Тойм:Ерөнхийлөгч Хятад улсад айлчилж, нүүрсний экспортыг сэргээлээ

Өнгөрсөн долоо хоногт улс оронд өрнөсөн онцлох үйл явдлуудыг тоймлон хүргэж байна. 

Хот хоорондын зорчих хөдөлгөөнийг гуравдугаар сарын 3 хүртэл зогсоолоо 

Сар шинийн өдрүүдэд нийтийн тээвэр үйлчлээгүй. Мөн хот хооронд зорчих хөдөлгөөнийг сунгасан юм. Тэгвэл шинийн 3-ны өдөр Засгийн газар, УОК хуралдаж, хот хоорондын зорчих хөдөлгөөнийг хязгаарласан шийдвэрийг гуравдугаар сарын 3-ны 08:00 цаг  хүртэл сунгахаар шийдвэрлэсэн юм.  

Тодруулбал, Улсын онцгой комиссоос амралтын өдрүүдээр хөдөө, орон нутгийг зорьсон иргэдийг ар гэрийн гачигдал, эрүүл мэндийн шалтгаан, албан томилолтоос бусад ямар ч шалтгаантай байсан буцааж нийслэл рүү нэвтрүүлэхгүй байх шийдвэр гаргасан.  Ирэх мягмар гарагийн өглөөний 08:00 цагт нийслэл рүү орох хөдөлгөөнийг нээнэ. 

Солонгос, Японы чиглэлийн болон орон нутгийн нислэгийг зогсоолоо 

Улсын онцгой комисс энэ сарын 26 буюу шинийн 3-ны өдөр хуралдаж, хэд хэдэн шийдвэр гаргасан юм.  Тэр дундаа БНСУ руу явах болон тус улсаас ирэх хоёр талын нислэгийг гуравдугаар сарын 11-ий өдрийг хүртэл зогсоохоор болов. Түүнээс гадна, Японы нислэгийг хоёр талд нь гуравдугаар сарын 11-ий өдрийг зогсоох шийдвэр гаргасан. Энэ сарын 27-ны өдрөөс хойш хоёр долоо хоногийн турш Япон, Солонгосоос ямар ч нислэг хүлээж авахгүй. Мөн тус улсууд руу нисэхгүй юм. 

Төрийн албан хаагчдыг гуравдугаар сарын 30-ны өдрийг хүртэл гадаад руу томилолтоор явахыг хориглов. Тэгвэл орон нутгийн нислэгүүдийг ч гэсэн гуравдугаар сарын 2-ны өдрийг дуустал цуцлах шийдвэр гаргасан билээ. 

Ерөнхийлөгч БНХАУ-д айлчилж, 30 мянган хонь хандивлалаа 

Монгол Улсын Ерөнхийлөгч Х.Баттулга энэ сарын 27-ны өдөр БНХАУ-д албан ёсны айлчлал хийлээ. Монгол Улсын Ерөнхийлөгч Х.Баттулга уулзалтын эхэнд “…БНХАУ-д шинэ төрлийн коронавирус (Covid-19)-ний тархалт гарч, Хятадын ард түмэн сэтгэл санааны хохирол амссан явдалд эмгэнэл илэрхийлж, монголчууд “Тэнхлүүн явахад тэмээгээр тусалснаас тэвдэж явахад тэвнээр тусал”, “Зовох цагт нөхрийн чанар танигдана” гэж ярьдаг шигээ эртний сайхан ёсоор энэ удаад хүрэлцэн ирлээ хэмээн найрсгаар яриа дэлгэн мэндчилсэн.  Мөн Хятадын ард түмэнд Монголын ард түмнээс 30 мянган хонь хандивлаж байгааг мэдэгдэж, монгол бичгээр бичсэн хандивын бичгийг гардуулсан юм. 

БНХАУ-ын Дарга Ши Жиньпин БНХАУ-д үүссэн нөхцөл байдлаас үл хамааран Монгол Улсын Ерөнхийлөгч Х.Баттулгыг эх оронд нь хүрэлцэн ирсэн явдалд гүн талархал илэрхийлж, “Надад дуслыг өгсөн ч би голыг эргүүлэн өгнө” хэмээх Күнзийн сургаалийг, мөн Монголын “Зовох цагт нөхрийн чанар танигдана” гэсэн зүйр үгийг иш татан чин сэтгэлийн талархал илэрхийлэв.

Мөн халдварт өвчин гарснаас хойш  БНХАУ-д хийсэн Төрийн тэргүүний анхны айлчлал гэдгийг онцолж, энэ удаагийн айлчлал нь Иж бүрэн стратегийн түншлэлийн харилцаандаа шинэ боломж гаргах завшаан хэмээн тэмдэглэлээ.

