БНСУ-д амьдарч буй монголчууд ЮУ ЯРИВ

    Коронавирусийн халдвар БНСУ-д хурдтай тархаж байна. Өнөөдөр өглөөний байдлаар 346 хүн коронавирусийн халдвар авсан нь тогтоогдоод байна. Мөн уг халдвараар хоёр хүн нас бараад байгаа юм. Өнгөрсөн оны арванхоёрдугаар сарын 31-ны байдлаар тус улсад манай улсын 48185 иргэн амьдардаг гэсэн тоо баримт байдаг аж. 

Ингээд БНСУ-д амьдарч буй иргэдээс цөөн зүйлийг тодрууллаа. 

    Сувон хотод амьдардаг иргэн Б.Мөнгөнтуяа "Коронавирусийн халдвараас сэргийлэх зөвлөмж, сэрэмжлүүлэг маш сайн явагдаж байна. Автобус, метро, метроны буудал, үйлчилгээний газрууд гээд бүх л газарт сэрэмжлүүлэг бий. Мөн утсанд өдөрт хоёр удаа мессеж ирдэг. Түүнчлэн автобус, метронд ариутгалын бодис, нэг удаагийн маск байрлуулсан байгаа. Маскгүй хүмүүс тэндээс аваад л хэрэглэчихдэг. Харин эмийн сангуудад N94 ховордчихсон. N94 маскийг нэг хүнд 5 ширхэгээс илүүг зардаггүй. Учир нь бусдадаа үлдээх ёстой гэж үздэг юм билээ. Энд коронавирусийн халдвар авсан, сэжигтэй иргэдийг үнэ төлбөргүй шинжилгээнд хамруулж, эмчилгээ хийж байгаа. Сургуулиуд гуравдугаар сарын 17 хүртэл карентилчихсан. Нөхцөл байдлыг харж байгаад сунгах эсэхээ шийднэ гэсэн. 

Хамгийн гол нь, Солонгосчууд коронавирустай холбоотой мэдээллийг зөвхөн Эрүүл мэндийн яам болон телевизээсээ л хүлээн авдаг. Зөвхөн энэ сувгаас л үнэн бодит мэдээллээ авч, итгэж, энэхүү мэдээллээ бусаддаа түгээдэг нь их сайхан санагдсан. 

Харин монголчуудын хувьд дор бүрнээ сэрэмжтэй байж, маскаа зүүгээд л ажиллаж байна даа" гэлээ. 

Сөүл хотод амьдардаг иргэн Б.Тайван /тэрбээр зургаа нийтлүүлэхийг хүссэнгүй/

"Коронавирусийн тархалт жаахан эвгүй болчихлоо. Солонгосчууд их тайван, хэр баргийн зүйлд сандраад байдаггүй. Харин өчигдөр, уржигдраас жаахан сандралтай байгаа нь ажиглагдсан. Гэхдээ тархалт хурдацтай байгаа ч манайх шиг хоол хүнсээ нөөцлөөд зохиомол хомсдол үүсгээд байгаа асуудал байхгүй. Яг л албаны мэдээллээрээ хөгждөг хүмүүс. Элдэв хуурамч мэдээлэл энд гараад байдаггүй. Одоогоор нөхцөл байдал гайгүй л байна. Гэхдээ Тэгү хот бол Ухань хот шиг болчихлоо. Тэгүд хөл хорио тогтоох эсэхийг ярилцаж байгаа гэсэн. Хуулиндаа иргэнээс дураараа шинжилгээ авч болохгүй гэж заасан учраас Тэгүд халдвар тараасан эмээгээс шинжилгээ авч чадаагүй нь өнөөдөр ийм нөхцөл байдалд оруулсан. Тиймээс цаашдаа халуурч бүлээрсэн бүх хүнээс өөрсдөө зөвшөөрөөгүй байсан ч шинжилгээ авах юм шиг байна лээ. Монголчуудын хувьд эргэн тойрны хүмүүс болон телевизээс л мэдээлэл авч байна.

Солонгос дахь Монголын Элчин сайдын яам таг чиг байна. Иргэдээ харж хандаж, мэдээлэл сэрэмжлүүлэг өгч байгаа ч юм байхгүй. Бараг коронагийн сургаар Монгол явчихаагүй байгаа гэж хардмаар. Солонгос дахь Монголчууд яг л элчингүй юм шиг л байдалтай байдаг. Монгол хоолны газраар хэссэн, костюмтай ярвагнасан хэдэн хүмүүс л байдаг гэж сонссон. Маш хөдөлмөрч, нөлөөтэй, монголчуудаа харж ханддаг сэтгэлтэй хүнийг Элчингээр томилмоор байна" гэсэн юм. 

     Гунжү хотод амьдардаг Ү.Нямдулам "БНХАУ-д Коронавирусийн халдвар тархахад энд нэг их сүйд болоогүй ээ. Маск зүүгээд сэрэмжлүүлэг мэдээллээ үзээд явж байсан. Харин хэд хоногийн өмнө коронавирусийн халдвараар нэг хүн нас барж, нэг өдрийн дотор 50, 100-гаар халдварын тохиолдол нэмэгдээд ирэнгүүт хүмүүс жаахан сандарч байна. Гэхдээ телевизээр сэрэмжлүүлэг мэдээлэл, коронавирустай холбоотой мэдээлэл цаг тутам гарч байна.

Миний амьдарч байгаа Гунжү хотод коронавирусийн халдвар бүртгэгдээгүй учраас харьцангүй тайван байгаа. Ариутгалыг үнэхээр сайн түвшинд хийдэг юм шиг байна. Байсхийгээд л үйлчилгээний газар, гудамж талбай, нийтийн тээврээ ариутгаж байгаагаа мэдээний цагуудаараа гаргадаг. 

Мөн эмнэлгүүд шинжилгээ, оношлогоо, эмчилгээгээ үнэгүй болгосон.  Хүсвэл гадаад иргэн ч шинжилгээ үнэгүй өгч болно гэсэн. Өнөөдрийн байдлаар хоёр хүн нас бараад байгаа нь жаахан айдас дагуулж байгаа. Гэхдээ хоол хүнс, үйлчилгээний байгууллагууд бүгд хэвийн байна. Манай энүүгээр маск ховордож эхэлж байна. Бас сүм хийдүүдийн үйл ажиллагааг бүгдийг нь түр зогсоосон гэж сонссон" гэлээ. 

Б.Аз