Олон улсын санхүүгийн гэмт хэрэгтэй тэмцэх байгууллага ФАТФ өнгөрсөн 10 дугаар сард Монгол Улсын Засгийн газарт улс төр, ашиг сонирхлын гэх мэт аливаа зүй бус гадны нөлөөтэй тэмцэх ажлыг идэвхижүүлэх сануулгыг өгч Саарал жагсаалтад оруулсан хэмээн зарлаж байв. Олон улсын санхүүгийн хориг арга хэмжээ авах байгууллага (ФАТФ) манайд 6 ажлын даалгавар оноосон бөгөөд Засгийн газар нэгдүгээр сард БНХАУ-д хуралдсан ФАТФ-ын Олон улсын хамтын ажиллагааны хяналтын бүлгийн хурал болон өнгөрсөн тавдугаар сарын 11-нд хуралдсан цахим хурлын үеэр ФАТФ-аас өгсөн зургаан ажлын даалгавар болох тайлангаа танилцуулж, амжилттай хамгаалаад байна.
Монгол Улс ФАТФ-ын хяналтын жагсаалтад орсны дараа Тагнуулын ерөнхий газар Мөнгө угаах болон терроризмыг санхүүжүүлэхтэй тэмцэх тухай хууль тогтоомжийн хэрэгжилтийг хангах, мэдээлэл солилцох, эрсдэлийг бууруулах, урьдчилан сэргийлэх талаар зөвлөмж гарган ажиллах Сангийн яам, ХЗДХЯ, ГХЯ, Монголбанк, СЗХ, АТГ, ЦЕГ гэх мэт 15 байгууллагын төлөөлөл багтсан Хамтын ажиллагааны зөвлөлийг тэргүүлж ажиллажээ.
Энэ зөвлөлийн үйл ажиллагааг УИХ, Засгийн газар дэмжин ажиллаж, шаардлагатай хууль, дүрэм, журмыг хугацаанд батлан мөрдүүлж чаджээ. Тагнуулын ерөнхий газар, Терроризмтой тэмцэх зөвлөл хоёр ФАТФ-аас өгсөн 6 ажлын даалгаврын гурвыг дагнан хариуцсан бөгөөд хийх ёстой ажлуудаа хугацаанд нь амжуулж чадсан байна.
Санхүүгийн гэмт хэргийг шалгах шинэ зам, сувгийг нээжээ
ФАТФ Монгол Улсыг мөнгө угаасан байж болзошгүй гэмт хэргийн мөрдөн шалгах, яллах ажлыг тогтоосон эрсдэлтэй нийцүүлэн нэмэгдүүлэх шаардлагыг тавьсан байгаа. Энэ дагуу ТЕГ санхүүгийн мөрдөн шалгах ажиллагааг түргэн, шуурхай хэрэгжүүлэх ажлыг идэвхижүүлэх арга хэмжээ авчээ. Тухайлбал зарим улс орон, олон улсын байгууллагуудтай харилцаа тогтоож, мэдээ мэдээлэл, нотлох баримт бүрдүүлэх шинэ зам, сувгийг нээсэн байна. Ингэснээр мөнгө угаахтай холбоотой үйлдэл болон гэмт хэрэгт мөрдөн шалгах ажиллагаа нэмэгдэж, гэмт хэргийн эрсдлийн түвшинтэй уялдуулан мөрдөн шалгах, прокурорын яллах ажиллагаа сайжирч эхэлжээ.
Үй олноор хөнөөх зэвсэг дэлгэрүүлэх болон терроризмтой тэмцэх хуулийг батлууллаа
УИХ-ын хаврын чуулганаар “Үй олноор хөнөөх зэвсэг дэлгэрүүлэх болон терроризмтой тэмцэх хууль”-ийн шинэчилсэн найруулгыг УИХ-аар батлуулаад байна. Хуулийг дагалдан гарах дүрэм, журмыг Засгийн газрын тогтоолоор батлуулан хэрэгжүүлж эхлээд байна. Ингэснээр НҮБ-ын хориг арга хэмжээг хэрэгжүүлэх эрх зүй, зохион байгуулалтын тогтолцоог бий болж, байгууллагуудын хамтын ажиллагаа сайжирчээ.
“НҮБ-ын хориг арга хэмжээг хэрэгжүүлэх аргачлал”‑ыг баталлаа
Үй олноор хөнөөх зэвсэг дэлгэрүүлж, терроризмыг санхүүжүүлж байж болзошгүй орнуудад хориг арга хэмжээ авах талаар НҮБ гишүүн орнууддаа анхааруулаад байгаа. Үүнтэй уялдуулж Тагнуулын ерөнхий газрын дарга “НҮБ-ын хориг арга хэмжээг хэрэгжүүлэх аргачлал”‑ыг батлан гаргаж, энэ дагуу холбогдох байгууллагын мэрэгжилтнүүдэд сургалт мэдээлэл өгч, харилцагчийг таньж мэдэх, эрсдлийг үнэлж удирдах, асуудал үүссэн үед хууль хяналтын байгууллагууд хэрхэн хамтран ажиллах вэ гэдгийг тодотгосон аргачлалыг бий болгожээ.
ФАТФ 2020 оны тавдугаар сарын 28-нд Монгол Улс ажлын зургаан даалгавараа хангалттай биелүүлсэн гэсэн хариуг албан ёсоор өгөөд байна. Одоо тус байгууллагын төлөөлөгчид Монгол Улсад ирж хэрэгжилтийг газар дээр нь шалгах үлдээд байна. Үүний дараа Монгол Улс стратегийн дутагдалтай орнуудын жагсаалтаас гарах юм.
Сэтгэгдэл бичих