Байр суурь: Баянзүрх дүүргийн сонгогчид нам биш хүнийг нь харж сонголтоо хийнэ

2020 оны УИХ-ын сонгуульд нэр дэвшигчдийн нэр хэдийнээ тодорсон байгаа билээ.  Тэгвэл сонгуулийн хоёр тойрогтой Баянзүрх дүүрэгт ямар нэр дэвшигч иргэдээс  дэмжлэг авах вэ гэдэг нь таамаг төдий байна. Иймд бид нийслэлдээ хамгийн их хүн амтайд тооцогддог  Баянзүрх дүүргийн иргэдээс тойргийнхоо нэр дэвшигчдийн талаар хэр мэдээлэлтэй, тэдэнд ямар шаардлага тавьж итгэл хүлээлгэх тухай байр суурийг нь  хуваалцлаа.

Б.Энхтуяа: Хууччуулаа сонгоод өөдлөхгүй байх аа

Баянзүрх  дүүргийн иргэн

  -Манай тойрогт ямар хүмүүс нэр дэвшиж байгаа талаар мэдээлэл байхгүй байна. Гэхдээ энэ жилийн сонгуульд шинэ залуу, боловсон хүчин сонгогдоосой гэж хүсэж байна. Учир нь олон жил төрд суучихсан, хөрөнгөжсөн, дахиад эрх мэдэлд гарах гэж санаархаж байгаа хууччуулаас хаширчихаад байна шүү дээ. Тэднийг дахиж сонгоод өөдөлнө гэж огт бодохгүй байна. Ийм учраас хууччуул нь залуу хүмүүст зайгаа тавьж өгсөн нь зөв байх. Залуу хүний сэтгэн бодох чадвар, аливааг харах өнцөг нь өөр учраас улс орондоо шинийг хийж, бүтээж чадах байх. Энэ жилийн сонгуульд шинээр нэр дэвшиж байгаа залуусаа дэмжинэ.

Г.Нармандах : Нэр дэвшигчид хөрсөн дээрээ буумаар байна

Баянзүрх  дүүргийн иргэн

-Нэр дэвшигчдийн талаар мэдээлэл одоохондоо ирээгүй л байна. Ер нь эх орныхоо хөгжил дэвшилд гар бие оролцох сэтгэлтэй, зүтгэлтэй хүн нь сонгогдож байвал хэрэгтэй. Нас бол тоо шүү дээ. Мэдээж төрийн хүнд мэдлэг, туршлага гэдэг зүйл заавал байх ёстой. Тэр дундаа хууль тогтоох байгууллага учраас хууль эрх зүйн өндөр мэдлэгтэй хүн байх нь чухал. Сүүлийн үед бөхчүүд, дуучид гээд мэргэжлийн бус хүмүүс төрд нэр дэвших нь ихэссэн. Манай дүүргээс өмнө сонгогдож гарсан хүмүүсийн хийж, бүтээсэн дорвитой ажил нүдэнд үзэгдэхгүй л байна. Тэнгэрт тулсан мөрийн хөтөлбөр, амлалт өгч гардаг ч түүнийгээ хэрэгжүүлж байгаа нь цөөхөн.

Сонгууль дөхөхөөр л ийм, тийм юм хийлээ гээд өөрсдийгөө сурталчилаад  эхэлдэг. Цахим сүлжээгээр түүнийгээ тараагаад л байдаг. Яг үнэндээ манай нэр дэвшиж байгаа хүмүүс хөрсөн дээрээ буумаар байна. Тойрогтоо ажилламаар байна. Тэдний амлалтыг хүлээвэл мөрөөдөл биелэхийн наян жил болох байх даа.  

н.Хулан: Сонголтдоо илүү хариуцлагатай хандах жил гэж бодож байна

Баянзүрх дүүргийн иргэн

      -Залуу хүмүүс сонгогдох нь дээр байх. Хууччуул нь ахиад сонгогдвол идэж, уугаад, хөрөнгөжөөд л явах биз.  Энэ жилийн сонгууль шударга зарчмаар явагдаж, иргэд маань зөв хүнээ сонгоосой л гэж хүсэж байна. Миний хувьд нам биш хүнийг нь харж сонголтоо өгнө. Өмнөх жилүүдэд мөрийн хөтөлбөрийг нь ч харахгүйгээр саналаа өгчихдөг тохиолдол байсан. Энэ жил илүү хариуцлагатай байж, сонголтоо зөв хүндээ өгнө гэж бодож байгаа.

Д.Гантуяа: Нэр дэвшигчдийн мөрийн хөтөлбөрийг харж сонголтоо хийнэ

Баянзүрх дүүргийн иргэн

        -Улс орондоо хэрэгтэй зүйлсээ мэдэрч хийж, бүтээж чаддаг нэгэн байх хэрэгтэй. Мөн ард түмнээ харж ханддаг байх ч чухал. Хуучин ажиллаж байсан туршлагатай хүмүүс гарч болно. Гэхдээ энэ жилийн сонгуульд мэдлэг боловсролтой залуус их нэр дэвшиж байх шиг харагдсан. Тэднээсээ сонголтоо хийнэ гэж бодож байна. Ард түмний амьдрал өдрөөс өдөрт уруудахаас, дээшилж сайжирч байгаа зүйл байхгүй шүү дээ. Нэр дэвшигчдийн мөрийн хөтөлбөрийг нь сайн харж сонголтоо хийнэ. Сонгууль маань шударга л явагдаасай.

