Тойм: МАН үнэмлэхүй ялалт байгуулж, бие даагчид, МАХН сонгуулийн дүнг хүлээн зөвшөөрсөнгүй

Өнгөрч буй долоо хоногт улс оронд өрнөсөн чухал үйл явдлуудыг тоймлон хүргэж байна.  Үндсэндээ сонгууль өнгөрч байгаа долоо хоногийн хамгийн чухал сэдэв байлаа. Мөн сонгуулийн үр дүнг эсэргүүцэж байгаа бие даагчид, зарим нам эвслийнхний мэдэгдэл ч шуугиан тариад амжлаа. Түүнээс гадна, Монгол Улс анх удаа АНУ руу шууд нислэг үйлдэж, иргэдээ авчирсан нь яах аргагүй онцлох үйл явдал байв. 

Үйлчилгээний газрууд 00:00 цаг хүртэл ажиллах боломжтой боллоо 

Дэлхий дахинд ковид-19 цар тахлын улмаас хаа сайгүй хөл хорио тогтоогоод байгаа билээ. Манай улс ч гэсэн үйлчилгээний газруудад цаг зааж, кино театр, баар, пабыг хаачихаад байгаа. Тэгвэл энэ долоо хоногийн даваа гарагт нийслэлээс шийдвэр гаргаж, үйлчилгээний газруудыг 00:00 цаг хүртэл ажиллуулах шийдвэр гаргасан билээ. Ингэснээр өчигдрөөс кафе, зоогийн газар, согтууруулах ундаагаар үйлчлэх зарим газрууд 00:00 цаг хүртэл ажиллахаар боллоо. 

Монгол Улс анх удаа АНУ руу шууд нислэг хийлээ 

Монгол Улс  зургадугаар сард нийтдээ 10 удаагийн тусгай үүргийн нислэг үйлдэж, 2000 гаруй иргэдээ гадаадаас татаж авчирсан билээ. Тэр дундаа анх удаа АНУ руу тусгай нислэг үйлдэж, 254 иргэнээ эх оронд нь авчирлаа.  Монгол Улсын Засгийн газар, ард түмнээс АНУ-ын Засгийн газар, ард түмэнд нэг удаагийн хамгаалалтын 60 мянган ширхэг өмсгөлийг уг тусгай үүргийн онгоцоор тээвэрлэн зургаадугаар сарын 21-ний өдөр албан ёсоор хүлээлгэн өгсөн юм. Буцахдаа иргэдээ авчирснаас гадна,   үлэг гүрвэлийн олдворууд тээвэрлэн ирсэн билээ.  

МАН 62 суудал авч, үнэмлэхүй ялалт байгууллаа

Монгол Улсын Их хурлын 8 дахь удаагийн сонгууль өнгөрсөн лхагва гарагт боллоо. Энэ удаагийн сонгуульд 14 нам, 3 эвсэл, 121 бие даагч өрсөлдсөн.  Тэгвэл сонгогчдын нэрийн жагсаалтад 2003969 хүн бүртгүүлснээс 1475675 саналаа өгч, ирц 73.65 хувьтай байлаа.  Сонгогчид МАН-д 62 суудал өгсөн бол АН 11-ийг авсан. Харин "Та бидний эвсэл", "Зөв хүн электорат" эвсэл тус бүр 1, бие даагч 1 суудал авсан юм.  

Коронавирусээр өвчилсөн нийт тохиолдол 219, эдгэсэн 170 

Коронавирусээр өвчилж буй хүний тоо болоод эдгэрсэн өвчтөний тоо өдөр өдрөөр нэмэгдсээр байна. Өчигдөр ХӨСҮТ-ийн захирал Д.Нямхүү "Зургаадугаар сарын 25-нд гурван лабораторид нийт 171 хүнд шилжилгээ хийхэд 168 хүнд коронавирус илрээгүй. Харин гурван хүний шинжилгээнд коронавирус илэрсэн байна. Зургаадугаар сарын 25-нд Москва-Улаанбаатарын онгоцоор ирсэн 21-23 насны, хоёр эрэгтэй, нэг эмэгтэй оюутнуудад вирус илэрлээ. Ингээд нийт батлагдсан тохиолдол 219 болсон бол үүнээс 170 хүн эдгэрч ХӨСҮТ-өөс гарсан. ХӨСҮТ-д 49 хүн эмчилгээнд байгаа. Биеийн байдлыг үнэлбэл, 42 хүн хөнгөн, 7 хүн хүндэвтэр байгаа. Чихрийн шижинтэй нэг, жирэмсэн нэг эмэгтэй байгаа" хэмээсэн юм. 

