METRO хот: Шаардлага бол доромжлол биш

Та гутлаа арчиж орно уу

Та гараа ариутгана уу

Та хогоо хогийн саванд хийж хэвшинэ үү. Эдгээр шаардлагуудыг бид бусдаар хэлүүлэлтгүй хамгийн сайн мэддэг. Ямар ч мундаг зарчимч хүн  заримдаа шаардлага тавихуйц үйлдэл хийх нь бий. Гэхдээ сүүлийн үед хэн нэгний тавьсан шаардлага бүрийг доромжлол мэтээр хүлээж авах хүмүүс их ч болсон шиг санагдав.

Би хааяадаа кино үзэх дуртай. Тэр дундаа адал явдалтай, сонирхолтой, зөгнөлт байвал бүр ч дурлачихана. Сүүлийн үед нийгэм цаанаасаа олон кино бүтээдэг болохыг ойлгох шиг. Ялангуяа нийтийн тээврийн адал явдал их. Автобусанд гунигийн, аймшгийн, мелодрам тэр байтугай инээдмийн кино шиг мөчүүд олонтой.

 Хамгийн сүүлд л гэхэд жолооч, хэгжүүн яриатай эгч хоёрын гол дүрд тоглосон минийхээр бол “Автобус ба амьдрал” хэмээн нэрийдэж амжсан киног үзэв.  Кино театраар ярьвал зорчигчид бол үзэгчид. Бүгд л байраа эзэлж киног үзэцгээнэ. Манайхан киноны үеэр элдэв чимээ гаргадаггүй шигээ өнөөх ээдрээт киногоо үзсээр л. Харин гол дүрийн баатар автобуснаас буух эгшинд л кино төгслөө. Хамгийн сонин нь автобусны жолоочийн “картаа дараарай” гэсэн шаардлагад өнөөх эгч тэгтлээ ундуйцсан байж л дээ. Нэг талаараа хувь хүний соёл ямар хэмжээнд байгааг харуулах богино хэмжээний кино шиг санагдсан юм.

Хажууд суусан хүмүүс “Кино шиг амьдралтай нөхдүүд шүү” хэмээсээр буун одох. Зарим нь өөрт хамаагүй зүйлдээ хошуу дүрэхгүй хэмээн ажиллахгүй чихэвчээ хүртэл чихэндээ хийчихнэ.

Хүн бүрт л ичих, эмээх сэтгэлзүй байх ёстой гэдэг. Таньд хүн шаардлага тавьбал өөрийгөө өмөөрөн ам мурийхаасаа урьтаад би ямар буруу зүйл хийсэн бэ гэдгээ бодоод үзэх хэрэгтэй. Таны буруу үйлдэлд тавьсан үгсийг  доромжлол мэтээр бүү хар. Магадгүй та өөрөө шаардлагын хариуд бусдыг доромжилж, бүр гүтгэж ч мэднэ.   Энэ хоёрын үр дүнд ЗӨРЧИЛ бий болно. Харин зөрчил гээч нь хүн болгоны өөрийгөө гэсэн аминчхан үзлээс үүдэлтэй болов уу.

Тиймээс хотын соёлд гар бие оролцож буй иргэн та аминч үзлээ авч хаяж, бие биедээ эелдэгээр шаардлага тавьдаг байгаарай. Үүний хариуд шаардлагыг нь хүлээн авч, харилцан бие биенээ хүндэлдэг залуус ч олон байгаасай гэж хүсч байна. Хамгийн гол нь  “Шаардлага бол доромжлол биш” юм шүү.