Жинхэнэ ЖДҮ: Монгол арьсыг дэлхийд таниулахыг зорьж буй "MR Brand"

Үндэсний тэргүүлэгч www.zaluucom.mn сайт ЖДҮ эрхлэгчдийг дэмждэг "Жинхэнэ ЖДҮ" булангийнхаа энэ удаагийн дугаарт  арьсан үйлдвэрлэлийн салбарт манлайлж байгаа "MR brand"-ийг онцоллоо. "MR brand"-ийг Баасанхүүгийн Энх-Оюун хэмээх дайчин бүсгүй 2012 онд анх үүсгэн байгуулж байжээ. Орон сууцны гал тогооноосоо ганц хоёрхон оёдлын машинтайгаар эхлүүлж байсан энэхүү брэнд 8 жилийн хугацаанд гадаадын цөөнгүй оронд бараа бүтээгдэхүүнээ экспортолдог болтлоо өсөж дэвжсэн байна. Хэдийгээр дэлхий нийтээр энэхүү брэндийг мэддэг болоогүй ч гэсэн Япон, Солонгосоос авахуулаад цөөнгүй том орон руу гаргадаг учраас дэлхийд гарсан гэж зүйрлэсэн хэрэг. 

-Үндэсний үйлдвэрийн бүтээгдэхүүн гэхээр загвар хийц муутай гэх нийтлэг ойлголт байдаг. Танай брэндийн хувьд гадны ямар ч бүтээгдэхүүнээс дутахааргүй загвар хийцтэй юм байна?

-Манай компанийн загвар зохион бүтээгч туршлагатай. Социализмын үед олон үйлдвэрт ажиллаж байсан хүн байгаа. Монголчуудын дунд үндэсний үйлдвэрлэгч гэхээр бараа бүтээгдэхүүн хийж чаддаггүй, бүдүүн баараг юм хийдэг байлгүй гэдэг ойлголт ерөнхийдөө өөрчлөгдөж эхэлсэн.  Монгол арьс гэдэг маш чанартай, үнэ цэнтэй түүхий эд. Тийм түүхий эдээр чанартай сайн бүтээгдэхүүн үйлдвэрлэж байгаа. Арьсан бүтээгдэхүүний үнэ цэнийг хэрэглэж үзэж байж л мэддэг. Бидний оёдол, хийц жилээс жилд сайжирч байна. Анх хийж байсан бүтээгдэхүүнээ харвал өөрөө ч ичмээр байдаг. Одоо бол маш их туршлага сууж, харахад, хэрэглэхэд ч сайхан, чанартай бүтээгдэхүүн хийдэг болсон. 

-Бүтээгдэхүүнийхээ онцлог давуу талыг та юу гэж хэлэх вэ?

-Монгол Улс 60, 70 сая малтай. Жилдээ 10 сая малыг нядалдаг гэсэн тоо баримт бий. Тэгэхээр тэр хэмжээний түүхий эд гарна. Тэр түүхий эд хаачдаг гэж бодож байна. Ихэвчлэн хагас боловсруулаад л гадагш нь гаргадаг. Бүтэн боловсруулагдаж байгаа нь бүтээгдэхүүн болдог. Хагас боловсруулаад гаргавал хямдхан л байна. Бүтэн боловсруулвал мэдээж үнэтэй зарна. Манай компани гэхэд бүтэн боловсруулсан арьс ширийг худалдаж аваад, цүнх үйлдвэрлэдэг. Жинхэнэ үндэсний үйлдвэрлэлийг дотооддоо бий болгож байна гэсэн үг. 

Импортоор янз бүрийн арьс их орж ирдэг.  Хятадаас, Италиас, Солонгосоос арьс оруулж ирдэг. Түүгээр ч бүтээгдэхүүн үйлдвэрлэдэг газрууд байдаг.  Үйлдвэр үйлдвэрүүд өөрсдийн гэсэн онцлогтой. Монгол арьсаараа ч бүтээгдэхүүн үйлдвэрлэдэг компаниуд ч бий. Манай үйлдвэр байгуулагдсан цагаасаа эхлээд өнөөдрийг хүртэл байнга Монголд боловсруулсан арьсаар бүтээгдэхүүнээ үйлдвэрлэж ирсэн. Монгол арьсаар бүтээгдэхүүн хийж үзээд, болох болохгүйг нь боловсруулах үйлдвэрүүдтэйгээ яриад, засах юм байвал засаад өнөөдрийг хүртэл зүтгэж байна. Монгол арьсаар бүтээгдэхүүн үйлдвэрлэдэг гэж онцлогоо яриад байгаа нь ийм учиртай. Манайхаас худалдан авалт хийж байгаа хүмүүс хөдөө бэлчиж байгаа монгол үхэр, сарлаг, малын арьс, ширээр хийсэн бүтээгдэхүүнийг л хэрэглэж байна гэсэн үг.