Бие даагчид болон "Та бидний эвсэл", "Шинэ эвсэл"-ээс сонгуулийн дүнг хүлээн зөвшөөрөхгүй гэдгээ мэдэгдлээ 

Сонгуулийн санал хураалт дуусаж, аль нам хэдэн суудал авсан нь тодорхой болсон. Тэгвэл өчигдөр бие даагчид болоод зарим эвслийнхэн сонгуулийн дүнг хүлээн зөвшөөрөхгүй байгаагаа мэдэгдлээ.  Тухайлбал, Дархан-Уул аймаг бие даан нэр дэвшсэн Т.Ганболд "миний 7,311 гэсэн эхний мэдээллийн тоо бол excel программын хакер ажиллагаагаар саналын тоог хоёрт хувааж тавьсан үзүүлэлт байна. Энэ хооронд ойролцоогоор 15 минут шаардагдаж байгаа юм. Ийнхүү төгсгөлийн дүн дээр таслал нь алга болж, үлдсэн санал нэмэгдэж явсаар 15242 саналаар миний нэр дөрөвдүгээрт бичигдсэн. Уг нь миний нийт санал бол эцсийн дүнгээр 24 мянга буюу нэгдүгээрт бичигдэх хэмжээний болж байгаа юм. Миний алдагдсан 7311 санал бол хамгийн их саналтай хүмүүс рүү шингэж яваа. Учир нь эцсийн дүнгээрээ саналын тоо мөргөх ёстой. Энэ хугацаанд хөндлөнгөөс орж ирж байгаа хүмүүс үүнийг зохион байгуулж боловсруулж хийж байгаа. Магадгүй миний алдагдсан саналыг өөр бие даагч, нам эвсэлд шингээж болно. Гэхдээ хэн эрх барьж байгаа билээ, хэн СЕХ-ны сервер лүү хандах эрхтэй билээ. Тэгэхээр энэ сонгуулийн дүнг авсан хүмүүст хардах үндэслэл гарч байгаа юм" хэмээлээ. 

Тэгвэл "Та бидний эвсэл"-ийн дарга Н.Энхбаяр “Энэ удаагийн сонгууль цэвэр луйврын шинжтэй боллоо гэж дүгнэж байна. МАН-д ашигтай, МАН-ын дээд түвшнийхээс эхлүүлээд хамгийн доод албан тушаалтны оролцоо, уялдаатай үйл ажиллагааны дагуу болсон луйвар боллоо. Тийм учраас энэ сонгуулийг хүчингүйд тооцох хэрэгтэй.  Сонгууль шударга болж байж нийгэм тогтворжино. Жишээлбэл, хар машин дээр яалтчгүй луйвар орлоо. Тойрог бүр дээрх хар машины тооллого бол МАН ялах нөхцлийг бүрдүүллээ гэж харж байна. Урьдчилсан байдлаар саналыг уншуулчихаад оруулж байна. Өөрөөр хэлбэл, санал тоолохоос өмнө тойрог болгон дээр хар машиныг хиймэл байдлаар байхгүй хүмүүсийн нэрийг ашиглаж санал оруулсан.  У.Хүрэлсүхэд хандаж хэлэхэд, айгаагүй юм бол дахин сонгууль явуулчих. мөн АН-ын С.Эрдэнэ, ШИНЭ эвслийн Ж.Батзандан нарт хандаж хэлэхэд энэ луйварт оролцоогүй л юм бол хоёулаа хамт тэмцье. Өөрийг чинь сонгуулийн үед шүүмжилж байсан хэдий ч шударга үнэний төлөө тэмцэж чаддаг уу гэдгийг чинь харъя" хэмээв.