“Covid-19” вирусийн дэгдэлтээс аж ахуй нэгжүүдийн хэвийн үйл ажиллагаа доголдож, иргэдийн орлого буурч эхэлсэн. Банкны зээлээ төлөх чадамжгүй болсон иргэд ч цөөнгүй байгаа. Үүнтэй холбогдуулан гуравдугаар сарын 18-нд хэрэглээний зээлийн хугацааг 3 сараар сунгах шийдвэр Засгийн газраас гаргасан. Улмаар уг хугацааг 12 сар болгож сунгасан юм. Харин арилжааны банкууд энэ шийдвэрийг мөрдөж, иргэдийн зээлийн хугацааг сунгаж байгаа эсэх талаар иргэдийн байр суурийг сонслоо.
Л.Батсүрэн: Засгийн газрын шийдвэрийг бүх банк мөрдөх ёстой биз дээ
Баянзүрх дүүргийн иргэн
-Засгийн газрын шийдвэрийг бүх банк дагаж, мөрдөх хэрэгтэй. Гэтэл засгийн газрын эрх мэдэл зарим байгууллагын босгыг давж чадахгүй байх шиг харагдах юм. Засгийн газрын тогтоол, захирамжийг биелүүлэхгүй газрууд олон байна шүү дээ. Зарим арилжааны банкнууд зээлийн хүүгээ төлөөд, үндсэн мөнгөө дараа төлөх боломжтойг сануулж байсан. Засгийн газраас гаргасан шийдвэр маш зөв. Гэтэл арилжааны банкууд энэ шийдвэрийг биелүүлэхгүй байх нь ард иргэдэд хэцүү байна. Зээлийнхээ хугацааг сунгуулах гээд очихоор маш олон шаардлага тавьдаг. Бүх нийтээрээ санхүүгийн хямралд орчихоод байхад 2-3 сар зээлийн төлөлтийн хугацааг хойшлуулбал олон хүн баярлана даа. Зээлийн хугацаа сунгах нь зээлийг бүрэн чөлөөллөө гэсэн үг биш. Буцааж төлөх нь үнэн. Ганцхан Монгол биш дэлхий нийт хямарч байна шүү дээ.
Ж.Жанцандулам: Хэн нь худлаа яриад байгааг мэдэх арга алга
Баянгол дүүргийн иргэн
-Зарим банк зээлийн хугацаагаа сунгахгүй байгаа гэж дуулсан. Миний хувьд хувийн банк санхүүгийн байгууллагуудын талаар ойлголт муутай байдаг. Энэ арилжааны банкууд яагаад улсынх байж болдоггүй юм бэ. Төрийн бодлогоор банк, санхүүг хариуцахгүй бол хувийн хэвшлийн банкуудад засгийн газрын шийдвэр үйлчлэхгүй байна. Зарим банкинд очоод “зээлийн хугацаа сунгаж байна уу” гээд асуухаар манайд мэдэгдэл ирээгүй, мэдэхгүй гээд буцаана. Эдний яг хэн нь худлаа яриад байгааг мэдэх арга алга. Ард иргэдийг ингэж хуурах хэрэггүй шүү дээ. Хувийн хэвшлийн банкуудыг төр мэдэлдээ авах хэрэгтэй. Бүгд л гадаадын хөрөнгө оруулалттай гэх юм. Гадаадын хөрөнгө оруулалттай санхүүгийн байгууллагуудад төр хэрхэн анхаардаг бол гэж олон жил гайхаж явлаа. Хөл хорио тогтоосонтой холбоотой ард иргэд санхүүгийн хямралд ороод байна. Бүх банк зээлийн хугацааг 6 сар хойшлуулаад өгч болдоггүй юм уу. Зээлтэй хүмүүст хэцүү байна шүү дээ. Зээлээ төлөх нь битгий хэл өөрсдөө ч хоол ундаа залгуулж чадахгүй байдалд орсон олон хүн байна.
