Эмэгтэй хүний гоо сайхныг улам тодотгож өгдөг зүйл бол яахын аргагүй нүүр будалт байдаг. Урлаг болтлоо хөгжиж, хүлээн зөвшөөрөгдөж байгаа энэ салбарт өөрийн ажил, амьдралаа зориулахаар тууштай алхаж яваа артистууд маш олон. Тэр тусмаа эмэгтэй хүн л make up хийдэг гэх улиг болсон ойлголтыг үгүйсгэн, хүчтэй гарч ирж байгаа эрэгтэй мэйк ап артистууд ч цөөнгүй. Сонирхлоо ажил хэрэг болгосон тэдгээр залуусын төлөөлөл мэйк ап артист А.Энхбаатартай ярилцлаа. Түүнийг цахим сүлжээнд Эрка Эба нэрээр нь илүү сайн таних биз ээ.
-Эмэгтэй хүн ч хичээж хийх ёстой мэйк-ап артистийн мэргэжилтэй яагаад өөрийгөө холбох болсон юм бэ?
-Бага байхдаа эмэгтэй хүний үс гэзэгтэй оролдох, янзлах, тэр ч бүү хэл садангийн охидуудынхаа барби хүүхэлдэйгийнх нь үсийг янзлах, хувцас хийх гэх мэтээр хүний гадаад төрхийг өөрчлөх дуртай байсан. Хоёр настайгаасаа зураг зурах, баримал барих зэрэг гарын дүйгээ хөгжүүлээд явсан болохоор гараар хийх зүйл маш хялбар санагддаг. Тиймдээ ч одоо мэйк-ап артист хийдэг. Хажуугаар нь фэйшн дизайнер мэргэжлээр суралцаж байгаа. Энэ тавдугаар сард төгсөх юм. Төгсөөд нүүр будалт болон хувцас дизайн салбараа хослуулаад стилистээр ажиллахыг хүсч байгаа учраас бүр илүү шамдан суралцаж байна.
-Анх хэрхэн мэйк-ап хийж сурсан бэ?
-Анх дунд ангид байхдаа л ангийнхаа охидуудын нүүрийг будаж, хөмсгийг засах гээд л явдаг байлаа. Төгсөх жилээ фэйшн дизайнер мэргэжлийг сонгоно гэхэд гэр бүлийнхэн эсэргүүцсэн. Гэсэн хэдий ч зөрсөөр байгаад энэ мэргэжлээ сонгосон. Тэгээд миний мэргэжилтэй мэйк-ап нягт холбоотой гэдгийг ойлгосны үндсэн дээр 2017 онд DIVA PROFESSIONAL сургалтын төвд нэг сарын хугацаатай артистаар сурч техникжиж, мэргэшсэн. Тухайн студидээ төгсөөд хоёр жил багшаар ажилласан. Эдгээр нь надад улам их туршлага болж өгсөн гэж боддог.
Гэр бүлийнхэн маань дургүйцсэн ч би сонирхлоо л дагаж мэргэжлээ сонгосон
-Гэр бүлийнхэн чинь эсэргүүцсэн гэж байна шүү дээ. Ямар учраас дургүйцсэн юм бэ, одоо гэр бүлийнхний хандлага өөрчлөгдөж, хүлээн зөвшөөрсөн үү?
-фэйшн дизайнер болон make up артист мэргэжлийг ойлгохгүй, мөн ирээдүйгүй гэдэг өнцгөөс харж, гэр бүлийнхэн маань дургүйцэж байсан. Тиймээс аль болох мэргэжлийн талаар тайлбарлах, ойлгуулах, үлгэр жишээ хүмүүсээр төлөөлүүлэн илэрхийлэх зэргээр гэрийнхэндээ хэлж эхэлсэн. Тэгж ойлгуулсны дүнд басхүү өөрөө энэ чиглэлээр ажиллаад ирэхэд гэрийнхэн маань дэмждэг болсон.
-Эрэгтэй хүний хувиар мэйк-ап хийхэд хүндрэл, бэрхшээлтэй зүйл тулгарч байв уу?
-Бэрхшээлтэй зүйл маш бага байсан. Өөрөө багаасаа гарын ур дүйтэй байсан болоод ч тэр үү дажгүй хялбар байдаг. Харин хандлага талаасаа эрэгтэй хүн нүүр будаж чадах уу гэх үйлчлүүлэгчтэй таарч байсан. Гэхдээ нүүр будсаны дараах үр дүнг хараад тухайн үйлчлүүлэгчийн сэтгэгдэл тэс ондоо болж байлаа. Ер нь эрэгтэй артистуудын давуу тал нь эмэгтэй хүнийг хараад ямар байх, яаж харагдуулвал зохимжтой гэдгийг илүү сайн олж хардаг юм шиг санагддаг.
