АН-ын зөвлөлөөс цаг үеийн асуудлаар мэдээлэл хийлээ. АН-ын зөвлөлийн дарга Д.Эрдэнэбат "АН-аас коронавирусийн гамшгаас урьдчилан сэргийлэх тогтоолын төсөл боловсруулж, УИХ-д өргөн мэдүүлэхээр шийдвэрлэсэн. Энэ талаар хэлэлцүүлэг зохион байгуулж, бизнес эрхлэгч, МХАҮТ, ард иргэдийн саналыг авч гаргасан. Ингээд дөрвөн хэсэг бичиг баримт гаргахаар төлөвлөсөн.
Бодлогын бичиг баримтаа бэлэн болгож, АН-ын зөвлөлийн гишүүд УИХ-д тогтоолын төслөө өргөн барих гэсэн боловч УИХ-ын дарга хүлээн авахаас татгалзсан. Тиймээс өнөөдөр дахин өргөн барих хүсэлтээ УИХ-д өргөн барина. Хэрвээ хүлээж авахгүй бол УИХ-д, Байнгын хороонд хөндлөнгийн санал болгож оруулах бодолтой байна.
Монголын эдийн засгийн уналт 5-6 хувь руу буух байдал ажиглагдаж байна. Хөл хорионоос хойшхи гурван сарын хугацаанд ард иргэдийн нөхцөл байдал ямар байгаа, уул уурхайн нөхцөл байдлын экспорт ямар байгааг бодит мэдээлмээр байна. Тогтоолын төсөлд нийт 5 багц 38 арга хэмжээ тусгагдсан. Хамгийн гол нь төсөвд тодотгол хийх зайлшгүй шаардлагатай.
Төслөөс дурдвал,
- Төсвөөс Хөдөлмөр эрхлэлтийг дэмжих сан болон нийгмийн даатгалын сангийн ажилгүйдлийн тэтгэмж олгох асуудлыг санхүүжүүлж Короновирусын гамшгаас үүдэлтэй ажилгүй болсон иргэдэд гамшгийн хор хөнөөл арилах хүртэл хөдөлмөрийн хөлсний доод хэмжээг 3 сараар тооцож нийт 1.260.000 төгрөгийг ажилгүйдлийн тэтгэмж авах хуулийн хугацаа дууссан өдрөөс эхэлж олгох,
- Ажлын байрыг хэвээр хадгалсан аж ахуйн нэгжүүдэд Хөгжлийн банк болон Төрийн банкаар дамжуулан жилийн 3 хувийн хүүтэй санхүүжилт олгох;
- Ипотекийн зээл /хүү болон үндсэн төлбөр/-ийг 12 сарын хугацаанд царцааж, мөнхүү хугацаагаар зээлийн эргэн төлөлтийг сунгах;
- 0-18 хүртэлх насны хүүхдэд сар бүр олгодог 20 мянган төгрөг дээр 10 мянган төгрөг нэмж, 6 сарын хугацаатай олгох.
- Түрээсийн орон сууцны цогц хөтөлбөрийг хэрэгжүүлэх, үүний хүрээнд уг хөтөлбөрт хамрагдсан барилгын компаниудын зээлийн эргэн төлөлтийг хойшлуулах, хүү, алдангийг бууруулахад чиглэсэн эх үүсвэрийг арилжааны банкуудад олгох;
- Төрийн орон сууцны корпорацийн Түрээсийн орон сууцны хөтөлбөрт хамрагдаж түрээсийн байранд амьдарч байгаа иргэд, айл өрхийн түрээсийн төлбөрийг 3 сараар чөлөөлөх гэх мэт.
Б.Аз