Ерөнхийлөгч Х.Баттулгыг хоёрдугаар эмнэлэгт тусгаарлалаа 

Монгол Улсын Ерөнхийлөгч Х.Баттулга БНХАУ-д айлчлаад, тэр өдөртөө эргэж ирсэн.Айлчлалын багт Гадаад харилцааны сайд Д.Цогтбаатар, Онцгой байдлын ерөнхий газрын дарга, хошууч генерал Т.Бадрал, Ерөнхийлөгчийн Тамгын газрын дарга Ө.Шижир, Ерөнхийлөгчийн Гадаад бодлогын зөвлөх Т.Тэгшжаргал нарын 10 гаруй хүн дагалдан явсан юм. 

Ерөнхийлөгч Х.Баттулга, Гадаад харилцааны сайд Д.Цогтбаатар, Онцгой байдлын ерөнхий газрын дарга Д.Бадрал нарыг сайд нарын хоёрдугаар эмнэлэгт тусгаарласан. 

Харин бусад дагалдан явсаэн албаны хүмүүсийг Жаргалантын аманд байрлах сувилалд тусгаарласан юм. 

Нүүрсний экспортыг сэргээж, ах ахуйн нэгжүүдийг торгохгүй байхаар боллоо 

Засгийн газрын ээлжит бус хуралдаан өчигдөр болж, хэд хэдэн чухал шийдвэрийг гаргалаа. Тухайлбал, нүүрс, газрын тосны ашигт малтмалыг Монгол Улсын хилээр экспортлохдоо ариутгал, халдваргүйжүүлэлтийн арга хэмжээг сайтар авч, хорио цээрийн ариутгалын нөхцөлтэй гэх мэт зохицуулалттайгаар тээвэрлэлт хийх чиглэл өөв.  Ачаа тээвэр хийж байгаа жолооч нар хамгаалалтын хувцастай байх, ариутгал хийгдсэн байх шаардлагатай аж. 

Мөн өндөржүүлсэн бэлэн байдлын хугацаанд нийгмийн даатгалын шимтгэл төлөхгүй бол алдагдал оногдуулдаг байсныг цуцлах чиглэл өглөө. Үйл ажиллагаа нь хэвийн аж ахуй нэгжүүдэд хамаарахгүй, үйл ажиллагаа нь хэвийн бус байгаа бол торгуул ногдуулахгүй байх хууль боловсруулах үүрэг өгсөн юм.  

Дэлгүүр, худалдааны төв, захууд хэвийн ажиллана 

Нийслэлээс энэ сарын 27-ны өдөр мэдээлэл хийж, бүхий л баар, паб, караоке, фитнесс төв, дэн буудлуудыг гуравдугаар сарын 30-ны өдрийг хүртэл хааж байгааг мэдэгдсэн юм.  НМХГ-ын дарга Л.Эрдэнэчулуун "Бүх төрлийн баар, спорт, урлаг соёл, шашны газрууд, цанын бааз, саун, билльяард, фитнесс, бүжиг иогын клубүүд, жуулчны бааз, дэн буудлын үйл ажиллагааг гуравдугаар сарын 30-ны өдрийг хүртэл түр зогсоохоор болсон. Энэ шийдвэрийн хүрээнд өчигдөр оройноос эхлээд цагдаа болон мэргэжлийн хяналтын байгууллагууд хамтраад мэдэгдэл хүргэж байгаа. 

 Түүнээс гадна, Улаанбаатар хотод үйл ажиллагаа явуулдаг 321 сүм, хийдийг хаах шийдвэр гарсан.  Үүнээс 80 нь буддын, христийн 189, бусад шашны 52 сүм хийд байна.  Хэрвээ эдгээр аж ахуйн нэгжүүд үйл ажиллагаа явуулбал иргэдээс мэдээлэл авч, торгоно. Цаашлаад тусгай зөвшөөрлийг нь цуцлах арга хэмжээг авна. Шинэ төрлийн коронавирус дэлхийн 38 оронд тархсан энэ эрсдэлтэй үед хорио цээрийг дагаж мөрдөхийг сануулж байна.  Хүнсний дэлгүүр, зах, худалдааны төвүүд хаагдахгүй, үйл ажиллагаа нь хэвийн үргэлжилнэ. Харин нэг удаагийн хамгаалах хэрэгслийг өмсөж, эрсдэлээс өөрсдийгөө хамгаалах хэрэгтэй байна. Цайны газар, ресторан, кафе 22:00 цаг хүртэл ажиллана" хэмээсэн юм.