М.Оюунчимэг: Би болон надтай хамаарал бүхий этгээд ЖДҮХС-гаас зээл аваагүй гэсэн баримт нь байна, мөн Л.Энх-Амгалан гишүүн "нэр андуурч хэлсэн" гээд уучлалт гуйсан

УИХ-ын гишүүн, Өргөдлийн байнгын хорооны дарга М.Оюунчимэг хэвлэлд өгсөн ярилцлагадаа ЖДҮ-г хөгжүүлэх сангаас зээл авсан эсэх болон өөртэй холбоотой зарим мэдээллүүдэд албан ёсны хариулт өгчээ. 

- Сонгууль дөхөж байгаа энэ үед улс төрчдийг эрх барьж байгаа МАН-ын зарим гишүүдийг харлуулах явдал газар авч эхэллээ. Тухайлбал ЖДҮ-ийн асуудал байна. Та энэ сангаас зээл авсан юм уу?

-Би болон миний хамаарал бүхий этгээдүүд зээл аваагүй. Хамааралгүй этгээдэд ч зээл зуучилж өгөөгүй. Би зээл аваагүй гэж хэлэх нэг хэрэг. Гол нь үүнийг баримтаар няцаах учиртай. Жижиг, дунд үйлдвэрийг хөгжүүлэх санд би албан бичиг явуулсан. М.Оюунчимэг гэдэг хүн, хамаарал бүхий этгээд нь ЖДҮ-ийг дэмжих сангаас зээл авсан уу, хэн нэгэнд зээл авахад нөлөөлсөн үү гэдэг лавлагааг ирүүлнэ үү гэж. Тус Сангийн захирлын үүргийг түр орлон гүйцэтгэгч Б.Батцэцэгийн гарын үсэгтэй миний нэр дээр 2019 оны дөрөвдүгээр сарын 05-ны өдөр ирүүлсэн албан бичигт “Жижиг, дунд үйлдвэрийг хөгжүүлэх санг 2016 онд Хүнс хөдөө аж ахуй, хөнгөн үйлдвэрийн яаманд шилжиж ирснээс хойших хугацаанд тус сангаас М.Оюунчимэг нэрээр ямар нэгэн зээл олгоогүй, хамаарал бүхий этгээдтэй холбоотой болон зээлийн шийдвэр гаргалтад нөлөөлсөн тухай мэдээлэл Санд байхгүй болно” гэсэн байна. Тухайн үед мөн Авлигатай тэмцэх газарт ч хандсан. Манайд шалгагдаагүй гэж хариу ирүүлсэн.

- УИХ-ын гишүүд сонгогдсон тойргийнхоо бизнес эрхлэгчдийн компанийг хамруулж өгнө үү гэж бичиг хийж ЖДҮ-ийг дэмжих санд өгсөн асуудал гарсан. Ер нь УИХ-ын гишүүд тойргийнх нь иргэд, байгууллагаас хүсэлт санал ирвэл түүнийг нь зохих байгууллага, албан тушаалтанд уламжилдаг шүү дээ. Та ийм байдлаар ч ЖДҮ-д хандаагүй юм уу?

-Би ямар ч компани, бизнес эрхлэгчийг дэмжээч гэж зуучилсан бичиг хийж өгөөгүй. Тиймээс ч миний нэр анхнаасаа ЖДҮ-ийг дэмжих сангаас зээл авсан хүмүүсийн нэр дотор байхгүй.

-Тэгвэл таныг зээл авсан гэж яагаад яригдах болов? Олон нийтийн сүлжээгээр ийм мэдээллийг сүүлийн үед бүр зохион байгуулалттай нэлээд түгээгээд байх шиг...

-Миний сонгогдсон хороо, дүүргийн иргэдэд онцлон түгээж буйг мэдээж улс төрийн зорилготой л гэж харж байна. Улс төрчид хийсэн бүтээснээрээ бус нэгнийхээ нэр хүндийг харлуулж өрсөлддөг заншсан аргаа л хэрэглэж байгаа нь тэр.

Харин яагаад ийм мэдээлэл гарах болов гэдэг талаар товчхон тайлбар хэлье. ЖДҮ-ийг дэмжих сангаас зээл авсан улстөрчид, гишүүдийн нэр аль жилийн өмнө тодорхой болсон шүү дээ. Анх ЖДҮ-ийг дэмжих сангаас тэр, энэ хүмүүс зээл авчээ гээд шуугиж байх тэр үед МАН-ын бүлэг хоёр хуваагдчихсан байсан. Яг тэр өдрүүдэд шударга үнэний талд зогссон цөөнгүй гишүүдийг янз бүрээр дарамтлах, эсвэл талдаа татах гэсэн оролдлого гарч байсан. Өөр гишүүд бас ийм байдалд орсон болов уу. Саналыг нь хүлээж аваагүй учир сэтгүүлчдэд мэдээлэл хийхдээ миний нэрийг санаатай хэлсэн гэж боддог. Тэр үед Л.Энх-Амгалан гишүүнд хандаж хэлсэн, та энэ мэдээллээ нотлоорой гэж. Харин тэр хүн надад “Энэ бол улс төр шүүдээ. Нэр андуураад хэлсэн шүү дээ, Уучлаарай” гэсэн. Тухайн үед явсан бохир улс төрөөс улбаатай мэдээллийг одоо Чингэлтэй дүүрэгт нэр дэвших сонирхолтой хүмүүс гаргаж ирээд, зураг хөрөгтэй эвлүүлээд цацдаг юм байна лээ. Зарим үйлдлийг шалгуулахаар цагдаагийн байгууллагад хандсан. Цагдаагийн байгууллага шалгаад хэн, ямар зорилгоор ийм мэдээлэл цацдагийг тогтоосон. 

