Та киноны баатрын дүрд хувирахыг хүсдэг үү. Тухайн дүрийн оронд өөрийгөө тавьж үзэж төсөөлж байсан удаа бий юу. Эдгээр асуултад хүн бүр тийм гэж хариулах биз ээ. Тэгвэл өөрийн хүссэн дүрээ бодит амьдралд авч ирэх, тэр байтугай өөрийн биеэр хувирах боломж байдаг гэдэгт та итгэх үү. Энэ бол сүүлийн үед хүүхэд, залуусын хамгийн ихээр сонирхох болсон “Косплей” юм. Бид шинэ, содон косплей хийдэг залуусын төлөөлөл болсон залуу косплейер О.Гантогтохтой ярилцаж, косплей хийх болон түүнд суралцах талаар сонирхолтой ярилцлагыг өрнүүллээ.
-Сайн байна уу. Юуны өмнө өөрийгөө уншигчдад маань танилцуулаач?
-Танай сайтын уншигчдад энэ өдрийн мэндийг хүргэе. Намайг Одсүрэн овогтой Гантогтох гэдэг. ШУТИС-ийн гуравдугаар курсын оюутан. Косплей хийдэг бөгөөд тухайн сонирхолдоо бусдын адил хөтлөгдөн суралцаж яваа залуусын төлөөлөл гэж хэлж болно.
-Сүүлийн үед залуусын дунд косплей хийх сонирхолтой чиг хандлага гарч иржээ. Косплейг өөрийн мэдрэмжээр тайлбарлавал?
-Cosplay гэдэг нь cos буюу костюм/дүрийн хувцас, хэрэглэл/, play буюу тоглох гэсэн хоёр үгийг нийлүүлж, сонгосон дүрдээ хувирах гэсэн утга бүхий санааг агуулдаг. Өөрөөр хэлбэл, Cosplay-гээр дамжуулан өөрсдийн дуртай дүрүүддээ хувирах, ингэхдээ ижил төстэй үс засалт, хувцас хунарыг бүтээхийг хэлдэг юм л даа.
-Анх хэзээнээс косплей хийж эхэлсэн бэ?
-Би 2017 оны өвлөөс хойш косплей хийж эхэлсэн бөгөөд одоо хоёр жил болох гэж байна. Тэр үед Япон соёлын өдөрлөг гэж болдог байсан юм. Би тийм өдөрлөг болдгийг ч мэддэггүй байсан. Тэгээд найзтайгаа тухайн өдөрлөгт очиж сонирхож байх үеэр олон хүүхдүүд аним болон янз бүрийн дүрийн хувцаслалттай байхыг харчихаад маш их сонирхож эхэлсэн юм. Хамгийн анхны косплей бол Predator гээд харь гаригийхантай киноны дүр. Тухайн дүрийн хувцас нь надад үнэхээр их таалагдаж, түүнтэй адил хувцастай болохыг хүсдэг байлаа. Энэ үеэс л эхлээд косплейг анх оролдож, хийж сурч эхэлсэн дээ. Одоо ч хийсээр, суралцсаар байгаа.
-Орчин үеийн залуус шинэ, шинэлэг зүйл бүхнийг хийх, туршиж үзэх сонирхолтой болсон. Тэгвэл чиний хувьд яагаад заавал косплейг сонирхох болсон юм бэ?
-Би косплей хийж байхдаа маш их эрч хүч, энергийг авч чаддаг. Учир нь хүн чин сэтгэлээсээ хийхийг хүссэн зүйлээ хийх мөчид л түүнээсээ маш их жаргалыг олж авч чаддаг шүү дээ. Ийм ч учраас би косплей хийх дуртай байдаг юм. Би дунд сургуульд суралцаж байхдаа олны өмнө гарч ярьж чаддаггүй, их бүрэг хүүхэд байсан. Харин косплей хийж эхэлснээрээ түүний утга учир басхүү гайхамшигтай мэдрэмж бүрээс өөртөө авч, бусадтай илүү сайн харилцаж, ярилцаж чаддаг болсон. Иймдээ ч чин сэтгэлээсээ хийхийг хүссэн зүйл косплей мөн болохыг илүү сайн ойлгосон учраас өөрийн зүрх сэтгэлийг 100 хувь зориулж байгаа юм.
-Залуусын дунд косплейг зөвхөн аниме болон манга шүтэн бишрэгчдийн хийдэг зүйл гэж боддог. Заавал манга, анимийн дүрээр косплей хийх боломжтой байдаг юм уу. Аль эсвэл өөр киноны баатруудаар ч хийж болдог юм уу?
