ЭМЯ ээлжит мэдээллээ хийлээ. Мэдээллийн эхэнд ЭМЯ-ны газрын дарга Д.Нарангэрэл "Коронавирусийн халдвар дэлхийн 216 улсад бүртгэгдэж, халдвар авсан хүний тоо 5.3 сая хүрч, 339 мянган хүн нас барсан байна. Сүүлийн 24 цагт 116 мянган хүн шинээр өвчилж, 6000 гаруй хүн нас барсан. Энэ нь өмнөх өдрөөс өвчлөгсдийн тоо 13 мянгаар, нас баралт 1200 хүнээр нэмэгдсэн байна. Ялангуяа манай хөрш ОХУ-д өвчлөл нэмэгдсэн байна.
Сүүлийн 24 цагийн ОХУ-д 8849 хүн шинээр халдвар авсан. Манай олон аймагтай хил залгадаг Буриад, Эрхүү, Читид өвчлөл 7-49 тохиолдлоор нэмэгдэж, тархалт өндөр байна. Манай улсад коронавирусийн 141 тохиолдол бүртгэгдсэн. Түүнээс 30 нь эдгэрч гарсан. Одоогоор ХӨСҮТ-д 111 хүн хэвтэн эмчлүүлж байна. Сүүлийн 24 цагт 3 хүн ажиглалтад орж, 263 хүн ажиглалтын байрнаас гарч, гэрийн 14 хоногийн хорионд шилжсэн. Одоогоор 1394 хүн ажиглалтын байранд байна.
24 цагийн хугацаанд 119 дугаарт 119 хүн хандаж, коронавирус халдварын талаар зөвлөгөө өгсөн. Шуурхай аппликейшнд 11 иргэн гадаадаас хандаж, зөвлөгөө авсан. Иргэдийн зүгээс хүмүүст амны хаалтаа сайн зүүгээрэй гэсэн зөвлөмжийг дахин дахин хэлж өгөөрэй гэсэн. Хөрш улсуудад коронавирусийн халдвар эрчтэй нэмэгдэж байгаа энэ үед амны хаалтаа байнга зүүж, гараа тогтмол угаахыг зөвлөж байна" хэмээлээ.
ХӨСҮТ-ийн захирал Д.Нямхүү "2020 оны тавдугаар сарын 22-нд ХӨСҮТ-ийн хоёр, Дархан-Уул аймгийн салбар лабораторид нийтдээ 188 хүнд шинжилгээ хийсэн. Коронавирус илрээгүй. ХӨСҮТ-д тусгаарлагдсан 3, Дархан-Уул аймагт 11, тандалтын зорилгоор 17 сорьц авсан. Улсын болон дүүргийн эмнэлгүүдээс сорьц сонгож авч хийсэн, бүгдэд нь коронавирус илрээгүй. Энхийг сахиулагчид болох 113 хүнд шинжилгээ хийхэд, коронавирус илрээгүй. Дархан-Уул аймагт ачаа тээврийн жолооч 42, аймгийн нэгдсэн эмнэлэгт тусгаарлагдаж байсан 2 хүнд шинжилгээ хийсэн байна.
Өнөөдөр 2 хүн ХӨСҮТ-өөс 2 хүн эдгэрч гарлаа. Батлагдсан тохиолдол 141, эдгэрч гарсан 30 хүн байна. Эдгэрсэн хоёр оюутан 37, 39 хоноод бүрэн эдгэрч гарчээ" хэмээлээ.