METRO хот: Бусдыг дагаж дүрэм зөрчих биш, дүрэм зөрчиж байгаагаа хүмүүжүүл

Хорь хүрсэн болов уу  гэмээр 2 охин, 3 залуу багшийн дээдийн уулзварын гэрлэн дохионы урд  дуу шуутайхан зогсоно. Тэдэнтэй харц мөргөлдөнхөн замын эсрэг талаас харахад,  удаан уулзаагүй найзууд уулзалдсан бололтой. Ихэнх хүмүүс уулзаагүй удахаараа хаашаа ч юм яарч, байж ядацгаадаг шүү дээ. Залуучууд нь дэврүүн юм аа. Ногоон гэрэл асахыг хүлээж чадахгүй байж ядацгаана. Тэдний нэг нь “Заа гаръя, тэр улаан гэрэл асчихсан байгаа биз дээ, тэр гэрэл асахаар энүүгээр машин явахгүй” гэж улаан гэрлээр цагаан шугам руу дайрна. Нөгөө дөрөв нь гарах уу,  яах вэ гэж эргэлзэн хоёр тийшээ харцгаана.  Улаан гэрлээр хээв нэг алхаж яваа нөхөр халаасандаа гараа хийчихсэн, толгойгоороо нөгөө хэдээ дохино. Нөгөө 4 залуу найзынхаа “гуйлга”-ын харцанд бүдэрлээ. Хөтлөлцөөд улаан гэрэлтэй, цагаан шугамаар адуу шиг л пижигнэлдэн гүйлдэв.

Бас болоогүй залуучууд нь чанга инээж, 2 охин нь амаа дарсан харагдав. Ичээд байгаа бололтой. Уриалсан найзаасаа ичсэн үү, өөрсдөөсөө ичив үү мэдсэнгүй. Улаан гэрлээр гарах гэж алхах залууг биш түүнийг дагах 4 найзыг нь хараад илүү гайхсан юм. Тэдний нэг нь ч  “Улаан гэрлээр гарч болохгүй, ногоон гэрлээр гарах хэрэгтэй” гэж хэлсэнгүй. Нэг хүний үйлдлийг 4 хүн эсэргүүцэж, болиулах хүчтэй баймаар юм. Гэвч хэн ч эсэргүүцсэнгүй. Замын хөдөлгөөний дүрэм зөрчсөн найзыгаа дагаад өөрсдөө ч дүрэм зөрчинө. Залуучууд бие биенээсээ үргэлж суралцдаг. Яг л балчир хүүхдүүд ээжийнхээ хийсэн үйлдэл, үг бүрийг даган дуурайдаг шиг.

Бага насны хүүхдүүд хэн нэгнийг даган дуурайхдаа сайн, муу, аюултай, аюулгүйг нь хэзээ ч тооцоолдоггүй.  Харин гарцаар нэгнээ дагаж гүйх залуучуудын хувьд буруу, зөвийг ойлгох ухаан суусан баймаар.  Ойр дотны найз нөхөд нь  буруу зүйл хийвэл, даган дуурайхын оронд эсэргүүцэх хэрэгтэй. Өндөр хөгжилтэй орнуудын иргэд ямар ч үед,  шөнө дунд ч байсан хамаагүй, явган зорчигчид ногоон гэрлээр хөдөлгөөнд оролцдог.  Учир нь тэд соёлт хотын иргэд “Би өөрөө хэн нэгний үлгэр дуурайлал болох ёстой” гэдэгт итгэдэг байна. Яг ийм соёлыг залуус бид л одооноос түгээх хэрэгтэй. 

Т.Эрдэнэчимэг