-Бүх хүмүүст нээлттэй байдаг учраас заавал манга, аниме шүтэн бишрэгчдийн хийдэг зүйл гэж ойлгох нь буруу. Харин ч эсрэгээрээ хэн ч байсан өөрийн хүссэн киноны баатар, дүрүүдийг бий болгохыг хүсвэл косплейгээр дамжуулан хийх боломжтой гэдгийг л ойлгох нь чухал.
-Сонгосон дүрээрээ косплейг хийхдээ зарим хүмүүс нь косоо оёулж, захиалдаг гэсэн. Чиний хувьд өөрийн гар урлалаар косоо хийдэг гэсэн. Ер нь өөрийн гараар косоо хийхэд ямар мэдрэмжийг авч чаддаг вэ?
-Анх косплей хийж байгаа хүүхдүүд хувцсаа захиалах, оёулах зэрэг тохиолдол байдаг. Гэхдээ өөрийн гараар хийх хүсэл эрмэлзэл байвал хэн ч байсан урлах боломжтой. Би анх косплей хийж байхдаа бусад косплейерчдээс асууж лавлаж, туслалцаа гуйж ч байсан. Тухайн дүрийг хийж байхад мэдэхгүй зүйл их гарсан ч анхны косплейг хийж чадсан. Хүнээр хийлгэх, өдөр шөнөгүй сууж косплейн бүхий л зүйлсээ өөрөө хийх хоёр маш ялгаатай. Өөрөө бага багаар оролдоод л байвал косынхоо деталь бүрийг хийж чаддаг болохоос эхлээд давуу тал ихтэй. Энэ нь хүүхдүүдэд бүтээлч байдлыг нь хөгжүүлэхэд тус болдог ч гэж ойлгож болно. Косоо хийж байхад цавуунд түлэгдэх нь хүртэл надад кайф өгдөг. Учир нь би косоо хийж байхдаа үгээр хэлшгүй мэдрэмжийг өөртөө авч чаддаг юм.
-Хүмүүс дуртай дүрээ бодит ертөнцөд косплейгээр дамжуулан авчирдаг. Чиний хувьд хамгийн их хийхийг хүсч байсан косплей дүр юу байв. Хүссэн дүрээ бүтээж, хийж чадсан уу?
-Миний хамгийн их хийхийг хүсэж байсан дүр бол “Predator” киноны predator-ын дүр. Уг дүрийн хувцас, деталь хэсгүүд, хэсэг бүр нь надад үнэхээр их таалагддаг байсан юм. Тэгээд заавал хийнэ гэж зүтгэсээр косплейгээ амжилттай хийсэн. Одоо ч түүнийгээ сайжруулсаар байгаа. Хамгийн гол нь би тухайн predator дүрийнхээ хувцсыг өмсөхөөр өөрөө тухайн дүрд орчихсон юм шиг мэдрэмжийг авч чаддаг.
-Одоогоор хэчнээн косплей хийсэн бэ. Тэдгээрээс хамгийн их хугацаа шаардагдсан кос юу байсан бэ?
-Одоогийн байдлаар зургаан косплей хийсэн байгаа. Зарим хүмүүсийн хувьд маш бага санагдаж магадгүй юм. Гэхдээ миний хувьд нэг косплейгээ дутуу хийгээд орхих бус аль болох бүх хэсгүүдийг нь адилхан хийхийг зорьдог. Нэг косплейг нэг сар хийдэг. Косплей хийхэд мөнгө санхүүгийн асуудал тулгардаг учраас байнга хийж чаддаггүй, хоорондын давтамж нь 2-3 сарын зайтай ч байх нь бий. Харин тэдгээр косплей дундаас армоор буюу хуяг дуулгатай ихтэй, битүү хамгаалалт бүхий хувцастай косплей дүрүүд дээр л хамгийн их хугацаа шаардагддаг.
-Косплей хийж эхэлснээс хойш хамгийн урам зориг авсан үйл явдал, тэмцээн юу байсан бэ?
- Хамгийн их баярласан, урам зориг авсан үйл явдал бол “Япон поп соёлын өдөрлөг” байсан. Би 2019 оны зун найзтайгаа Garo Zero гэх дүрийн косплейгээр оролцоод тэргүүн байрын эзэн болж Япон улсаар 7 хоног аялах эрхийг авсан. Гэхдээ цар тахлын үе таарсан учраас Япон явах маань тодорхой хугацаагаар хойшлогдчихсон байгаа.
