ЭМЯ-наас өдөр бүрийн 11:00 цагт өгдөг ээлжит мэдээллээ хийлээ. Мэдээллийн эхэнд ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Дэлхийн 2016 оронд коронавирусийн халдвар тархаж, 8.5 сая хүн өвчилж, 455 мянган хүн нас баржээ. Сүүлийн 24 цагийн хугацаанд 125 мянган хүн шинээр өвчилж, 4000 хүн нас барсан байна. ОХУ-д 24 цагийн дотор 7790 шинэ тохиолдол бүртгэгдэж, 182 хүн нас барсан. Манай олон аймагтай хил залгаа байгаа хотуудад шинэ тохиолдол нэмэгдсээр байна. Ялангуяа Тувад 121 хүн шинээр өвчилсөн.
Манай орны хувьд өчигдөр ажиглалт 297 хүн шинээр орж, 216 хүн гарч, одоо ажиглтад 17 хүн байна. Өчигдөр орой 266 хүн Солонгосоос тусгай үүргийн онгоцоор ирсэн. 1 хүнийг ХӨСҮТ-д, 12 хүнийг Цэргийн төв эмнэлэгт шилжүүлсэн. Бусад хүмүүсийг тусгаарлах байруудад тараан байрлуулсан. 24 цагийн хугацаанд 199 дугаарт 200 гаруй дуудлага ирсэн. Тэд коронавирусийн эмнэлзүйн онцлог, эмчилгээний талаар зөвлөгөө авсан" хэмээлээ.
ХӨСҮТ-ийн захирал Д.Нямхүү "2020 оны зургадугаар сарын 18-ны өдөр ХӨСҮТ-ийн хоёр, Дархан-Уул аймагт дахь салбар лабораторт нийт 339 хүнд шинжилгээ хийхэд 336-гаас нь коронавирус илрээгүй. Харин 3 хүний шинжилгээнд вирус илэрсэн. Алтанбулагийн боомтоор орж ирсэн ачаа тээврийн жолооч нараас илэрлээ. Орос, Беларусь, Монгол гурван жолоочоос илэрсэн. Өнөөдөр ХӨСҮТ-д хэвтүүлж, эмчилгээг эхэлсэн. БНСУ-аас ирсэн бүх хүнээс шинжилгээ авахад сөрөг гарсан. Ганцхан хүнийг сэжигтэйд тооцож, ХӨСҮТ-д авчирсан.
Өнөөдөр 5 хүн эдгэрсэн. 132 хүн эдгэрч гарлаа. Одоо 72 хүн эмнэлэгт хэвтэж байна. Үүний 67 нь хөнгөн, таван хүн хүндэвтэр байгаа. Эдгэрч гарсна 5 хүн оюутнууд.
Сэтгэгдэл бичих