-Энэ дашрамд тодруулахад хөрөнгө, орлого нь гишүүн болсноосоо хойш их хэмжээгээр нэмэгдсэн гэдэг мэдээлэл мөн цацагдсан. Энэ талаар Ёс зүйн дэд хороогоор хэлэлцэж байсныг санаж байна?

-Миний хөрөнгө, орлого УИХ-ын гишүүн болоод нэмэгдээгүй, байгаагаараа л байгаа. Нөхөр маань их сургууль төгссөн цагаааа хойш бизнес хийсэн. Бусдын жишгээр нийгэм, эдийн засгийн байдлыг дагаж бизнес нь дээшилж, бас уруудаж л явдаг.

Хөрөнгө, орлого нэмэгдсэн гэдэг тухайд нэг төрийн бус байгууллага анх ийм мэдээлэл нийгэмд цацсан. Тэр залуусыг хүлээж авч уулзахад бас л “Уучлаарай, АТГ-ын хөрөнгө орлогын мэдүүлгийн арын хэсгийн тайлбар харагддагүй учраас бид техникийн алдаатай тоог үндэслэн цэг, таслал андуурсан байна” гэсэн. Ямар ч хүн байсан нэр төрийг нь хөндсөн мэдээлэл цацах гэж байгаа бол нягталдаг баймаар. Зориуд ийм мэдээлэл цацчихаад “Уучлаарай” гээд орхисны дараа тэр мэдээллийг нь үнэн юм шиг харагдуулж, дэвэргэдэг увиагүй үйлдэл гардаг нь харамсалтай. 

-Хариуцлагагүй мэдээлэл цацсан Л.Энх-Амгалан гишүүн, тэр ТББ-ыг шүүхэд нь өгчихөж болоогүй юм уу?

-Энэ асуудлаар би АТГ, УИХ-ын Ёс зүйн дэд хороонд шалгаж өгнө үү гэж хандсан. Мөн шүүхэд хандахаа ч мэдэгдсэн. Харин тэд өөрсдөө уучлал гуйсан. Ёс зүйн дэд хороо хоёр ч удаа хуралдаад, дарга Б.Бат-Эрдэнэ нь “УИХ-ын гишүүн М.Оюунчимэгийн хөрөнгө, орлогод огцом өөрчлөлт орж, нэмэгдсэн зүйл алга. Техникийн алдаа буюу цэг, таслал андуурагдсан байна” гэдэг тайлбар өгсөн.

Би УИХ-д анх нэр дэвшихдээ нэр цэвэр байх ямар чухлыг ойлгосон. Албан тушаалын эрх мэдэл, давуу талаа ашиглаж улс орон, нийгэмдээ хохиролтой зүйл хэзээ ч хийхгүй. Ямар нэг хууль бус арга замаар мөнгө олохын төлөө ч би явдаггүй. Хууль бус, хувийн эрх ашгаа бодолцсон зүйл хийж байсангүй. Энэ зарчимдаа үнэнч учраас ч тэр үү нийгэм, хүний хөгжлийн төлөө УИХ дээр орж ирсэн асуудал бүрт нухацтай хандаж, саналаа хэлдэг. Тухайлбал, улс төрчид, албан тушаалтнууд ЖДҮ-ийг дэмжих сангаас зээл авдаг байдал цаашид давтагдахгүйн тулд Ж.Ганбаатар нарын гишүүдтэй хамтран Жижиг дунд үйлдвэрлэл, үйлчилгээг дэмжих тухай хуулийн төсөл санаачилж, батлуулсан. Энэ хууль хэрэгжээд эхэллээ. Сангийн жижиг бизнес эрхлэгчдэд зориулагдсан мөнгө банкаар өндөр хүүтэйгээр дамжихгүйгээр эзэндээ хүрдэг боллоо шүү дээ.

Түүнчлэн, Чингэлтэй дүүрэгт хувиараа болон өрхийн хөдөлмөр эрхлэгчдэд зориулсан түрээсийн хямд ажлын байр гаргах, жижиг дунд үйлдвэрлэгч болгон “бойжуулах”, сургалт сурталчилгаа олон талт үйлчилгээ үзүүлэх зорилготой сүүлийн үеийн тоног, төхөөрөмжөөр тоноглосон “Өрхийн хөдөлмөр эрхлэлтийг дэмжих төв”-ийг байгуулж ашиглалтад оруулсан гээд жижиг дунд үйлдвэр үйлчилгээг дэмжих чиглэлээр тууштай ажиллаж байна.

Эх сурвалж: Өдрийн сонин