Т.Алтанбилэг: Би зээлийн хугацаагаа сунгуулсан
Баянзүрх дүүргийн иргэн
-Хаан банк зээлийн хугацаагаа сунгаж байна. Би зээлээ 3 сарын хугацаатай хойшлуулах гээд бичиг баримтаа бүрдүүлээд явж байна. Банкинд саяхан очиж уулзсан, нотариатаар бичиг баримтаа дахиж баталгаажуулаад ир гэсэн. Зээл авдаг шигээ бүх бичиг баримтаа баталгаажуулаад, үл хөдлөх хөрөнгөөр ороод, өөр дээрээ шилжүүлчихэд зээлийн хугацаагаа сунгаж болж байна. Би хилийн ойролцоо бизнес эрхэлдэг хүн. Нэгдүгээр сард хил хаасан учраас миний ажил бүрэн зогссон. Тийм болохоор миний хүсэлтийг хурдан хүлээж авах шиг боллоо. Зээлийн хугацаагаа сунгахад олон материал шаардахгүй байна. Миний өргөдлийг хүлээн авч, эрхэлдэг бизнесийг маань зогссон эсэхийг судалж үзлээ.
Ц.Энхтулга: Тодорхой мэдээлэлгүй байна
Хан-Уул дүүргийн иргэн
-Зээлийн хугацаа сунгах асуудлын талаар сайн мэдэхгүй байна. Би банк санхүүгийн газраар энэ асуудлыг хөөцөлдөж яваагүй учраас мэдээлэл алга. Телевизийн мэдээгээр зарим банкнууд зээлийн хугацааг сунгахгүй байгаа гэж ярьж байхыг сонссон.
Г.Оюунцэцэг: Цалингийн зээлээ төлөөд, гар дээрээ 60-70 мянган төгрөгтэй үлддэг
Бага хангай дүүргийн иргэн
-Улс орны эдийн засаг, санхүүгийн байдал хямарч, хүндрэлтэй байхад арилжааны бүх банкууд зээлийн хугацаагаа 3 сараар хойшлуулж болдоггүй юм болов уу. Коронавирус гараад олон айл өрх санхүүгийн хувьд хямарч байна. Жишээлбэл, манай 2 хүүхэд цалингийн зээлтэй. Цалингаа гар дээрээ авч чадахгүй албан байгууллагадаа буцааж өгдөг. Хүнээс авсан юм хойно буцааж өгөлгүй яахав. Ингээд сар бүр зээлээ төлөөд, гар дээрээ 60-70 мянган төгрөгтэй л үлддэг. Бүтэн сарын хэрэглээ 60-70 мянган төгрөгт багтах хэцүү шүү дээ. Бодит байдал иймэрхүү л байна. Зөвхөн банк гэлтгүй цалингийн зээл олгосон компаниуд зээлийн асуудалд уян хатан хандвал сайнсан.
Ц.Оюунгэрэл: Зээлийн хугацаа сунгагдаж, ломбардны хүүг чөлөөлсөн байсан
Сонгинохайрхан дүүргийн иргэн
-Манайх ХААН банканд зээлтэй. Зээлээ дөрөвдүгээр сарын 3-нд төлдөг байсан. Харин энэ сарын зээлийн хугацааг хойшлуулсан байна билээ. Одоо дараа сарын 3-нд бас хойшлуулах эсэхийг тодруулмаар байна. Зээлээ хугацаанд нь төлчихөөр авсан цалин бусад хэрэглээнд хүрдэггүй байлаа. Зөвхөн банкнаас гадна зарим ломбардууд зээлийн хугацааг сунгахаас гадна хүүг чөлөөлж байна. Би “Сайн” ломбардад бөгжөө барьцаалж, зээл авсан. Өнөөдөр /2020.04.16/ сунгуулах гээд очлоо. Гэтэл надаас зээлийн хүү аваагүй. Зээлээ төлөх хугацаа 2 сараар хэтэрсэн байсан ч ломбардны хүмүүс санхүүгийн хүндрэлийг ойлгож уян хатан хандсан. Намайг “мөнгөтэй үедээ ирээд аваарай, таны эд зүйлийг хураахгүй” гэж хэлсэн. Зээлийн мэргэжилтэн ингэж хэлэхэд нь маш их баярласан.
Т.Эрдэнэчимэг
2 сэтгэгдэлСэтгэгдэл бичих
ГАДААДЫН БАНК ОРУУЛААЧ
чи оруулчаач...банкууд оруулж ирэх үгүйг шийддэггүй юм... зээлийн хүүг хаанаас үүсээд байгааг ч мэдэхгүй матрын нулимстай гишүүд чинь оруулж ирэхгүй байгаамшдээ...