ЭМЯ-аас өдөр бүр хийдэг мэдээллээ сэтгүүлчдэд, иргэдэд өглөө.
Хурлын эхэнд ЭМЯ-ны Тандалт судалгааны албаны дарга Д.Нарангэрэл "Өчигдөр та бүхэнд мэдээлэл өгснөөс хойш 24 цагийн дотор дэлхийн 208 оронд өвчлөл бүртгэгдлээ. Арлын орнуудад өвчлөл тархаж эхэллээ. Манай улсад вирусийн халдвар авсан 14 хүн бүртгэгдсэн. Одоо 12 ХӨСҮТ-д хүн эмчлүүлж байна. Өчигдрийн Токио-Улаанбаатар чиглэлийн онгоцоор ирсэн 275 ирсэн. Түүнээс хоёр сэжигтэй тохиолдлыг ХӨСҮТ-д тусгаарласан. Бусад хүмүүсийг тусгаарлалтад оруулсан. 6800 ачаа тээшийг ариутгасан" хэмээлээ.
ДЭМБ-ын ажилтан О.Ариунтуяа "Европ, Америк цар тахлын голомт болж, өргөн хүрээтэй тархаж байна. Хамгийн их өвчлөлтэй оронд АНУ, Итали, Испани, Франц орж байна. Сүүлийн 24 цагийн дотор өвчлөл АНУ-д 12, Испани, Франц, Германд 8, Италид 4 хувиар нэмэгдлээ. Хятад улс гуравдугаар сард 35 мянган иргэнээ үүргийн онгоцоор авчирсан байна. Филиппиний нийслэл Манила хотод халдвар тархаж байгаа. Чухам ямар замаар халдаж байгаа нь тодорхой биш байна. ДЭМБ-аас хамгийн эрсдэлтэй бүлэгт тооцогдож байгаа эрүүл мэндийн ажилтнуудыг хамгаалах нь чухал байгааг сануулсааэр байна" хэмээлээ.
ЭМЯ-ны Гадаад харилцааны хэлтсийн дарга Б.Янжмаа "АНУ-д халдварын голомт болоод байгаа Нью-Йорк хотод өвчлөл, нас баралт эрчимтэй нэмэгдэж байна. Пүрэв гарагаас баасан гарагт шилжих 24 цагт тус хотод 6500 орчим шинэ тохиолдол, 105 нас баралт бүртгэгдэж, нийт халдвар авсан хүний тоо 56 мянга давсан. Муж улсын хэмжээнд халдвар авсан хүний тоо 100 мянга давсан. Тиймээс тус муж улсад эмнэлгийн шаардлагатай тоног төхөөрөмжийг ихээр олгож эхэлжээ. Нью-Йорк хотын эмнэлгийнхний хэлж буйгаар өвчлөл бүх насныхан дунд байгаа. Өчвтөнүүд амьсгалын дутагдалд орж нас барж байгаа учраас амьсгалын аппарат дутагдаж эхэлсэн байна. АНУ-ын Ерөнхийлөгч баасан гарагт мэдээлэл хийхдээ иргэд даавуун маск зүүх зөвлөмж гарсныг хэлсэн.
Европ тивд Испани, Итали, Франц улсад халдварын тохиолдол нэмэгдсээр байна. Франц улсад 24 цагийн дотор халдварын тоо 5000 гаруйгаар нэмэгдсэн. Нийт халдварын тохиолдол 64 мянга давсан. БНХАУ-ын хувьд шинж тэмдэггүй халдварын тохиолдол 60-ыг бүртгэсэн талаараа мэдэгдсэн байна" хэмээлээ.
ХӨСҮТ-ийн захирал Д.Нямхүү "Токио-Улаанбаатар чиглэлийн үүргийн онгоцоор 275 хүн ирсэн. Үүнээс 64-ыг нь ХӨСҮТ-д тусгаарласан. Цэргийн төв эмнэлэг, Жаргалант сувилал, "Токио Инн" зочид буудалд бусад хүмүүсийг тусгаарлаад байна. "Токио Инн" зочид буудалд 185 хүнийг буулгасан. Сөүл-Улаанбаатар, Токио-Улаанбаатарын онгоцоор ирсэн нийт 104 хүнийг ХӨСҮТ-д тусгаарласан. Сөүл-Улаанбаатар чиглэлийн онгоцоор ирсэн 37 хүнээс коронавирус илрээгүй.
Мөн тандалтын зорилгоор хүмүүсээс шинжилгээ авч байгаа. Энэ бол тандалт, хяналт шүү. 27 хүнээс шинжилгээ авсан, коронавирус илрээгүй. "Амар" зочид буудалд байгаа 107 хүнээс шинжилгээ авна. Даваа гарагаас хариу нь гарна. Өвчилсөн 12 хүний биеийн байдал харьцангуй сайн байгаа. Ийм сайн мэдээ байна. Манай эмчилгээний тактик зөв байна гэж бид дүгнэж байгаа. Бид өвчтөнүүддээ компьютер хяналт хийхээр хүлээж байна. Түүний дараа эмчилгээний үр дүнг дахин ярих боломжтой. Токиогийн онгоцоор ирсэн хоёр сэжигтэй тохиолдлын хариу маргааш гарна. Өнөө оройдоо гэсэн үг. Маргааш бид мэдээлнэ. Лаборатори 24 цагийн турш ээлжээр тасралтгүй ажиллаж байгаа" хэмээлээ.