Монгол Улс иргэдээ чадахаараа татаж байна, битгий улстөржүүлээд бай

"Гадаадад гацсан монголчууд хөдөлгөөн"-ийнхөн гэж өөрсдийгөө нэрлэсэн хэдэн нөхөр өчигдөр МАН-ын байр руу улаан будаг цацаж, баахан дөвчигнөв.  Гадаадад гацсан иргэдээ татаж авчрахыг эсэргүүцэж байгаа хүн Монголд бараг байхгүй.  Хүн бүр л иргэдээ татаж авчрах нь зөв, боломж байвал ирэхийг хүссэн бүх хүнээ л авчраасай гэж хүсэж байна.  Зөвхөн "Гадаадад ганцсан монголчууд хөдөлгөөн" гэж өөрийгөө нэрлэсэн хэдэн хүн үүнийг хүсээд, бусад нь хүсэхгүй, элэг нэгтнүүдээ хүний газар, гүний хошуунд зовж, зүдрээсэй гэж хараагаад байгаа юм огт байхгүй.  Тэд гадаадад гацсан монголчуудын уур бухимдал, зовлон зүдгүүрийг ойлгоод, эрх баригчдад шаардлага хүргүүлж байж болох. Зөв өө, харь оронд мөнгө төгрөггүй, өвчин зовлонтой байгаа хүмүүст үнэхээр хэцүү байгаа. Гэхдээ ингэж шаардлага тавьдаггүй юм аа.  

Байшингийн хаалганд улаан будаг нялаад, сонгуулийн сурталчилгаа хаагдахтай зэрэгцээд орилж, хашгирахаар гол зорилго чинь бүдгэрчихээд байна. Тавдугаар сарын 24-өөс эхлээд бүхий л шатны байгууллага, УОК, Шуурхай штаб, Засгийн газарт шаардлага хүргүүлсэн. Тэгээд хүлээж авахгүй болохоор нь улс төрийн акц хийж байна гэж  аль ч билээ намын Ерөнхий нарийн бичгийн дарга залуу хэлнэ билээ.  Уг нь Монгол Улс иргэдээ чадахынхаа хэмжээгээр л татаж авчраад байгаа.  Тэр ч битгий хэл гадаадад байгаа иргэдээ татаж авчирч байгаа орнууд дундаа Монгол хоёрдугаарт бичигдэж буйг албаныхан хэлж байна. Одоогоор манай улс агаараар 11060, Алтанбулагийн боомтоор 65 мянган иргэнээ татаж авсан гэсэн тоо баримт гарсан байсан. Энэ тэгээд татаж аваагүй гэж хэлэх үү. 

Мэдээж гадаадын улс орнуудад яаралтай ирэхийг хүссэн 10 гаруй мянган монголчууд байна гэсэн. Ер нь ирэхийг зорьж байгаа 20, 30 мянган хүн байна гэж "Гадаадад гацсан монголчууд хөдөлгөөн"-ийнхөн хэлж байна билээ. Тийм ч байх.  Тэднийг болж өгвөл бүгдийг нь авчрахыг л зорьж байгаа гэдэгт итгэлтэй байна. Зургадугаар сард 9 удаа тусгай үүргийн нислэг үйлдлээ. Бүр АНУ, Энэтхэг рүү шууд нислэг үйлдлээ.  Солонгосоос транзит нислэгээр иргэдээ татаж авчрав.  Долдугаар сард 8 удаа тусгай нислэг үйлдэхээр төлөвлөж байна.  Боломж бололцоондоо тулгуурлаж, тусгай нислэг үйлдэж байгаа байх.  

