Б.Эрдэнэбаяр: Өдөрт 100 хүн цусаа өгч байж ялтаст эсийн бүтээгдэхүүний хэрэгцээг хангах боломжтой

ЭМЯ-ны өдөр бүрийн 11:00 цагийн мэдээлэлд бямба, ням гарагт Улсын төв эмнэлгүүд, эрүүл мэндийн байгууллагын удирдлагууд оролцож, нөхцөл байдлын талаар мэдээлэл өгдөг билээ. Өнөөдөр ЦССҮТ-ийн захирал Н. Эрдэнэбаяр оролцож, цусны нөөцийн талаар мэдээлэл хийлээ. Тэрбээр "Цар тахлын нөхцөл байдалтай холбоотойгоор цусны албадын үйл ажиллагааг өвөрмөц байдлаар зохион байгуулах шаардлага тулгарч байна. Ковид-19 цар тахлын үед цусны донорын үйл эгнээг өргөжүүлэх, хадгалах замын цус цуглуулалтыг хэвийн хэмжээнд байлгах. Хүрэлцэхүйц хэмжээний цус, цусан бүтээгдэхүүний нөөц бүрдүүлэхэд дэлхий даяар бэрхшээл тулгарч байгаа бөгөөд дэлхий улс орнуудын мэдээ, тайлангаас харахад, эхний давалгаанд өртсөн орнуудын цус цуглуулалт даруй 40 хувиар буурсан үзүүлэлттэй байна. 

Үүнтэй холбоотойгоор Олон улсын болон Азийн цус цуглуулалтын нийгэмлэгээс нөхцөл байдалтай уялдуулсан үйл ажиллагаан удирдамж, санал, зөвлөмжийг гишүүн орнуудад хүргүүлсэн. Ковид 19 вирусийн халдвартай иргэдэд цус, цусан бүтээгдэхүүн төдийлөн хэрэглэхгүй байгаа ч эрүүл мэндийн байгууллагын ажиллагаа хэвийн үргэлжилж байна. Тиймээс цус цусан бүтээгдэхүүний хэрэглээ буураагүй, харин ч эхний 4 сарын байдлаар 8 хувиар өссөн үзүүлэлттэй байгаа юм. Тиймээс иргэдийг цусаа хандивлахыг уриалж, мэдээлэл түгээсэн. Мөн бидэнд бүртгэлтэй байгаа 136 мянган цусны донорт мессеж, цахим шуудан илгээх, уриалах ажлыг хийж байна.

Мөн аж ахуйн нэгж, байгууллагуудад уриалга хүргүүлж, тавдугаар сарын байдлаар 130 гаруй байгууллагатай цус цуглуулах чиглэлээр хамтарч ажилласан. Ямар байдлаар цусаа өгөх, аль үед ирж болохгүй талаар ч мэдээлэл өгч, цар тахлаас урьдчилан сэргийлэх ажиллагааг зохион байгуулж байна. Их, дээд сургуулийн үйл ажиллагаагзогсоосонтой холбоотой явуулын цус цуглуулалт 40 хувиар буурсан. ЦССҮТ оны эхний 4 сарын байдлаар цус цуглуулах гурван суурин төв, явуулын нэг багаар нийт 8531 нэгж цусны бүрэлдэхүүн цуглуулсан нь өмнөх оны мөн үеийнхтэй харьцуулахад, 11 хувиар буурсан үзүүлэлтэй байна. 

Тиймээс тавдугаар сараас эхэлж цус цуглуулах цагийг ажлын өдрүүдэд уртасган, бямба гарагт хүртэл ажиллаж эхэлсэн. Үүнээс үүдэж цус цуглуулалтын хэмжээ харьцангуй нэмэгдэж байна. Цусны алба сүүлийн жилүүдэд олон шинэ технологийг нэвтрүүлсний үр дүнд сийвэнгийн болон улаан эсийн бүтээгдэхүүний хадгалалтын хугацааг нэмэгдүүлэн, тайван үеийн цус цусан бүтээгдэхүүний хангалттай нөөцийг бүрдүүлж чадсан.  Гагцхүү удаан хугацаагаар нөөцлөх боломжгүй ялтаст эсийн бүтээгдэхүүний захиалгыг хангахын тулд өдөрт дунджаар 100 донороос цус цуглуулж байж өгөх боломж байдаг учраас ард иргэд ойлгох хэрэгтэй байна" хэмээлээ.