Цагдаа болох мөрөөдөлтэй 13 настай сийлбэрч охин Х.Энхжингийн ертөнцөөр...

 Цахим орчинд өөрийн хийсэн сийлбэр бүтээлүүдээр олны сайшаалыг хүртээд байгаа Монголын хамгийн бяцхан сийлбэрч охинтой танилцахаар манай сурвалжлах баг өчигдөр /2020.04.30/ нийслэлийн Налайх дүүргийг зорилоо. Түүнийг Хонгорзулын Энхжин гэдэг. Налайх дүүргийн “Эрдмийн Оргил” цогцолбор сургуулийн долдугаар ангид суралцдаг тэрээр насандаа баймгүй авьяаслаг, чадварлаг болохыг хийсэн бүтээлүүдээс харж болохоор байв. Хашааны гадна хэсэгт өөрийн хийсэн  бүтээлүүдээ тогтоосон байх нь Х.Энхжин охины мөрөөдлийн харш руу орох гэж байна уу даа гэлтэй.

Охины хамгийн том зөвлөгч басхүү найз бол ээж нь. Охин сийлбэр хийх хүсэлдээ хөтлөгдөн ээжээсээ нууцаар жижиг зүйлсийг хийж, бага багаар өөрийгөө хөгжүүлсээр ирсэн ажээ. “Ээж намайг хөл гараа гэмтээчихнэ гээд үглээд хийлгэдэггүй байсан юм өө” гэж ярих нь тун ч хэрсүүхэн. Түүний ээж Н.Хонгорзул  энэ тухай ярихдаа “Эмэгтэй хүн сийлбэр хийхэд ямар хэцүү болохыг өөрийн биеэр туулсан хүний хувьд охиндоо зааж өгнө гэдэг бодол байгаагүй. Гэтэл эхэндээ надаас нууцаар миний үлдэгдэл материалуудыг ашиглаад, янз бүрийн сийлбэр хийдэг байсан юм билээ. Охиныхоо өөрийгөө хөгжүүлэх гэсэн тууштай байдлыг нь би хараад зааж өгч болох юм байна гэж бодсон” гэсэн юм. Энэ үеэс эхлэн сурагч охин сийлбэр хийх сонирхлоо илүү хөгжүүлэх боломжтой болжээ.

“Би цагдаа болно” гэж ярих Х.Энхжин охин анх эгчийнхээ өсвөрийн цагдаа тэмцээний үеэр зургийг хараад “Цагдаа хувцас эмэгтэй хүнд ямар гоё зохидог юм бэ. Би цагдаа болно оо” хэмээн ярьж байсан талаар ээж нь бидэнд хуучлав. Иймдээ ч коронавирустай нүүр тулж тэмцэж буй цагдаа, эмч, онцгой байдлын албанд өөрийн зүгээс бэлэглэх сийлбэрээ ч бэлдэж байгаа гэсэн шүү.   

Айлын бага гээд эрхэлж суухгүйгээр аль болох өөрийгөө хөгжүүлэхээр хийж буй түүний бүтээл олон хүмүүст хүрч, захиалга ч ирж байгааг хэлж байлаа. Нийгэмд сийлбэр, урлалыг зөвхөн эрэгтэй хүмүүс хийдэг мэтээр хардаг. Гэтэл 13-хан настай хэдий ч  хэн хүний хийж чадамгүй сийлбэрийг хийж, өнгө алаглуулан будахын сацуу ээжийнхээ ажилд ч тусалдаг түүнийг бахдахаас өөр аргагүй юм.

“Хүүхдийнхээ сонирхлыг асуу, дараа нь хөгжүүл, боломжоороо дэмж”

Хөл хорионы үед таны хүүхэд теле хичээлээс бусад цагаар уйдаж, компьютерын ард сууж өдрийг үр бүтээлгүй өнгөрүүлж байж магадгүй. Харин Х.Энхжин охины хувьд сонирхлоо хөгжүүлж, бие даан сийлбэр хийж сурахад хөл хорио давуу тал болж байгаа ажээ.