 З.Очир: Бидэнд нам биш хүн хэрэгтэй байна

Баянзүрх дүүргийн иргэн

 -Олон жил нэр дэвшсэн хүмүүс дунд чадвартай, туршлагатай нь ч бий. Түүнийг үгүйсгэхгүй. Энэ жил шинээр нэр дэвшигчид хүчтэй орж ирж байх шиг байна. Нам бол одоо чухал биш болсон. Бидэнд хүн л хэрэгтэй байна. Хамгийн гол нь хүмүүжилтэй, төлөвшилтэй, улс эх орондоо хийж бүтээх чадвартай нэгэн байвал болмоор байна даа. Залуу боловсон хүчин төрд сонгогдож гарах хэрэгтэй байх. Залуусыг туршлагагүй гээд л голоод байна. Бид туршлагагүй хүмүүсийг сонгож байж л  тэднийг туршлагажуулна шүү дээ.

 Г.Цогтсайхан: Төр бол туршлага судлах газар биш

Баянзүрх дүүргийн иргэн

-Нэр дэвшигчдийн талаар мэдээлэлгүй байна. Гэхдээ тараах материалаар нь л хүнийг сонгоно гэж юу байх вэ дээ. Туршлагатай хүнийгээ л сонгох хэрэгтэй байх даа. Залуусыг сонгоод, тэд туршлага судлах байдлаар ажиллавал хэрэггүй шүү дээ. Төр гэдэг чинь туршлага судлах газар биш.  

М.Бат-Эрдэнэ: Нам биш хүнийг нь харж сонголтоо хийнэ

Баянзүрх дүүргийн иргэн

    -Залуучуудаа дэмжинэ гэж бодож байна. Боловсролтой, мэдлэг, санаачилгатай байх хэрэгтэй. Олон жил төрд гарсан хүмүүсийг ард түмэн маань сонгохгүй байх талаас нь анхаараасай гэж хүсэж байна. Бид олон жилийн туршлагаар хаширчихаад байна шүү дээ. Их олон жил тэдэнд итгэж, хууртагдаж явлаа. Харин одоо нам чухал биш. Хүнийг нь харж сонголтоо хийнэ. Байгаа бүх зүйлээ дээгүүрээ хуваагаад идчихээр ард түмэнд юу оногдох билээ дээ. Ард түмний амьдрал хэцүү байна.

Манай тойрогт өмнө нь сонгогдсон гишүүдээс хийсэн, бүтээсэн ажилтай хүн гэвэл цөөхөн л байх. Намаас нэр дэвшиж байгаа хүмүүс бол сэтгэлд нийцэхгүй л байгаа. Залуу хүмүүстээ саналаа өгөөрэй гэж ард түмэндээ уриалах байна.

 УИХ-ын сонгуулийн 22, 23-р тойрог буюу Баянзүрх дүүрэгт дараах нэр дэвшигчид өрсөлдөх юм.

АН:

1. З.Энхболд  / УИХ-ын дарга, Ерөнхийлөгчийн ТГ-ын дарга асан/
2. Т.Батцогт/ АН-ын ҮБХ-ны гишүүн /
3. Ц.Одонтунгалаг / НИТХ-ын төлөөлөгч /
4. Д.Пүрэвдаваа  / БЗД-ийн Засаг дарга асан/
5. Ж.Баясгалан / АН-ын гишүүн/

МАН:

1. Б.Саранчимэг / УИХ-ын гишүүн/
2. Б.Энхбаяр / Хууль зүйн дэд сайд асан /
3. Х.Булгантуяа  / Сангийн дэд сайд/
4. Э.Бат-амгалан / Бага хурлын гишүүн/
5. Ж.Чинбүрэн / Хавдар судлалын үндэсний төвийн захирал асан/

ШИНЭ эвсэл:

1. С.Амарсайхан /Эдийн засагч/
2. Х.Батсуурь /Эдийн засагч/
3. Ж.Батзандан /УИХ-ын гишүүн, Улс төр судлаач/
4. Ш.Батсамбуу/Геологич/
5. Ц.Баттуяа / Хуульч/

Та Бидний Эвсэл:

1. Р.Өсөхбаяр/ Хууль зүйн магистр /
2. Г.Золзаяа / Эрх зүйч /
3. Б.Батболд / МУНН-ын дарга /
4. С.Бямбасүрэн / Эрх зүйч/
5. Л.Өнөрбаяр / МУНН-н Ерөнхий нарийн бичгийн дарга/

Зөв хүн электорат:

1. П.Наранбаяр / Хөдөлмөрийн үндэсний намын нарийн бичгийн дарга /
2. Г.Уянгахишиг / Инвескор Капитал ҮЦК Гүйцэтгэх захирал /
3. Д.Гантулга / Хөдөлмөрийн үндэсний намын ЕНБД /
4. Г.Рагчаасүрэн / Гэрэгэ Партнерс ХХК Захирал/
5. А.Дөлгөөн / Хөдөлмөрийн үндэсний намын нарийн бичгийн дарга/

Эрх Чөлөө Хэрэгжүүлэгч нам:

1. А.Эрдэнэбаяр
2. Д.Батдэлгэр

Хөгжлийн хөтөлбөр нам:

1. Д.Өнөрчимэг /Зураач /

Сахигтун Үндсэн Хуулийн 19 эвсэл:

1. Л.Наранбаатар
2. Ж.Батзориг
3. П.Хишигбаяр
4. Д.Баянзул
5. Г.Сүхболд

Зөн Олны Нам:

1. Б.Лхамхүү
2. Н.Сарангэрэл

Ард Түмний Олонхийн Засаглал Нам:

1. Д.Ганзориг
2. Ц.Мөнхжаргал
3. В.Ганболд
4. Д.Батбилэг

Гэр хороолол хөгжлийн нам:

1. Б.Батсүх / “Гэр хороолол хөгжлийн нам”-ын дарга/