Монгол Улсын Ерөнхийлөгч Х.Баттулга өнгөрсөн мягмар гарагт сонгуулийг хойшлуулах уриалга гаргасан. Энэхүү уриалгыг иргэд хэрхэн хүлээн авч байгаа талаарх байр суурийг нь сонслоо.
Б.Батсайхан: Сонгуулийг хойшлуулж болохгүй
Сүхбаатар дүүргийн иргэн
-УИХ-ын гишүүдийн тангараг өргөсөн хугацаа дуусахад гишүүд ямарч үйл ажиллагаа явуулах эрхгүй болно. Улсын их хурал тарна гэсэн үг. Сонгуулийг хойшлуулж болохгүй. Хөл хорио энэ мэтээр сунгагдсаар байвал 2020 оны сонгуулийг цахимаар авна гэж байсан. Энэ бол хамгийн том аюул. Орос, Монголын сайн хакерууд их байгаа. Тэд иргэдийн саналыг хакертчихвал тэр сонгууль тэгээд л дууслаа гэсэн үг. Энийг юм мэддэг, боловсролтой хүн шууд ойлгоно. Зургадугаар сард цахимаар сонгууль өглөө гэхэд нэг нам хакердаад л бүх саналыг авчихна, тэр ойлгомжтой. Иргэд өөрсдийн гарын үсэг, тамга тэмдэгтэй цаасаар сонголтоо баталгаажуулж, саналаа өгөхгүй бол ямарч үр дүнгүй. Хэрвээ сонгууль хийхгүйд хүрвэл олон хууль өөрчлөх хэрэг гарах болов уу. УИХ-ын гишүүдийн бүрэн эрхийг 1 жилээр улираах гэдэг хуулийн заалт огт байхгүй. Би өөрөө нам бус хүн. Монголчуудын нэг занг маш их гайхдаг. Хэнч байсан төрийн албанд орчихвол идэж ууж, хөрөнгөжих ёстой гэсэн бодол ухамсарт нь суучихсан. Сонгууль дөхөөд ирэхээр бүгд элдэв асуудалд орооцолддог. Уг нь манай Ерөнхийлөгч ингэх шаардлагагүй юм. Сонгуулийг далимдуулж намуудын шоунд оролцож эхлэвэл нэр хүнд нь унана шүү дээ.
А.Ганболд: Ерөнхийлөгчийн уриалгыг дэмжиж байна
Налайх дүүргийн иргэн
-Ерөнхийлөгчийн гаргасан уриалгыг дэмжиж байгаа. Учир нь сонгуулиар хэчнээн хүн уур уцаараа барж, хэчнээн хүн талцах уу. Сонгуулийг нэг жилээр хойшлуулж болно. Нэгдүгээрт, дэлхий нийтэд дэгдээд байгаа цар тахлыг давах хэрэгтэй шүү дээ. Сонгууль хийх нэрийдлээр хоорондоо талцаж, ямарч үр ашиггүй мөнгө үрэхийн оронд хойшлуулбал монголчуудад ашигтай. Ерөнхийлөгч, Ерөнхий сайд, Улаанбаатар хотын Засаг дарга, УИХ-ын дарга нар зангидсан гар шиг эвтэй ажиллаж байна. Энэ нөхцөлд эрх баригчдыг үргэлжлүүлж ажиллуулмаар санагддаг. Энэ миний л бодол. Өөр хүмүүс юу бодож байгааг би мэдэхгүй. Магадгүй Ерөнхийлөгч энэ цар тахал дэгдсэн үед монголчуудыг эвтэй байж, олон нам болж талцахгүй байлгахын тулд сонгуулийг хойшлуулах шийдвэр гаргасан байх
Я.Төрмөнх: Вирусийн тархалт намжсаны дараа сонгуулиа хийсэн дээр
Баянгол дүүргийн иргэн
-Коронавирусийн тархалт хэзээ намдахыг хэн ч мэдэхгүй байхад сонгуулийг хойшлуулсан нь зүгээр байх. Миний бодлоор 2020 он сонголтын жил болох гэж байх шиг байна. Би тэтгэвэрт гарахаасаа 20 жилийн өмнө 1990 онд Ардчиллыг сонгох нь зөв гэж дугарч явсан хүмүүсийн нэг. Харин одоо ардчилалд итгэл алдаад байна. Тэгэхээр дараагийн сонголт байх хэрэгтэй гэж боддог. Энэ вирусийн тархалт намжсаны дараа сонгууль зохион байгуулсан нь дээр. Вирусийн тархалт намдаж, хэзээ хэвийн амьдрал үргэлжлэхийг мэдэхгүй. Тиймээс нэг жилийн дараа сонгууль явуулбал өөр хүмүүсийн ашиг сонирхол давхцаж байх шиг байна. Жишээлбэл, сонгуулийн хуулийг зөрчиж 4 жил байсан нь одоо 5 жил болгох нь дээ.
У.Намнандорж: Сонгууль хойшлуулахыг дэмжиж байна
Дундговь аймгийн иргэн
-Шинэ төрлийн коронавирусийн халдвар хүн бүрийн санааг зовоож байна. Улс орны хувьд ч мөн эдийн засгийн хүндрэлүүд үүсэж байгаа. Тиймээс сонгуулийг нэг жил хойшлуулбал өвчнөөс сэргийлж, сонгуульд зарцуулах зардлыг ч хэмнэх байх.
Д.Билгээ: Сонгуулийг хойшлуулах нь зөв
Баянзүрх дүүргийн иргэн
-Өвчинтэй холбоотой цаг үеийн байдал хэцүү байх шиг байна. Цаг үеийн асуудлууд гэхээр ард иргэдийн орлого багассан, үүнийгээ дагаад эдийн засгийн хүндрэлтэй асуудлууд тулгамдаж байгаа нь олон хүний санааг зовоож байгаа байх. Тийм учраас сонгуулийг хойшлуулах нь зөв гэж бодож байна.
Б.Болор-Эрдэнэ: Ерөнхийлөгч зөв уриалга гаргасан
Сүхбаатар дүүргийн иргэн
-Ерөнхийлөгчийг улс орондоо хэрэгтэй уриалга гаргасан гэж бодож байна. Коронавирусээс болж эдийн засгийн хямрал гээд өөр асуудлууд үүсэж байгаа байх. Нарийн асуудлуудыг сайн мэдэхгүй байна.
Т.Эрдэнэчимэг
Сэтгэгдэл бичих