Түүний сийлбэр хийх сонирхолд хөтөлсөн хүн бол ээж Н.Хонгорзул нь. Тэрбээр гарын ур дүйтэй нэгэн ажээ. Мужаан, сийлбэр, гар урлал гээд түүнд хийхгүй зүйл үгүй. Бусдын адил хөдөлмөрлөж яваа бүсгүй. Сийлбэр хийж эхлээд 10-аад жилийн нүүрийг үзэж яваа бөгөөд ихэнхдээ Өвөрмонголд  хувь, хүн болон албан байгууллагын захиалсан зүйлсийг хийж ажиллаж байсан аж. Харин сүүлийн хоёр жил Монголдоо сийлбэрийн бүтээлүүдээ хийж байгаа ажээ. Анх сийлбэр хийхийг ямар нэгэн багшгүйгээр бие даан сурсан гэнэ. Тэрбээр зөвхөн мужаан, сийлбэр хийгээд суухыг хүсдэггүй. Шинэлэг зүйл бүхэнд  өөрийгөө сорихыг хүсдэг гэдгээ хэлж байлаа. Хийж байгаа зүйл бүртээ сэтгэлээ шингээж хийхийг зорьдог гэх энэ бүсгүйн бүтээлүүдийг хараад гайхах бишрэх зэрэгцэж байв.

Охиныхоо хийсэн бүтээлүүдийг хараад ямар санагддаг вэ?

-Мэдээж сайхан санагддаг. Гэхдээ эхэндээ охиныхоо хийсэн бүтээлүүдийг илүү мэргэжлийн өнцгөөс харж, зарим талаар дутагдалтай санагдаж, голох үе байсан. Харин тэр үед нь урмыг нь мохоох үйлдэл гаргахаас илүүтэй алдсан зүйлсийг нь хэлж өгч, ойлгуулж, дараагийн удаа гаргасан алдаагаа давтахгүй байхыг зөвлөдөг юм. Хар зургаа гаргах, сийлбэр хийх, будах гэх мэт үе шат бүхнээ өөрөө бие дааж хийж байгааг нь хараад  хийсэн бүтээл бүхнийг нь өндрөөр үнэлдэг. Илүү их зүйлийг зааж өгмөөр санагдах болсон.

-Цаашид охиныхоо сонирхлыг хэрхэн хөгжүүлнэ гэж бодож байгаа вэ?

-Одоогоор хөл хорионы нөхцөлд охин маань компьютер дээр 3D зураг гаргаж, хөгжим тоглож сурч байгаа. Үүнийгээ хөгжүүлээд, компьютерт суурилсан сийлбэр, урлал болон гар сийлбэрээ хослуулж хөгжүүлвэл илүү үр өгөөжтэй, ирээдүйтэй гэж бодож байгаа. Гэхдээ өөрийхөө хүслийг охиндоо тулгаж болохгүй. Тиймээс өөрийнхөө хүссэнээр  цагдаа болоход нь эцэг, эхийн хувиар дэмжих болно.

-Хөл хорионы нөхцөлд хүүхдийнхээ сонирхлыг хөгжүүлэх боломжийг эцэг, эхийн зүгээс хэрхэн дэмжих ёстой юм шиг санагдаж байна вэ?

-Өөрийнх нь сонирхсон зүйлийг асуугаад, түүнийг нь хөгжүүлэх талаас нь боломжоороо дэмжиж өгвөл илүү үр дүнтэй байх. Өөрийнх нь хүсээгүй зүйлийг албаар хийлгэх, бусад хүүхдүүдтэй харьцуулах нь буруу гэж санагддаг. 

Ээжийнхээ гарын ур дүйг өвлөн авч, түүнийгээ улам хөгжүүлэхээр хичээж буй бяцхан охин, хийж бүтээх сэтгэлтэй хэнд ч хөдөлмөрийн үр шим багададгүй гэдгийг мэдрүүлсэн ээж хоёроос үзэгчид та бүхэн эерэг хандлага, зөв үлгэр дууриалал авна гэдэгт итгэлтэй байна.

Ц.Янжиндулам