-Томоохон шоу арга хэмжээнүүдэд артистаар оролцдог уу, хамгийн сүүлд ямар шоунд ажиллав?
-Нэлээд хэдэн шоу, арга хэмжээнд DIVA студийн хамт олонтойгоо ажиллаж байсан. 2019 оны Өвлийн гоёл наадамд make up артистаар ажилласан. Мөн кино зураг авалт болон дуу клипний арын албанд нүүр будалтаа хийж ажилладаг.
-Артист бүхэн өөрийн онцлог хэв маягтайгаар make up хийдэг байх. Таны хувьд бусад мэйк ап артистуудаасаа ялгарах онцлог юу вэ?
-Миний хувьд илүү арт, фэйшн тал руугаа буюу бүтээлч байдлаар будалтуудаа хийдэг. Мөн хийсэн будалт бүр маань давтагддаггүй. Яг зөвхөн тухайн үйлчлүүлэгчид зориулан, тохируулан хийж байгаа будалт учраас дахин давтагдахгүй мөн чанарыг агуулж байдгаараа онцлог. Тайзны болон илүү бүтээлч тал руу хандсан мэйк апаа өөр дээрээ хийдэг. Харин beauty нүүр будалтыг моделиудад хийдэг. Сүүлийн үед дэлхийн болон Монголынхоо алдартай хүмүүсийн царай төрхийг дуурайлган будах ажилдаа ороод явж байгаа. Одоогоор таван хүнийхийг дуурайлган будсан байгаа.
-Дуурайн будахад өөрийн царайн дээрээ будалтаа хийсэн үү. Тухайн хүний царайны онцлогийг байгаагаар нь харуулахад маш их чадвар мэдрэмж шаардагдах байх?
-Хүнийг дуурайж будах үед тухайн хүний нүүрний пропорцыг мэдэрч, ажигласны үндсэн дээр ямар байдлаар make up хийвэл болох вэ гэдгээ мэдрэх чадваруудыг маш их шаарддаг. Мөн түүнд хэрэгтэй гэрэл сүүдэр, өнгө тавилт, өнцөг олох гэх мэт нэмэлт чухал ажлууд маш их. Тэр болгоныг бүрэн цогц гаргасны үндсэн дээр тухайн уран бүтээл илүү чанартай болохыг дүгнэдэг.
- Make up артист болсноос хойш хамгийн урам авч байсан зүйл юу байсан бэ?
-Одуудын дүрд хувирч, нүүр будалтыг хийж байгаа маань л одоогийн нөхцөлд хамгийн урам авч байгаа зүйл минь. Хүмүүс үйлчлүүлэх сонирхол их болсон. Энэ нь намайг илүү сайн суралцах ажиллахад урам өгч байгаа. Цахим сүлжээгээр зөвхөн гадаадынхны хийсэн дуурайлган будсан артистуудын зураг, бичлэгийг үзээд би чадах болов уу гэх айдастайгаар уг ажлаа эхлүүлж байсан. Иймдээ ч Монголын хамгийн анхны одуудын дүрд цуврал байдлаар хувирсан артист гэж хэлж болно оо. Энэ нь надад маш том урам зориг, үүрэг хариуцлагыг өгч байгаа.
Юм мэддэггүй хүн бусдын бүтээлийг доош нь хийж, муугаар ярьж явдаг байх
-“Эмэгтэй хүний хийх зүйлийг хийж, эр хүний шинжээ алдаж байна” гэх мэтээр цахим орчинд эрэгтэй артистууд шүүмжлэлд нэлээн өртдөг шүү дээ. энэ талаар таны байр суурь?
