Эрүүл мэндийн яамнаас шинэ коронавирусийн нөхцөл байдлын талаар өнөөдөр ээлжит мэдээллээ хийлээ. ЭМЯ-ны нийгмийн эрүүл мэндийн газрын дарга Д.Нарангэрэл хэлэхдээ "Та бүхэндээ хэлэх энгийн бөгөөд хамгийн гол зөвлөмж бол гэр гэртээ байх. Байгаа газраа байх нь хамгийн чухал. Тиймээс та бүхэн битүүний энэ өдөр гэртээ битүүлээрэй гэж та бүхнээс хүсмээр байна" гэлээ. 

ЭМЯ-ны Эм, эмнэлгийн хэлтсийн дарга Я.Буянжаргал "Аймгууд нийгмийн эрүүл мэндийн ноцтой эрсдлийн үнэлгээгээ хийж, зохих бэлтгэлээ хангаж байна. Ариутгал, халдваргүйтлийн бодисыг тарааж, хэрхэн хэрэглэх талаар холбогдох байгууллагуудад зөвлөгөө зөвлөмж өгч байна. Өчигдөр 4.2 тэрбум төгрөгийн өртөг бүхийн эмнэлгийн тоног төхөөрөмжийг эмнэлгүүдэд тараасан.

Бэлтгэл ажлуудыг хангах хүрээнд улсын хоёрдугаар эмнэлэг, ХСҮТ дээр Эрүүл мэндийн яамны удирдлагууд ажилласан.  Улсын хоёрдугаар эмнэлэг өөрсдийн дотоод нөөц бололцоогоороо амны хаалт хийж байна. Мөн жирэмсэн ажилтнууддаа цалинтай чөлөө олгосон.

БНСУ-д ажиллаж амьдарч буй иргэддээ зориулж зөвлөгөө мэдээлэл өгсөөр байгаа. 103 утасны сүлжээнд зургаан сувгаар мэдээлэл өгөхөөс гадна нэмэлтээр дөрвөн шугамыг нээгээд байна. Хоногтоо 4 мянга гаруй орчим удаа иргэд холбогдож зөвлөгөө авч байгаа. Иргэд болон ААН-үүдэд шаардлагатай мэдээллүүдийг өгч байгаа." гэв. 

Дэлхийн эрүүл мэндийн байгууллагын Халдварт өвчин хариуцсан мэргэжилтэн О.Ариунтуяа "Дэлхийн эрүүл мэндийн байгууллагын мэдээлснээр 2020 оны хоёрдугаар сарын 23-ны 09:00 цагийн байдлаар шинэ коронавирусийн халдвар 78741-д хүрлээ. БНХАУ-д нийт 77042 тохиолдол бүртгэгдэж, 2440 хүн нас барсан. Сүүлийн 24 цагийн хугацаанд БНХАУ-д 540 тохиолдол шинээр нэмэгдэж, нас барсан иргэний тоо 100-д  хүрсэн.Мөн 1699 тохиолдол 29 улсад бүртгэгдсэнээс 15 хүн нас барсан.Иранд 13 хүн халдвар авснаас таван хүнээр нэмэгдсэн.

Итали улсад зургаан тохиолдол нэмэгдсэн. БНСУ-д халдварын тоо нэмэгдэж 556 иргэн халдвар авсан. Сүүлийн хоёр хоногт халдвар авсан 400 хүний 221 тохиолдол нь сүмийн цуглаан 95 тохиолдол нь эмнэлэгтэй холбоотой, 48 хүний халдварыг нь судалж байна. Тус улсад бүртгэгдсэн нийт тохиолдол нь сүмийн үйл ажиллагаанаас болсон байна. Нийт 556 хүн халдвар авснаас 534 хүн тусгаарлагдаж, 18 хүн эмнэлгээс гарч, дөрвөн хүн нас барсан. Одоогоор 84 хүнийг судалж байгаа.