүүлд 2017 он наймдугаар сард хоёр баг нөхөрсөг тоглолт хийж, үндсэн цагт 1:1-ээр тэнцсэн. Торгуулийн цохилт цохиход "Атлетико" 6:5-аар хожиж байлаа.
Тус бүрийнхээ лигт мэдээж "Ливерпүүл" илт тасархай тоглолтыг үзүүлж байна. Сүүлийн 5 тоглолтынхоо дөрөвт нь хожиж, нэг тэнцсэн. Премьер лигт 3 хожсон бол лигийн цомд нэг хожиж, нэг тэнцсэн юм. "Атлетико"-гийн хувьд сүүлийн 5 тоглолтдоо ердөө ганцхан хожиж, 2 тэнцэж, 2 хожигдсон.
Хоёр багаас энэ тоглолтод оролцохгүй байж магадгүй хэд хэдэн тоглогч байгаа. "Ливерпүүл"-ээс Натаниэль Клайн бэртэлтэй бол Шакири оролцох эсэх нь эргэлзээтэй байна. "Атлетико"-гоос Киран Триппьер бэртэлтэй бол Хектор Эррера, Жоао Феликс, Диего Коста нар оролцохгүй байж магадгүй байгаа юм.
Талбайн эзэн "Атлетико Мадрид"-тай холбоотой зарим статистик мэдээлэл
-"Атлетико Мадрид" 2014, 2016 оны Аваргуудын лигт финалдаж, хоёуланд нь "Реал Мадрид" клубт хожигдсон. 2018 оны Европа лигт Францын "Марсель" клубтэй финалд үлдэж, 3:0-ээр хожиж түрүүлсэн.
-"Атлетико Мадрид" 2009-2010 оны оны улирлын Европа лигт "Ливерпүүл"-тэй учраа таарснаас хойш албан ёсны тэмцээнд дахиж тоглоогүй. Тэрхүү тоглолтод хоёр баг 2:2-оор тэнцэж, "Атлетико" финалд шалгарсан. Улмаар финалд Английн "Фүлхэм" клубыг 2:1-ээр хожиж, түрүүлсэн билээ.
-"Атлетико Мадрид" Аваргуудын лигт 10 удаа оролцож байгаа бөгөөд түүнийхээ 8 удаад нь хасагдах шатанд шалгараад байна.
Зочин баг "Ливерпүүл"-тэй холбоотой зарим статистик мэдээлэл
-"Ливерпүүл" Аваргуудын лигийн сүүлийн хоёр улиралд дараалан финалдаж, нэгд нь өрсөлдөгчөө хожин түрүүлсэн.
-Өнгөрсөн улиралд "Ливерпүүл" клуб "Атлетико Мадрид"-ын "Эстадио Метрополитано" цэнгэлдэхэд Аваргуудын лигийн финалын тоглолтоо "Тоттенхэм"-тэй хийж, хожсон. Тиймээс "Атлетико"-гийн эсрэг хийх эхний тоглолт тэдэнд хамгийн сайхан дурсамжийг сэдрээсэн "тулаан" байх нь.
Сэтгэгдэл бичих