МиЛог: Үрс минь өмнөө тавьсан зорилготой, хүнийг хайрлах сэтгэлтэй л болоорой

Өнөөдөр зургадугаар сарын 1, бидний хэлж заншсанаар хүүхдийн баярын өдөр.  Хоёр хүү минь өндөр залуучууд болохоор аав, ээжийнхээ өгсөн бэлгийг зүүдлээд унтаж байна.  Бүх дэлхийн бяцхан үрсийг хайрлах сэтгэл аавд нь байдаг гэж худлаа хэлэхгүй ээ.  "Хүн бүхэн өөрийнхөө ачааг дааж явбал гэж" явбал гэж алдарт яруу найрагч Б.Явуухулан шүлэглэсэн байдаг юм. Тиймээс аав нь өөрийнхөө даах ёстой ачааг хэнээр ч үүрүүлэхгүй, хоёр үрийнхээ төлөө бүхий л хайраа зориулж, сайн сайхан бүхний чинь төлөө зүтгэнэ ээ.  Гэхдээ аав нь хаврын зэврүүн орой хайрцаг өмнөө тавьчихаад, хажуугаар нь өнгөрөх хүмүүс мөнгө хийх болов уу гэж горьдон харж, чичрэн чичрэн суугаа хүүд хэтэвчнээсээ хэдэн төгрөг харамлахгүй өгөх сэтгэлтэй юм шүү.  

13 жилийн тэртээ том хүү минь ээжийнхээ гэдсэнд байлаа.  Аав нь залуухан, дэврүүхэн, зарим үр дагаврын талаар бодох сөхөөгүй гүйж явжээ. Бас хажуугаар нь ядуу гэж голж, дээрэлхэж харьцсан хүмүүст ирээдүйд хэн болохоо батална даа гэсэн гоморхол, зүтгэл хоёрыг өөртөө тээж явлаа. Аав, ээж хоёр нь чамайгаа нууж, хааж, хамгаалж байж энэ орчлонд төрүүлсэн юм шүү.  Аав нь ядуу яваагүй, мулгуу байгаагүй. Бусдыг бодоход арай мөнгө муутай л байсан. Мөнгө муутай байлаа гээд ухаан, хайр, бусдыг гэсэн сэтгэлээрээ баргийн баянаас илүү баян явсан юм шүү.  Чамайг төрөхөд эмч нар гүйлдэж аргадаад, хүмүүс бурууг тохох эзэн хайж, ээж чинь л бүхнээс айж байсан юм. Гэхдээ аав нь муу муухайг бодож, муйхарлаж буруу руу зүтгээгүй юм шүү.  Хэдэн хагалгаа давж гараад өдий зэрэгтэй болоход хэн дэргэд чинь байсан гээч, аав, ээж хоёр нь.  

Өнөөдөр миний хүү ааваасаа том гутал өмсдөг, өндөр сайхан залуу болж явна.  Чи минь хэнд ч гологдохгүй сайхан залуу болж өснө. Хамгийн гол нь өөртөө итгэлтэй, өмнөө тавьсан зорилготой, бусдыг ялгаварлаж дорд үздэггүй, хүнтэй хүн шиг харьцдаг л болоорой.  Аав нь хүссэн болгоныг чинь авч өгнө гэж хэлэхгүй ээ, угаасаа чадахгүй. Хүү минь, өөрийнхөө тавьсан зорилгод өөрөө хүрээд, түүнээсээ сэтгэл ханамжийг мэдрээрэй. Харин чамайг дорд үзсэн хүн тааралдвал өөртөө тавьсан зорилгодоо заавал хүрээд, амжилтаараа тэр хүний буруу байсныг ойлгуулаарай. Бас дорд үздэг, өөрсдийгөө бусдаас илүү гэж үздэг хүмүүст талархаж яваарай. Яагаад гэвэл тэд урагш зүтгэх зорилго өгдөг "сайн" хүмүүс шүү.  Орчлон дээр одоохондоо ганц байгаа дүүгээ хайрлаж яваарай.  Түүнийг чинь аав, ээж нь хайрлана. Бас чи л хайрлах учиртай. Бусад хүмүүс чин сэтгэлээсээ хайрлахгүй шүү.  Миний хүү олон хүний хайранд дунд хөлбөрч өссөн. Хайранд хөлбөрч өссөн хүний сэтгэлд хайр л дүүрэн байх учиртай. 

