Дугуй засварч Б.Алдар: Монголчууд аа,  бүгд эвтэй, найртай байж аюулт өвчний ард гарцгаая

Баасанжавын Алдар гэх залуу  өнгөрсөн ням гарагт  цахим орчимд түргэн тусламж, онцгой байдал,  цагдаагийн байгууллагын машины дугуйг үнэ төлбөргүй засаж өгөхөө мэдэгдсэн нь олон хүний анхаарлыг татаж, урмыг сэргээсэн. Монголчууд өглөгч, зовсон нэгэнд туслахад хэзээд бэлэн гэдгээ  даян дэлхийд таниулаад удаагүй байна. Тэгвэл саяханаас  урлаг соёл, спортын алдартнууд эрүүл мэндийн байгууллагад мөнгөн болон эд материалын туслалцаа үзүүлж,  хамтын хүчээр аюулт өвчнийг давж гарахыг уриалсан. Энэ уриалгын давалгаа эгэл ардын дунд ч үргэлжилж эхэллээ. Манай сурвалжлах баг Фэйсбүүкт тавьсан зар, утасны дугааараар  Б.Алдартай холбогдон Баянзүрх дүүргийн наймдугаар хороо, Улаанхуарангийн эцсийн буудалд байрлах дугуй засварын газрыг зорилоо. Улаанхуарангийн эцсийн зогсоолоос холгүй байх жижигхэн дугуй засварын гадаа “Корона” дугуй засвар гэх жижигхэн самбарын хажууд, Б.Алдар биднийг зам угтан тосов.

Ирсэн зорилгоо уламжлаад,  дугуй засварын байр руу орцгоолоо. Жижигхэн байр харанхуй ч жижиг цонхоор гадаах гудамж талбай бүгд харагдана. Энэ байрандаа өөрийн хамтрагч С.Алтанхуягтай дугуй завсар ажиллуулаад  8 сар болжээ. Тэр өмнө нь  цагдаагийн хэд хэдэн машины дугуйг үнэ хөлсийг нь авч янзалж байхдаа  “Хүний төлөө ажилладаг хүмүүс яарч, явахад техник нь эвдрээд зогсох хэцүү юм даа” гэсэн бодолтой хоцорчээ. Үүний үндсэн дээр, вирусын халдвар дэгдэх аюултай байгаа  энэ нөхцөлд  өөрийн хийж чадах зүйлээр туслах санаа төржээ. Ингээд бид хэсэгхэн хугацаанд хөөрөлдөв.

-Таны энэ санааг олон хүн дэмжсэн үү?

-Тэгэлгүй яахав. Би эхнэр, гурван хүүхдийн хамт Улаанхуаранд амьдардаг. Мэдээж гэр бүлийн хүн, хамт ажилладаг дүү маань зөвшөөрсөн. Дэлхий нийтэд коронавирусээс болж олон хүн нас барж, их хүнд байдалтай байна. Ийм байхад өөрийнхөө чадахаар тусалья гэж бодсон. Би хагас сайн өдөр энэ санаагаа сэдсэн. Тэгээд хаяг хийлгэсэн юм.  Хаягаа ням гарагт,  аваад өөрийн фэйсбүүкт зараа оруулсан.

-Зар тавьсаны дараах хүмүүсийн хандлага ямар байна вэ?

-Хүмүүс маш сайхан хүлээж авсан. Бүгд чадахаараа бие биедээ тусалж, энэ өвчний ард гарч чадвал учиртай шүү дээ. Хариу нэхээгүй тус хамгийн сайхан.

-Та бизнес эрхлэгчид болон иргэдэд уриалга хүргүүлээч?

-Нийт монголчууддаа жирийн нэгэн иргэн хүний хувьд өөрийн бодлыг хэлэхэд, бидний эрүүл мэндийн төлөө ажиллаж байгаа энэ хүмүүстээ туслаж, дэмжицгээе. Бүгд эвтэй, найртай байж,  дор бүрнээ хичээж энэ аюулт өвчний ард гарцгаая. Үр хүүхдүүдийнхээ төлөө хичээцгээе.

Биднийг ярилцаж байх зуур дугуй засварын гадаа машинууд ирсээр байлаа.  Биднийг ирэхээс хэдхэн минутын өмнө цагдаагийн нэг машин ирээд явсан байв. Б.Алдар Фэйсбүүкт зар тавьсныхаа дараа цагдаагийн 3-4 машины дугуйг үнэ төлбөргүй засаж өгчээ.  Б.Алдар болон С.Алтанхуягаас коронавирусын халдвараас хэрхэн урьдчилан сэргийлж байгаа тухай асуухад  “Ажлын байран дээрээ  маск байнга зүүж байгаа. Бид хоёр  4 ээлжийн масктай. Бүгдийн ээлжилж зүүдэг. Хорооноос манай дугуй засварын газарт үнэ төлбөргүй ариутгал сайн хийдэг. Бас маск зүүгээгүй хүмүүст үйлчлэхгүй гэдэг шаардлага тавьдаг” хэмээж байлаа.  

Дэлхийн олон оронд Коронавирусын халдвараар өвчлөгсдийн тоо өдөрт хэдэн зуугаар шинээр бүртгэгдэж байгаа энэ үед монголчууд хариуцлагатай байгаагийн нэг жишээ энэ юм. Энэ мэт олон жишээнээс дурьдвал,  хүнсний дэлгүүрүүд маскгүй хүнд үйчлэхээ больж, автобус баазын хянагчид нийтийн тээвэрт суусан хүн бүрийг ариутгагч бодисоор гараа  ариуитгаж үйчлүүлэхийг шаардаж,  дугуй засвар эрхлэгч хүртэл өөрийнхөө чадах чинээгээр нийтийн эрүүл мэндийн төлөө гараа сунгалаа.

Цаашлаад эрүүл мэндийн яаманд  өөрсдийн дарсан чацарганаа хүртэл бариад ирсэн ахмадууд ч байна. Харахад амархан, багахан тус  мэт санагдавч хамтдаа хичээсээр. Төр засаг, ард иргэд нэгдэж хамтын хүчээр вирусын халдвараас сэргийлэхийн төлөө зүтгэж байна.  Өнөөдөр л гэхэд ганцхан хүний зоригтой үйлдэл, хүчин чармайлт олон хүнд итгэл төрүүлж мэргэжлийн байгууллагуудын олон сарын хөдөлмөрийн үнэ цэнийг хэдэн мянган хүнд ойлгуулж болдог гэдгийн  тод жишээг бид харлаа.

 Т.Эрдэнэчимэг