Гэтэл иргэдээ тоосонгүй, гадаадад байгаа иргэд вирус үү гэх гомдол байнга гарч байна. Буруутгах арга байхгүй ээ, үнэхээр зовсон, ядарсан иргэд гадаадад маш олон байгаа. Гэхдээ тэд улс орныхоо боломж бололцоог, тусгаарлах байрны хүрэлцээ, эмнэлгийн багтаамж гээд олон зүйл бий. Тэр болгоноо тооцож л байгаа нь ойлгомжтой. Японд байгаа нэг эмэгтэй нөхцөл байдал ямар байгаа талаар лайв хийсэн байна билээ.  "Гадаадад байгаа монголчууд вирус биш. Японд байгаа иргэд эрсдэлийн үнэлгээ хийсэн. 100 хүнээс 2-т нь л вирус байх магадлалтай. Байгаа гэсэн үг биш шүү, магадлалтай. Энэ бол вирус огт байхгүй гэсэн үг" гэх мэтээр ярьж байсан. Тийм ч байх, үгүй ч биз.  Хэн ч гэртээ, хайртай хүмүүстээ вирус тээж ирээд халдаачихъя гэж бодохгүй. Гэхдээ л эрсдэлийг тооцохгүй байж болохгүй. Гадаадаас ирсэн иргэдээс 19 хоногийн дараа гурав дахь давтан шинжилгээгээр вирус илэрч л байна. Бид чадлаараа сэргийлэхээс өөр сонголт байхгүй. 

Монголд коронавирус гарсан даруйд баячууд, эрх мэдэлтнүүд Монголоос дайжсан. Гэтэл Монгол ганцаараа дотооддоо вирус алдалгүй тэсээд үлдэхээр бүгд буцах дайрч, өвчтэй, зовлонтой, асуудалтай хүмүүсийн урдуур дайрч байна гэх хэл ам ч гарсан. Японд гольф тоглож, өдөр бүр түүх дээрээ зураг оруулдаг байсан баян бизнесмэн тусгай үүргийн онгоцоор Монголдоо ирчихсэн л байна гэж ярих ч хүн байна. Бүр тусгай үүргийн онгоцонд багтахын тулд өндөр хахууль өгөх шаардлага үүссэн  гэх асуудал гарч л байгаа.  Үнэхээр тийм асуудал байгаа бол холбогдох албаных нь хүмүүс анхаарал тавьж, шалгамаар байна. УОК, Шуурхай штабаас асуудлыг зохицуулахаар хичээж байна. Гэхдээ дунд шатандаа асуудлыг замхруулаад, өвчтэй, нэн шаардлагатай, бага насны хүүхэдтэй хүмүүсийг авчрахгүй, дундуур нь мөнгөтэй, эрх мэдэлтэй нөхдүүдийг чихээд байхыг үгүйсгэх аргагүй. 

Өнгөрсөн хугацаанд хэчнээн эрх мэдэлтэй, эд хөрөнгөтөн гадаадаас ирсэн билээ. Тэд үнэхээр нэн шаардлагатай иргэдийн жагсаалтад багтах ёстой байсан уу гэдгийг асуух л хэрэгтэй. Тусгай үүргийн онгоцны нислэг цаанаа хээл хахууль, болохгүй, бүтэхгүй бүхнийг тээж байгаа бол шаардлагатай арга хэмжээг авах нь зөв. Үүний төлөө тэмцвэл тэр жинхэнэ тэмцэл болно.  Ашгүй нэг юм сонгууль нь дууслаа.  Одоо тусгай нислэг, гадаадаас иргэдээ татаж авчрах асуудалдаа сайтар анхаарч, сайтар шалгамаар байна. Үнэхээр нэн шаардлагатай иргэдээ татаж авчирч чадаж байна уу гэдгийг шалгах л ёстой. Тэгээд тусгаарлах байрны хүрэлцээгээ нэмэгдүүлж, тусгай нислэгийнхээ тоог нэмэхэд ч анхаар. Хамгийн гол нь энэ бүхнийг битгий улстөржүүл.  Монгол Улс нөөц боломжийнхоо хэрээр л иргэдээ татаж байна.