Зургаан жил гаруйн өмнө бага хүү минь төрж байлаа.  Ирэх намар сургуульд орох гэж байгаа ч хүүхэлдэйн кино үзэж, ээжийнхээ энгэрт ассан бяцхан жаал хэвээрээ л байгаа миний эрдэнэ.  Одоохондоо чи аавынхаа хэлснийг гүн гүнзгий ойлгохгүй биз. Гэхдээ дараа нь уншаад ухаараасай гэсэн дээ өнөөдөр үүнийг бичиж сууна аа, аав нь.  Миний хүү энэ дэлхийн олон хүнд байхгүй энэрэнгүй сэтгэлтэн. Чи минь ирээдүйд энэ дэлхийн биш юм гэхэд эх орныхоо олон бяцхан үрсийн төлөө их зүйлийг хийнэ. Чи минь амьдрал нь хэцүүхэн хүмүүсийн аврал нь болох болно, аав нь итгэж байгаа.  Эмийн сангаас витамин авсан ч ангийнхаа жаалуудыг мартдаггүй. Авсан витаминаа ширхэг ширхгээр тараах сэтгэл чиний минь бяцхан зүрхнээс цацарч байдаг. 

"Аав аа, би том болоод 100 давхар байшин барина. Тэгээд тэндээ гэр оронгүй хүмүүсийг оруулна" гэж чи дөрөвхөн настай байхдаа л ярьдаг байсан.  Хэн ч зааж өгөөгүй байхад. Бяцхан зүрхэнд чинь бусдыг гэсэн хайр үргэлж дүүрэн байдаг, яг бурханы элч гэлтэй. Аав, ээж хоёрыгоо жаргаах, гадаадад аялуулах, том машин авч өгөх тухай өдөр бүр ярьдаг. Аав нь чинийхээ энэ их хайраас илүүтэй бусдыг хайрлаж чадахгүй байгаа даа заримдаа өөрөөсөө ичдэг шүү үр минь.  Гэхдээ л аав нь та хоёрынхоо төлөө хичээнэ ээ. Баян, цатгалан байлгах гэж биш, бусдыг хайрлах сэтгэлийн чинь үрийг аварга том мод болж ургуулахын тулд хайраараа усална. 

Миний хоёр хүү өмнөө тавьсан зорилготой, хүнийг хайрлах сэтгэлтэй л болоорой. Аав хүүхдүүдийнхээ сайн сайхны төлөө чадах бүхнээ хийнэ.  Ойрдоо сэтгэл өмрүүлсэн олон мэдээ сонсогдож байгаа.  Хоёр хүүгээ усанд сэлж сургах ёстой юм байна гэдгийг ухаарч л сууна, муу аав нь.  Архи уучихаад битгий хэл эрүүлдээ машин жолоодож явахдаа ч хүүхдүүдээ суулгасан бол хурдан явахыг биш аюулгүй зорьсон газартаа очих ёстойгоо бүр ч илүү ойлгож байна.  Нийгэм гэдэг тийм ч сайхан орчин биш.  Ямар ч хөгжсөн, сайхан оронд аюул үргэлж л байдаг. Тэр дундаа манай улс одоохондоо хүүхдэд ээлгүй орон байна. Дарга нар авлигад анхаарлаа хандуулаад, ирээдүйн иргэдээ хайрлаж, аюулгүй орчинд амьдруулахаа умартсан л явна.  Ийм нийгэмд амьдарч байгаа учраас аав нь хүүхдүүдээ эрийн цээнд хүртэл нь эрүүл, аюулгүй байлгахын төлөө өөрөөс шалтгаалах бүх зүйлээ хийнэ. 

Харин миний хүүхдүүд сайхан сэтгэлээ гээлгүй, тэжээвэр сэтгэлгээ суулгүй, ирээдүйд хүний охиныг чин сэтгэлээсээ хайрлах жинхэнэ эрчүүд болж өсөөрэй. Хоолоо өөрөө хийчихдэг, хувцсаа угаагаад, индүүдээд өмсчихдөг.  Ууж, идсэн аягаа угаачихдаг ухамсартай, бусдад хайрлагдсан залуучууд болоорой.  Тийм эрчүүд болгохын тулд аав нь чадах чинээгээрээ үлгэрлэнэ ээ, үрс минь.  Одоохондоо та хоёр минь нойроо хангалттай ав, ирээдүйд туулах олон бартаа хүлээж байгаа. Тэр цагт л нойрноос морио, чөмөгнөөс хутгаа алдаж болохгүй.  Үхэн үхтлээ харамлах үрс минь, аав нь хүнд гологдохын гашууныг амссан. Хэнд ч гологдохгүй болохын тулд хичээж явна.  Та хоёр минь ч бас ирээдүйд хичээгээрэй, зүтгэл бүхэнд шагнал ирдэг юм шүү.