-Хүн ер нь өөртөө тохирсон ажлаа л хийх ёстой. Эрэгтэй хүн гэхээрээ л уул уурхай, банк, барилга гээд л ажиллах албагүй. Эмэгтэй хүн ч мөн адил заавал нягтлан, нарийн бичиг, гоо сайханч, маникюр болох албагүй. Хамгийн гол нь хүн сонирхсон чиглэлээ л барьж ажиллах нь маш чухал. Эрэгтэй хүн эмэгтэй хүний хийдэг зүйлийг хийлээ гээд монгол эр хүн байхаа больж байгаа хэрэг биш шүү дээ. Тухайн хүн хэрвээ уг мэргэжлээр амжилт олоод, сайн явбал Монгол гэж л ярина. Харин чи монгол хүн учраас ийм мэргэжилтэй байж болохгүй гэж хэлэх хүн байхгүй байх. Харин make up бол урлаг талаас нь ойлгож байж, цаашид зөв хөгжүүлбэл монголчууд дэлхийд гарах боломжтой. Үүний тулд эрэгтэй, эмэгтэй гэлтгүй бүх артистууд л зүтгэж байгаа шүү дээ.
-Make up хийж байхад олон нийтийн зүгээс шүүмжлэл ирсэн үү, түүнийг хэрхэн хүлээж авч байсан бэ?
-Би шүүмжлэлийг уншаад л өнгөрдөг. Түүнд ямар ч ач холбогдол өгдөггүй. Тэр хүний л мэддэг зүйлээс өөр зүйл гараад ирэхээр гайхсандаа ч юм уу тэгдэг байх гэж боддог. Ер нь л юм мэддэггүй хүн бусдын бүтээлийг доош нь хийж муугаар ярьж явдаг байх. Харин зөвлөгөө талын шүүмжлэлийг хүлээж аваад, дараагийн бүтээлдээ илүү анхаардаг.
-Эрэгтэй, эмэгтэй гэлтгүй make up артистуудыг олон нийт ямар хандлага, өнцгөөр хардаг байгаасай гэж хүсэж байна вэ?
-Артистуудыг илүү үнэлж тухайн мэргэжлийг нь ойлгоосой гэж хүсдэг. Зүгээр нэг цаг зогсож байгаад хүний нүүр будсан болоод гаргадаг ажил огт биш. Амархан мэргэжил гэж ойлгодог оо л багасгаасай гэж бас хүсдэг.
-Цаашид тавьсан зорилго юу байгаа вэ?
-Дэлхийд гарч өөрийн чадвараар өрсөлдөж, олон улсын мастер болох зорилготой. Монголынхоо нэрийг дэлхийд гаргах тийм зорилготой байна даа.
-Make up урлаг болтлоо хөгжиж байна шүү дээ. Таны хувьд мэйк апыг өөрийнхөөрөө тодорхойлбол?
-Гоо сайхны зүгээс бусдад байхгүй зүйлийг өгч харин өгөгдөлтэй хүмүүсийг илүү тод харагдуулах гэж ойлгож болно. Харааны төвшний нэгээхэн урлаг юм л даа
-Урин дулааны улирал болж байна. Охид бүсгүйчүүд маань зуны улиралд арьс арчилгаа болон нүүр будалт талаасаа юуг анхаарах ёстой вэ?
-Нүүр будалт талаасаа зуны уур амьсгалд тохируулаад нимгэн суурь тавьж байх хэрэгтэй. Ингэхдээ илүү өнгөлөг, толигор харагдуулахаар өнгөнүүдийг сонгож хэрэглэвэл маш тохиромжтой. Хар бараан өнгөнөөс аль болох татгалзаж, илүү гэгээлэг, тунгалаг өнгөнүүдийг нүүр будалтдаа ашиглах хэрэгтэй юм. Мөн зуны улиралд хөлс их гардаг, хөлөрдөг учраас арьсаа хамгаалах үүднээс base, praimer –н зориулалт щ, онцлогийг олж үзээд зөв ашиглаж сураарай.
Ц.ЯНЖИНДУЛАМ
4 сэтгэгдэлСэтгэгдэл бичих
Ухаангүй ичихгүй ярьж бичдэг нөхдүүд монголыг баллаж байна
Болохгүй гэсэн үг гэсэн гудамжны жаахан хүүхдийн хэллэг Эрэгтэй хүн гоосайхны өнгө засал хийх авьяастай гээд сэтгүүлч бол бичих ухаантай бай
тэгвэл өөр ямар үг хэллэг ашиглах байсан юм. ё өөрөө хэлдээ сэтгүүлч хүний ажлыг бид хийж үзээгүй байж, ингэж нэг нэгнээ муулж гутаадаг нь ямар учиртай юм бэ??? та ч бас ярилцлаг бол тухайн хүний хэлсэн үг, ишлэлээр гарчиг өгдөг юм
Юу чаддаг юм хүлээн зөвшөөрөх л хэрэгтэй Бид чөлөөт өрсөлдөөнт нийгэмд амьдарч байна