Энэ удаагийн “Жинхэнэ ЖДҮ” буландаа Монгол ноосыг гар аргаар боловсруулан хүний биед сөрөг нөлөөгүй хөлд эвтэйхэн, чийг татахгүй, амьсгалдаг эсгий углааш болон даавуун оймс үйлдвэрлэдэг “Гэр” оймсны үйлдвэрийг онцолж, захирал Ж.Ганбаттай ярилцлаа.
“Гэр коллекшн” ХХК нь Сүхбаатар дүүргийн Бэлхийн 18-р хороонд үйл ажиллагаа явуулдаг. Үйлдвэрлэл явуулдаг байраа долоон жилийн өмнө өөрсдийн гараар барьж босгожээ. Ж.Ганбат энэхүү үйлдвэрийг өөрийн хүргэн ахтайгаа хамтран үүсгэн байгуулсан. Анх хоёулахнаа үйлдвэрээ байгуулж байхад мэдэхгүй, чадахгүй зүйлс олон байсан ч өдөр бүр суралцсаар өнөөдрийг хүрчээ.
Тэрбээр өөрийн гараар босгосон үйлдвэртээ бүх зүрх сэтгэлээ зориулан одоог хүртэл биеэр оролцон ажилладаг. Ж.Ганбат ямар нэгэн их дээд сургууль төгсөж байгаагүй ч гэсэн өөрийн амьдралын ухаанаар бизнес эрхлэн явж байгаагаа бидэнд хэлсэн юм. Мөн “Өнөөдрийн нийгэмд зөвхөн амьдралын ухаанаар хоолоо олж идэхэд хэцүү болсон. Тиймээс хүүхэд залуучуудыг мэдлэг боловсролыг нэгдүгээрт тавьж маш сайн суралцаасай” гэж боддог тухайгаа хуваалцаж байлаа. Ингээд үндэсний үйлдвэрлэгчдийн төлөөлөл болсон Ж.Ганбат цар тахал дэгдэж, хөл хорио тогтоосон энэ өдрүүдэд өөрийн бизнесийг хэрхэн явуулж байгаа талаарх яриаг хүлээн авна уу.
-Танай үйлдвэр хэзээ үүсгэн байгуулагдсан бэ?
-"Гэр" оймсны үйлдвэрлэл 2013 оноос хойш үйл ажиллагаагаа явуулж байна. Харин "Гэр коллейкшн" ХХК компанийг 2008 онд байгуулсан. Энэ компанийг хүргэн ахын хамт байгуулж байсан. Үйлдвэрээ өөрсдийн гараар барьж босгосон. Шинэ өргөтгөлөө хийгээд удаагүй байна. Манай үйлдвэр 18 ажилтантай. Өдөрт ойролцоогоор 1500 оймс үйлдвэрлэх хүчин чадалтай.
-Үйлдвэрлэл эрхлэх санааг хаанаас олсон бэ?
-Анх 2008 онд "Гэр коллейкшн" компанийг байгуулахдаа оймсны чиглэлээр дагнасан бизнес эрхэлж байсан. Тэр үед Хятад, Солонгос улсаас импортоор орж ирсэн оймснуудыг бөөнөөр нь худалдан авч, дэлгүүрүүдээр борлуулдаг байлаа. Тэгээд өөрсдөө үйлдвэрлэл эрхэлье, дотооддоо ажиллах хүчийг бий болгох зорилгоор үйлдвэрээ байгуулсан.
-"Сovid-19" гарснаас хойш үйлдвэрлэл явуулахад хүндрэлүүд үүсэж байна уу?
-Мэдээж шүү дээ. Коронавирусээс болсон эдийн засгийн хямрал манайд ч гэсэн нөлөөлж байна. Жишээлбэл, дотооддоо борлуулалт хийдэг байсан бол хөл хорионоос болж дотоодын борлуулалт болон гадагшаа Орос, Казахстан руу экспортлох байдал зогссон. Одоохондоо ажилчдаа цалинтай байлгахын тулд богино цагаар ажиллаж байна. Ямар ч үед цагаан сар болон хаврын улиралд борлуулалт мууддаг. Тэгэхдээ өнгөрсөн жилтэй харьцуулахад, орлого 50 хувиар буурсан байна.
-Эсгий бүтээгдэхүүн үйлдвэрлэдэг олон газрууд байдаг. "Гэр коллейкшн" тэдгээрээс ялгарах онцлог юу вэ?
-Оймснуудын хувьд ялгарах зүйл бага даа. Харин манайх Төв аймгийн “Могол ноос” компанийн зөөлөн ноосыг ашигладаг. Манайх ганцхан оймс биш таавчиг, бүс, улавч, хаягдал материалаа ашиглан ханын гоёл зэргийг хийдэг.
-Эдгээр бүтээгдэхүүнээс хамгийн их ажиллагаатай нь аль нь вэ?
-Ажиллагаа багатай бүтээгдэхүүн гэж байхгүй . Оймс, таавчиг гээд бүгд л ажиллагаа ихтэй. Бүгд л нарийвчилсан деталь дээр ажиллана. Таавчиг гэхэд л ноосоо авчирна, самнана, самнасан ноосыг гар аргаар исгэнэ гэх мэт олон үйлдэлтэй шүү дээ.
-ЖДҮ эрхлэхэд ямар асуудлууд тулгардаг вэ?
-Бизнес эрхлэхэд хамгийн хэцүү нь санхүүгийн асуудал байдаг. Хөрөнгө оруулалт, хүү багатай зээл гэх мэт. Харин одоо манайх Батлан даалтын сан болон Азийн хөгжлийн банкнаас зээл авсан байгаа. ЖДҮ-ийг дэмжих сангаас зээл хүсэж байсан боловч дэмжигдээгүй. Материал бүрдүүлээд өгөхөөр тавьсан шаардлагад огт нийцдэггүй учраас буцаагддаг. Харин энэ шаардлагуудаа зөөлрүүлж, ЖДҮ эрхлэгчдийг дэмжвэл сайнсан. Ямар ч бизнест санхүүгийн хүндрэл хамгийн чухал асуудал байдаг. Энэ асуудлыг давчихвал бусад нь болно доо.
7 сэтгэгдэлСэтгэгдэл бичих
Майхан дотоодын үйлвэрээ дэмжиж хэрэглээгээ хангавал хөгжинө Гадаадын юм гэхээр л сайн гэдэг ухагдахуунаасаа аль болох татгалзах хэрэгтэй
Ugaaj bolhimuu
амжилт хүсэе
Setgel zutgel huniig amjiltand hurgene
хөөрхөн л юм байна ш дээ,гол нь дулаахан л байвал болоо ш дээ.юм хийж байгаа хүнд урам хайрлаач.
оймс нь гайгүй харагдаж байна. углааш бол хүн тоохооргүй эд байна.
бусдын хөдөлмөрийг бүү үгүйсгэ санаа оноо байвал зөвлөж бай хийж чадахгүй санал зөвлөл байхгүй бол амаа тат