"Гадаад оюутнуудыг нутаг буцаах уу, Турк улсад байлгасаар байх уу гэдэг нь одоо болтол тодорхойгүй байна"

Коронавирусийн дэгдэлтээс болж дэлхийн олон улсад онц байдал зарлаад удаж байна. Тэгвэл Бүгд Найрамдах Турк улсад суралцдаг оюутнуудын  нөхцөл байдал ямар байгаа талаар Эрзурум хот дахь АТАТҮРК Их сургуулийн магистрант Ц.Улаанаатай онлайнаар холбогдож ярилцлаа.

-Турк улсад нөхцөл байдал ямар байна вэ?

-Турк улсад хоёрдугаар сарын 11-нд коронавирусийн анхны тохиолдол бүртгэгдсэн. Монголтой адилхан Европын орноос зөөвөрлөгдөж орж ирсэн. Халдвар илэрсний маргааш давтан шинжилгээгээр 47 хүнд коронавирус илэрсэн. Үүний дараа их, дээд сургууль, ерөнхий боловсролын сургуулийн сурагчдыг гуравдугаар сарыг дуустал амраахаар болсон. Энэ хугацаанд бүх хичээл, сургалтыг зайн хэлбэрээр явуулсан. Харин өнгөрсөн долоо хоногт зайн сургалтыг дахин сунгаж,  хаврын семистрийн хичээлийг цахимаар орохоор болсон.  

-Өөрийн тань амьдардаг хотод хэчнээн монгол оюутан байдаг вэ. Гадаад оюутнууд хичээлдээ хэрхэн хамрагдаж байгаа вэ?

-Туркэд хувиараа болон Засгийн газрын тэтгэлгээр суралцдаг хэдэн мянган оюутан байдаг. Энд суралцдаг оюутнуудын ихэнх нь улсын болон хувийн дотуур байранд амьдардаг. Тусгаарлалтын үед улсын дотуур байранд амьдардаг гадаад оюутнуудыг хот болгонд нэг дотуур байранд нэгтгэж оруулсан.  Турк оюутнуудыг бүгдийг нь  гэр гэрт нь буцаасан.  

Турк улсын оюутны байр эрэгтэй, эмэгтэйгээрээ тус тусдаа.  Манай Эрзурум хотод эрэгтэй 5, эмэгтэй 2 оюутан дотуур байранд  амьдарч байгаа. Мөн нэг эрэгтэй оюутан байр хөлсөлж амьдарч байна. Дотуур байранд байгаа оюутнуудыг гадагшаа гарахыг нь хориглосон байгаа.

-Турк дэх монгол оюутнуудтай Консулын газраас хэр холбоотой байна вэ. Коронавирустэй холбоотой мэдээллийг цаг алдалгүй авч чадаж байгаа юу?

-Монголын Консулын газрын фэйсбүүк хуудсаар дамжуулж, коронавирустэй холбоотой мэдээллийг байнга авдаг. Тэгэхдээ Турк улсад суугаа Элчин сайд, Гадаад хэргийн яам, Ерөнхий консулын газраас цаашид монголчуудад ямар арга хэмжээ авах нь тодорхойгүй байгаа. Энд сурч байгаа монгол оюутнуудыг цаашид яг  яах гэж байгаа нь тодорхой биш  байна. Энэ талаар тодорхой мэдээлэл одоог хүртэл аваагүй. Энд өөрсдийн улс руугаа явах хүсэлтэй маш олон оюутан байгаа. Гэвч гадаад оюутнуудыг нутаг буцаах уу, Турк улсад байлгасаар байх уу гэдгийг мэдэхгүй учраас хэцүү байна.

Эрзурум хотод сурдаг монгол оюутнууд Ерөнхий Консулын  газартай холбоо тогтоож чаддаггүй. Харин томоохон хотуудын оюутнууд Монгол оюутнуудын холбоо бусад байгууллагуудаар дамжуулж холбогддог байх. Монгол оюутнуудын санааг зовоож байгаа нэг асуудал бол Туркийн телевизүүдээр өдөр болгон Коронавирусийн талаар мэдээлэл хийхдээ халдвараар өвчилсөн, нас барсан, эдгэрсэн хүний тоог л хэлдэг. Гэвч  эдгээр хүмүүс нь яг аль хотод байна вэ гэх зэргээр тодорхой мэдээлэхгүй байгаа. Монголын Элчин болон Консулын газраас энэ тал дээр анхаараасай,  үнэн зөв бодит мэдээллийг цаг тухайд нь дамжуулаасай гэж хүсэж байна.

 -Коронавирусээс сэргийлэхийн тулд ямар арга хэмжээ авч байна вэ?

 -Сургалтын үйл ажиллагаа явуулахыг бүх нийтээр хориглосон ч томоохон үйлдвэр, худалдааны төвүүдийн үйл ажиллагаа хэвийн үргэлжилж байгаа. Харин олон хүн цугладаг үйлчилгээний газруудыг хаасан. Орон нутгийн замын Зорчих хөдөлгөөнийг гуравдугаар сарын 29-ийг хүртэл хэвийн явуулж байсан. Харин гуравдугаар сарын 29-өөс хойш оршин суугаа хотоосоо өөр тийшээ явах бол хотын даргаас заавал зөвшөөрөл авах ёстой болсон.

-Дэлхийн олон оронд Ази хүмүүсийг гадуурхах үзэгдэл их болсон хэмээн мэдээллийн хэрэгслүүдээр  дамжуулж байна. Турк улсад монгол оюутнуудыг гадуурхах тохиолдол гарч байна уу?

-Коронавирусийн анхны тохиолдол Турк улсад илэрснээс хойш дотуур байрандаа тусгаарлагдсан учраас гадуурхах, дээрэлхэх зүйл үүсээгүй.  Харин  хүн ам ихтэй Истанбул, Анкара, Измир зэрэг хотуудад  гадуурхах, доромжлох тохиолдлууд  үүсэж байгаа гэж сонссон.

Т.Эрдэнэчимэг