Д.Нямхүү: ХӨСҮТ-д хянагдаж байсан Турк иргэнээс коронавирусийн халдвар илэрч, батлагдсан тохиолдол 15 боллоо

Эрүүл мэндийн яамнаас ээлжит мэдээллээ хийв. ЭМЯ-ны Тандалт судалгааны албаны дарга Д.Нарангэрэл "Өчигдөр мэдээлэл хийснээс хойш 24 цагийн дотор дэлхийн 211 оронд коронавирусийн халдвар бүртгэгдсэн байна. Өнөөдрийн байдлаар дэлхий дахинд 1.272.860 сая гаруй иргэн халдвар авч, 69424 мянга гаруй иргэн нас барсан байна. АНУ, Итали, Иран, Испани, Франц, Турк, Азийн орнуудаас Японд халдвар хурдтай тархаж байна. Япон улсын 47 мужаас 44-т нь коронавирусийн халдвар тархжээ. Сингапурт гадаадын ажилчид байдаг хоёр дотуур байранд 100 тохиолдол бүртгэгдэж, үүний улмаас 20 мянга гаруй хүн 14 хоногийн хөл хорионд орсон байна. 

Өнөөдрийн байдлаар ажиглалтад 2075 хүн байна. Эдгээр хүмүүсийн биеийн байдал хэвийн. 21 хоногтой нэг хүүхэд халуурч, эмнэлгийн тусламж үйлчилгээ авсан. Эрчимд эмчилгээний тасагт 211 хүн хэвтэн эмчлүүлж байна. 

Шинж тэмдэггүй өвчтөнүүдээс өвчлөл тарах магадлал маш өндөр байна. Жишээ нь, гэрийн тэжээвэр иргэдэд халдвар тархсан байна. ДЭМБ болон барууны орнууд амны хаалтны хэрэглээний зөвлөмжөө шинэчлэж гаргасан байгаа. Бүх хүн амны хаалт хэрэглэх, гэрээрээ, гараараа оёсон амны хаалт хэрэглэж болно" гэв.

ДЭМБ "Өнгөрсөн ням гарагт Франц, Испани, Итали улсуудад нас баралт буурчээ. Итали улсын хувьд тус улсын "Иргэнийг хамгаалах газар"-аас мэдээлснээр 525 нас баралт бүртгэгдсэн нь гуравдугаар сарын 19-ны өдрөөс хойшхи хамгийн цөөн нас баралт болсон байна. Испани улсын хувьд сүүлийн гурван өдөр дараалан нас баралт буурсан талаар тус улсын Эрүүл мэндийн яамнаас мэдээллээ. Шинэ халдварын тохиолдол 4.8 хувиар нэмэгдэж, нийт халдварын тохиолдлын тоо 130 мянга гарсан байна.

ОХУ-ын хувьд шинэ халдварын тоо 658-р нэмэгдэж, нийт халдвар авсан хүний тоо 5389 болжээ. Өвчтөнүүдийн талаас илүү хувь нь 45-с доош насны хүмүүс байгаа бөгөөд Буриад, Эрхүү муж улсад халдварын шинэ тохиолдлууд бүртгэгдсэн байна.

Халдвар нэмэгдэж байгаатай холбогдуулан Токио хотын захиргаанаас мэдээлэл хийхдээ мягмар гаригаас хөнгөн өвчтөнүүдийг зочид буудалд шилжүүлэх замаар эмнэлэг болон эмчийн үйлчилгээг хүнд өвчтэй иргэд рүү чиглүүлэх юм байна. Тархвар зүйн хувьд зам мөрийг тодорхойлох боломжгүй халдварууд нэмэгдэж байгаа тул зайлшгүй тохиолдолд гэрээс гарахгүй байхыг анхааруулсаар байна" гэв. 

ХӨСҮТ-ийн дарга Д.Нямхүү "Дөрөвдүгээр сарын 5-нд ХӨСҮТ-д болон улс орон даяар сэжигтэй тохиолдол тусгаарлагдаагүй. Дархан-Уул аймагт тусгаарлагдсан гурван иргэнээс коронавирусийн халдвар илрээгүй. ХӨСҮТ-д тусгаарлагдан хянагдаж байсан Турк иргэний шинжилгээнд коронавирусийн халдвар илэрлээ. Нийт батлагдсан тохиолдол 15 болж, үүнээс 13 нь ХӨСҮТ-д эмчлэгдэж байна. Өнөөдрийн байдлаар ХӨСҮТ-д 248 хүн байна. 

Токио-Улаанбаатар чиглэлийн онгоцоор ирсэн 284 хүнээс өнөөдөр шинжилгээ авахаар төлөвлөөд байна" гэлээ. 

Ингээд сэтгүүлчдийн сонирхсон асуултад хариуллаа. 

-Коронавирус илэрсэн Турк иргэний тухай мэдээлэл өгөөч? 

-Батлагдсан 15 дахь тохиолдлын тухайд 13, 14 дэх тохиолдолтой хавьтал байсан иргэн байгаа. Үлдсэн хавьтлуудыг хяналтдаа авсан. 12 иргэн бий. Шинжилгээний хариу сөрөг гарсан. Шинж тэмдэггүй хэлбэрээр илэрсэн. 

-Тусгаарлагдаад гарсан иргэн ээждээ утсаа үлдээгээд гадуур явсан мэдээлэл гараад байгаа. Үүнд тайлбар өгөөч? 

-НЭМГ-аас ийм мэдээлэл гарсан байсан. Зөрчлийн тухай хууль, Гамшгийн тухай хууль, Эрүүл мэндийн тухай хуулиар арга хэмжээ авна. 

Б.Аз