С.Чинзориг: Өөрийгөө шалгуулахаар АТГ-т өргөдөл гаргаж байна

Нийгмийн хамгаалал, хөдөлмөрийн сайд С.Чинзориг НДС-тай холбоотойгоор өөрийг нь яллагдагчаар татаагүй талаар мэдээлэл өглөө.

Тэрбээр “Миний өмнө 2016 онд ХНХЯ-ны сайдаар ажиллаж байсан хүнийг нийгмийн даатгалын саннтай холбоотой асуудлаар шалгаж байгаа гэсэн мэдээлэл гарсан. Мөн НДЕГ-ын дарга болон удирдах албан тушаал хашиж байсан хүмүүсийг шалгаж, түр саатуулсан гэсэн асуудал байна. Сүүлийн үед энэ хэрэгт С.Чинзориг холбоотой. С.Эрдэнийг биш С.Чинзоригийг шалгах ёстой. Нийгмийн даатгалын хөрөнгийг С.Чинзориг цөлмөсөн гэсэн захиалгат, гүтгэлгийн шинж чанартай нэвтрүүлгүүдийг улс төрийн намын зүгээс явуулж байна.

Улс төрийн зарим намын удирдлагууд хэвлэлийн хурал хийж намайг энэ хэрэгт холбоотой,буруутай мэтээр ярьсан. Би тухай бүрт нь өөрийн байр суурийг илэрхийлж байсан. Капитал банк дампуурсантай холбоотой албан тушаалаа ашиглаж эрх ашгийн сонирхол үүсгэсэн асуудал байхгүй.

ХНХ-ын сайдын хувьд албан түшаалаа урвуулан ашиглаж бусдад давуу байдал олгосон асуудал байхгүй гэдгээ хэвлэлүүдэд ил тод тайлбарлаж байсан. Харамсалтай нь сүүлийн үед гүтгэлэг зогсолтгүй үргэжлэх янзтай байна. Юманд хэмжээ хязгаар гэж байдаг. Би асуудал гарах бүрт үсчээд, өрвөлзөөд байдаггүй. Тэвчээртэй хүлээцтэй хандаж ирсэн.

Гэтэл энэ гүтгэлэг сонгууль дуустал тасрахгүй шинжтэй. Намайг онц ноцтой хэрэгт гүтгэх, миний болон байгууллагын нэр төрд халдах асуудал үргэлжлэхээр байна. Хамгийн ноцтой нь өчигдөр “Бямбабаатар Монгол” гэсэн фэйсбүүк хаягнаас “Улсын ерөнхий прокурорын газраас С.Эрдэнэ нарыг яллагдагчаар татахаас татгалзаж С.Чинзориг нарыг яллагдагчаар татах болжээ” гэсэн худал мэдээлэл сошиалаар цацлаа. Миний хувийн нэр хүнд болон байгууллагын нэр хүндэд халдлаа. Тиймээс өнөөдөр өөрийгөө ашиг сонирхлын зөрчлийн асуудалтай эсэх, албан тушаалаа ашиглан бусдад давуу байдал олгосон эсэхийг мөрдөн шалгаж хариу өгнө үү гэсэн хүсэлтийг АТГ-ын удирдлагад хүргүүлж байна.

Хууль хяналтын байгууллагууд нь шалгаад, надад хариу өгөх байх гэж бодож байна. Төрийн өндөр албан тушаалтнууд хэрэгт холбогддог, шуугидаг, яасан нь мэдэгдэхгүй алга болдог байдалд цэг тавъя. Фэйсбүүк, твиттер хаягуудаар намайг прокуророос яллагдагчаар татахаар боллоо гэсэн худал, зохиомол, нэр төрд онцы ноцтойгоор халдсан мэдээлэл явсан. Тиймээс Ерөнхий прокурорт өргөдөл гаргаж байна. Намайг ямар нэг хэрэгт холбогдуулж яллагдагчаар татсан эсэх талаар албан ёсоор хариу өгөөч гэсэн хүсэлт гаргаж байна.

Зөрчлийн тухай хуулиар хүнийг онц ноцтой хэрэгт гүтгэсэн бол цагдаагийн байгууллага шалгадаг. Манайд одоо үйлчилж байгаа Зөрчлийн хуулиар гүтгэж доромжилсон бол буруутай этгээдэд оногдуулдаг ял инээдэм. Хүний нэр төрд халдаж, гүтгэсэн бол тэр хүнийг 2 сая төгрөгөөр торгодог хууль үйлчилж байгаа. Энэ хуулинд өөрчлөлт ороод намрын чуулганаар батлагдсан. Одоо эрүүийн хариуцлага хүлээлгэдэг байхаар болсон. Энэ хууль хоёрдугаар сарын 27-ноос хэрэгжиж эхэлнэ.

Хууль хэрэгжихээс өмнө намайг гүтгээд, 2 сая төгрөгөөр торгуулиад салъя гэдэг улс төр явж байна гэж бодож байна. Тиймээс Зөрчлийн тухай хуулиараа энэ хэргийг шалгаж үнэн мөнийг тогтоож өгөх өргөдлийг ЦЕГ-т гаргаж байна. Мөн ТЕГ-т гомдол гаргаж байна. “Бямбабаатар Монгол” гэсэн хаягнаас цацсан мэдээллийг шалгуулахаар хандаж байна. Гүтгэсэн, хуурамч мэдээлэл тараасан буруутай этгээдэд хариуцлага тооцохыг хүсч байна.” гэв.