-Косплейг мэдэхгүй хүмүүс ийм байдлыг хараад хэрхэн хүлээж авдаг вэ. Шоолох, тохуу хийх тохиолдол гарч байсан уу. Гарч байсан бол түүнийг хэрхэн давж гарсан бэ?
-Хүн хүний хүлээж авах өнцөг нь өөр өөр байдаг. Зарим хүмүүс нь “Ямар хогийн юм хийчихээ вэ” гэх мэтээр хэлэх тохиолдол байсан. Жишээлбэл, ойр дотны гэр бүлийнхэн маань дургүйцэж уурлах байдал байсан. Гэхдээ миний хувьд энэ байдал нь одоо өөрчлөгдсөн. Харин ч илүү дэмжиж, туслах, урмын үг хэлэх зэргээр сайшаадаг болсон нь сонирхлоо хөгжүүлэхэд минь илүү тус хүргэж байгаа зүйл болж байгаа. Ер нь эцэг, эхчүүд гэлтгүй ойр тойрны хүрээлэл нь тухайн косплейг сонирхол гэдэг өнцгөөс нь илүүтэй харж, ойлгож, хүлээж авах хэрэгтэй байх.
-Монголд косплей хөгжих нөхцөл, боломж хэр байна гэж боддог вэ?
-Мэдээж Монголд косплей гэдэг зүйлийг бүрэн утгаар нь ойлгож, мэдэх хүн тийм ч их биш. Энэ байдлаас болоод хүмүүсийн хандлага ч сайжраагүй байж болох талтай. Гэсэн хэдий ч сүүлийн жилүүдэд косплей хийдэг залуус нэмэгдэж, түүнийг таниулж, бусдад хүргэж чадаж байгаа нь сайшаалтай санагдаж байгаа. Косплейн талаар хүн бүрт зөв талаас нь ойлгуулж чадвал Монголд илүү хурдан хугацаанд хөгжих боломжтой гэж бодож байна. Иймд эхлээд косплей хийдэг залуус өөрсдийгөө илүү хөгжүүлэх талаар анхаарах нь чухал байх. Косплей хийдэг залуус маань тус тусдаа багт харьяалагддаг. Миний хувьд “Кицүнэ” багт харьяалагддаг бөгөөд мэдэхгүй чадахгүй зүйлд минь нөхөрсгөөр тусалдагт нь баярлаж явдаг. Хөл хориотой байгаа хэдий ч косоо хийсээр байгаарай гэж багийнхандаа хэлье.
-Косплей Монголд хөгжихийн төлөө уриатай гэсэн шүү дээ. Таны хувьд цаашид коспплейгээ хөгжүүлэх чиглэлд тавьсан зорилго байгаа юу?
-Бүх косплей хийдэг залууст тавьсан зорилго байгаа байх. Миний хувьд өөрийн ур чадвараа улам илүү сайжруулж, Япон улсад болдог Косплейчдийн дэлхий аварга шалгаруулах тэмцээнд оролцохыг хүсдэг. Хэрэв уг тэмцээнд оролцож чадвал олон нийтэд косплейн талаар илүү сайн хүргэж, мэдээлж чадах юм болов уу гэж боддог.
-Косплей хийх сонирхол байгаа ч эхлүүлж чадахгүй байгаа залууст зориулаад өөрийн зүгээс зөвлөгөө өгөөч?
-Косплей хийхэд нэлээд их саад учирдаг. Хийх газар, санхүүгийн асуудал, гэр бүлийн зөвшөөрөл гэх мэт. Хэрэв чамайг косплей сонирхоход гэр бүл, ойр дотныхон чинь зөвшөөрөхгүй байвал хамгийн эхлээд тэдэндээ юу болох, давуу тал зэргийг ойлгуулж өгөх хэрэгтэй. Мөн анх косплей хийхэд мэдэхгүй, чадахгүй зүйл гарвал бусад косплейчдээс аль болох асууж, зөвлөгөө авах нь зүйтэй. Энэ нь ч чамд илүү их тус болж өгөх юм. Бусдын хандлага, хэлсэн үгсээс болж өөрийн сонирхлыг бүү орхиорой гэдгийг л хэлмээр санагддаг. Тууштай байдал маш чухал шүү дээ.
Тэрбээр косплей хийхээр сонирхож буй залууст зориулан бичлэг оруулдаг бөгөөд анимийн дүрийн маск болон бусад косплейг хэрхэн өөрийн гараар хийх талаар танилцуулсан бичлэгийг сонирхож үзээрэй. / Ganaa cosplayer/
Сэтгэгдэл бичих