Монгол Улсын Засгийн газар коронавирусын халдвараас урьдчилан сэргийлэх цогц асуудлаар хуралдлаа. Хурлын дараа Онцгой комиссын хуралдаан орсон. Үүний өмнө Нийслэлийн Засаг дарга С.Амарсайхан  сэтгүүлчдэд мэдээлэл өглөө. 

Тэрбээр "Шинэ коронавирусийн дэгдэлт улс орнуудад ихээр нэмэгдэж байгаатай холбогдуулан Монгол Улсын зүгээс зохих арга хэмжээнүүдийг авч байна. Гуравдагч орноос дамжин халдвар тархах магадлал өндөр байгаа тул одоогийн байдлаар Япон улсын зарим нислэгүүдийг цуцлаад байна. Мөн орон нутгийн бүх нислэгүүдийг гуравдугаар сарын 2-ныг хүртэл цуцлах шийдвэр гаргалаа. Онцгой комиссын хурлаар эцэслэн шийдвэрлэнэ. 

Мөн гуравдугаар сарын 02-ныг хүртэл хот хоорондын зам хаах шийдвэрийг сунгахаар болж байна. Нэгэнт шийдвэр гарч байгаа учраас хөдөөгөөс хот руу орох ажилтай байгаа гэсэн иргэдийн шалтаг шатгааныг сонсох боломжгүй. Иргэдээс хэл ам их гарч байгаа. Энэ асуудлуудыг холбогдох хууль тогтоомж болон Зөрчлийн хуулиараа шийтгээд, арга хэмжээ аваад явна.

Түүнчлэн өнөөдрөөс (02.26) баар караоке, амралтын газар, саун, фитнесүүдийн үйл ажиллагааг 03 сарын 30-ныг хүртэл хаахаар шийдвэр гаргахаар болсон. Онцгой комиссын хуралдаанаар албажуулна." гэв.