Д.Дулмаа: Цусны нөөц 50 хувиар буурах эрсдэл үүсэж болзошгүй байна

Баянгол дүүргийн МоАХ-ны  зөвлөлийн 80 гаруй гишүүн өчигдөр Баянзүрх дүүргийн  цус цуглуулах төвд 28 литр цус бэлэглэлээ.  Баянгол дүүргийн Монголын ардчилсан холбооны дэргэдэх залуучуудын холбооны зөвлөлийн гишүүд  нийгмийн хариуцлагыг ухамсарлан энэхүү аяныг анх удаа зохион байгуулсан нь энэ.  Энэхүү аян  Баянзүрх дүүргийн цус сэлбэх төвд өглөөний 10:00 цагт эхэлсэн юм. Манай сурвалжлах багийг очиход,  эмнэлэгт цусаа өгөхөөр цугласан  улбар шар фудволк, амны хаалтаар жигдэрсэн 30 гаруй хүн ирсэн байв. Тэдний зарим нь цусаа өгөх гэж дараалал үүсгэн зогсож байгаа харагдлаа. Цусаа өгөөд дөнгөж гарч ирсэн болов уу гэлтэй  тав, зургаан залуу тусгайлан бэлдсэн халуун кофе, цай уух хэсэгт сууж байв.

Тэдний өмссөн ижил өнгийн хувцас нь МоАХ-ын гишүүд мөн болох нь андашгүй. Бүх гишүүд цусаа өгч дууссаны дараа нийгмийн ажилтан Д.Дулмаа бүгдийг нь “Амьдрал бэлэглэе” гэсэн уриа бичсэн томоос том зүрхтэй зурагт хуудасны урд суулгав. Цагаан халаадтай,  жижигхэн биетэй эмч халуун цусаа харамлалгүй бэлэглэсэн залуусд талархасан сэтгэлээ илэрхийллээ. Дараа нь  цусаа өгсөн хүн 24 цагийн дотор анхаарах ёстой хэд хэдэн санамжыг ойлгомжтой тайлбарлаж өгөв. Залуус нийгмийн хариуцлагаа ухамсарлаж өнөөдөр цусаа бэлэглэсэн нь өөр олон хүнийг уриалсан үйлдэл байлаа. Гэвч  Нийслэлийн хэмжээнд шинэкорона  вирусийн дэгдэлтээс урьдчилан сэргийлж,  нийтийг хамарсан үйл ажиллагаа явуулдаг томоохон  нэгжүүдийг түр хаасан. Үүнтэй холбоотой цус цуглуулах төвийн үйл ажиллагаа доголдож, цусны нөөц багассан гэх мэдээллийг холбогдох албаны хүмүүс мэдээлж байсан юм.  

Тэгвэл  хоёрдугаар сарын дунд үеийн нөхцөл байдлын талаар Цус сэлбэлт судлалын үндэсний төвийн нийгмийн ажилтан Д.Дулмаагаас тодрууллаа. Тэрбээр  “Цусны нөөцийн хомсдол үүсээгүй, эрүүл мэндийн байгууллагын үйл ажиллагаа хэвийн үргэлжилж байна.  Харин цусны нөөц 50 хувиар буурах эрсдэл үүсэж болзошгүй гэж үзэж байгаа. Энэ нь  нэгдүгээр  сарын 27-оос гуравдугаар сарын 2-ыг хүртэл их,  дээд сургуулиудад хөл хорио тогтоосонтой холбоотой.  Манай байгууллагын хувьд хоёрдугаар сар хамгийн онцлог.  Учир нь хоёрдугаар сард явуулын төлөвлөгөөг их,  дээд сургуулиудаар явж биелүүлнэ гэж тооцоолсон байсан. Гэвч  энэ бүх төлөвлөгөө биелэхгүй хэмжээнд хүрээд байна. Тиймээс бид  ард иргэд, төрийн болон төрийн бус байгууллагуудын хүрээнд цусаа хандивлах  уриалга гарган ажиллаж байна. Өнөөдөр манай цус сэлбэлтийн төвд  Монголын ардчилсан холбооны залуучууд цусаа өгсөн нь бидний уриалгыг дэмжин хамтран ажиллалаа  гэж үзэж байна. Эрүүл мэндийн салбарын бүх байгууллагууд өндөржүүлсэн бэлэн байдалд ажиллаж байгаа энэ үед цус  цуглуулалтыг улам идэвхжүүлж, явуулын цус сэлбэлтийг ажлыг хийж  байна” хэмээлээ.  

Та 30 минутын хугацаанд 350 мл цус хандивлаж донор болсноор гурван хүний  амийг аврах боломжтой байдаг. Тэгвэл МоАХ-ны залуучууд цусаа өгснөөр 300 хүнд амьдрал бэлэглэж байгаа юм.  Тэдний төлөөлөл болгож   Монголын Ардчилсан холбооны Баянгол дүүргийн зөвлөлийн гишүүн Б.Нямгаваагийн сэтгэгдлийг сонссон юм.   Тэрбээр  “Өнөөдөр залуучууд зөв зүг рүү нэгнээ хөтлөх хэрэгтэй. Нэг хүн цусаа өгөхөд цаана нь 4-5 хүний амь нас аврагдаж байдаг. Тиймээс Баянгол дүүргийн залуучуудын  зөвлөлөөс энэхүү аяныг эхлүүлсэн.  Цаашид зөвхөн Баянгол гэлтгүй бусад дүүргийн залуусыг цусаа идэвхтэй бэлэглэхийг уриалж байна” хэмээлээ.

Цус сэлбэлт судлалын үндэсний төвөөс үйлдвэрлэл, үйлчилгээ эрхэлдэг аж ахуй нэгж, төрийн болон төрийн бус байгууллага, нэгдсэн холбоод болон ард иргэдийг нийгмийн хариуцлагаа ухамсарлаж цусаа хандивлахыг уриалга болгожээ.  Улаанбаатар хотын хэмжээнд цус цуглуулах гурван төв ажилладаг. Уншигч та улсын хоёрдугаар төв эмнэлгийн хашаанд зүүн хойд талд Баянзүрх цус цуглуулах төв, нэгдүгээр эмнэлгийн залгаа Сүхбаатар цус цуглуулах төв, “Дүнжингарав” худалдааны цэгт байрлах Нийслэлийн нэг цэгийн үйлчилгээнд байрлах “Дүнжингарав” цус цуглуулах төвд очин цусаа өгөх боломжтой.

 Т.Эрдэнэчимэг