Т.Төмөрбаатар: Бүтээн байгуулалтын ажилд оролцох Хятад улсын иргэдийг хүлээж авах бэлтгэлийг хийж байна

Халдварын голомтод ажиллаж буй 400 алба хаагчид түрээслээд өмчлөх орон сууцны батламжийг гардуулж байгаа билээ. Өчигдөр Мэргэжлийн Хяналтын байгууллагын хилийн онцгой бүсэд ажиллаж буй 100 алба хаагчдад орон сууцны батламжийг нь гардуулан өглөө. Энэ үеэр хилийн боомтуудад мэргэжлийн хяналтын байгууллагаас ямар хяналт шалгалтыг зохион байгуулж байгаа талаар МХЕГ-ын Эрүүл ахуй халдвар хамгааллын хяналтын улсын ахлах байцаагч Т.Төмөрбаатараас  тодрууллаа.

-Хилийн боомтын хэсгүүдээр коронавирусийн цар тахалтай холбоотойгоор ямар хяналт, шалгалтын ажлыг хийж ажиллаж байна вэ?

-Хилийн боомтуудад коронавирусийн халдвараас урьдчилан сэргийлэх чиглэлээр өндөржүүлсэн бэлэн байдлын үйл ажиллагаа үргэлжилж байна. Нэгдүгээр сарын 6-ны өдрөөс эхлэн өнөөдрийг хүртэлх хугацаанд хилийн хяналтын ажлуудыг хийж байгаа. Зорчигчийн эрүүл мэндэд тавих хяналт, тусгай үүргийн онгоцнууд,  нүүрсний экспорт, ашигт малтмалын бусад бүтээгдэхүүнүүдийг тээвэрлэж буй ачаа тээврийн жолооч нарт хяналт шалгалтыг тогтмол хийж байна. Монгол Улсын хил хаасантай холбоотойгоор зорчигч гэсэн ойлголт байхгүй. Тусгай үүргийн онгоцыг 28 дахь удаагаа хүлээн авч, хяналт шалгалтыг хийсэн.

-Хилээр орж ирж байгаа зорчигч, ачаа тээшид ариутгал халдваргүйжүүлэлтийг хэр хийж ажиллаж байна вэ?

-Хилээр нэвтэрч буй бүх төрлийн тээврийн хэрэгсэл, ачаа тээш, карго ачаа, шуудангийн илгээмж зэрэгт ариутгал халдваргүйжүүлэлтийг тогтмол хийж байгаа. Өөрөөр хэлбэл, хилээр орж ирж байгаа зорчигч болон түүний ачаа тээш нь халдваргүйжүүлэлтэд орж байгаа гэсэн үг.

-Одоогоор хэчнээн хилийн боомт хөдөлгөөнтэй байгаа вэ, түүнд мэргэжлийн хяналтын байгууллагаас ямар бүрэлдэхүүнтэйгээр хяналт тавьж ажиллаж байна?

-Байнгын ажиллагаатай 26 боомт байдгаас өнөөдрийн байдлаар 15 боомт хөдөлгөөнтэй байна. Тухайн хөдөлгөөнтэй байгаа боомтуудад Мэргэжлийн Хяналтын Ерөнхий Газрын харьяа 485 улсын байцаагч албан үүргээ гүйцэтгэж байна. Эдгээр алба хаагчид нь эрүүл ахуй, халдвар хамгааллын байцаагч нар юм. Ариутгал халдваргүйжүүлэлтэд 41 алба хаагч ажиллаж байна.

-Халдвар бүртгэгдсэнээс хойш хэд хэдэн ачаа тээврийн жолооч нараас вирус илэрсэн. Хөдөлгөөнтэй байгаа боомтуудаар ачаа тээврийн үйл ажиллагаа үргэлжилсэн хэвээр байгаа юу?

-Монгол Улсын хилээр импортын болон экспортын ачаа тээврийн эргэлт хэвээр явж байна. Өөрөөр хэлбэл, хүнс болон хүнсний бус өргөн хэрэглээний барааны хяналт хийгдэж байгаа. ОХУ-аас голчлон Европын улс орнуудаас хүнсний болон хүнсний бус бараа бүтээгдэхүүн дамжин орж ирж байна. Замын-Үүд, Сүхбаатар боомтоор галт тэргээр болон авто замаар өргөн хэрэглээний хүнсний бараа бүтээгдэхүүний импорт хийгдэж байна.

Мэргэжлийн хяналтын байгууллагын онцгой дэглэмийн үеийн гол зорилго нь халдварын сэжигтэй зорчигчийг илрүүлэх, түүнд эрүүл мэндийн хариу арга хэмжээг авах, халдварын шинж тэмдэг илэрсэн тохиолдолд эмнэлгийн байгууллагад шилжүүлэх юм. Энэ үндсэн үүргийнхээ хүрээнд мэргэжлийн байгууллагатай хамтран ажиллаж байна. Түүнчлэн тээр ачааны хяналт дээр цагдаа болон тагнуулын байгууллагуудтай хамтран ажиллаж байгаа юм.

-Хил дээр ажиллаж байгаа алба хаагчдын ажлын ачаалал хэр байна вэ?

-Зарим боомтууд 24 цагаар ажилладаг. Ингэхдээ ээлжийн системээр ажилладаг. Хилээр орж ирж байгаа ачаа тээш, тээврийн хэрэгслийн хяналт болон татан авч буй зорчигчдийн эрүүл мэндийн хяналтыг хийж ажиллаж байна. Өнөөдөр л гэхэд Замын-Үүдийн боомтоор ажиллах хүчний хүмүүс ирж байна. Онцгой комиссын шийдвэрээр зарим бүтээн байгуулалтын ажилд оролцох Хятад улсын иргэд ирнэ. Тэднийг хүлээж авах бэлтгэл ажлыг ханган ажиллаж байна. Энэ долдугаар сард тусгай үүргийн хэд хэдэн нислэг үйлдэх учраас тэдгээрт халдвараас хамгаалах бэлтгэл ажлыг хийж байна.

-Хилийн онцгой бүсэд ажиллаж байгаа алба хаагчид өөрсдөө халдвар хамгааллын дэглэмээ хэрхэн сахиж ажиллаж байна вэ?

-Алба хаагчид халдвар хамгааллын дэглэмийг маш сайн сахин ажиллаж байгаа. ДЭМБ болон манай орны эрүүл мэндийн байгууллагаас голомттой бүсэд ажиллаж буй алба хаагчдын аюулгүй байдал их чухал байгааг хэлсээр байгаа. Онцгой нөхцөлд ажиллаж буй алба хаагчид халдвараас хамгаалах дэглэмийг сахих, мөн хувийн хамгаалах хэрэгслийг зөв өмсөж, зөв тайлах асуудал яригдана. Энэ чиглэлээр мэргэжлийн холбогдох байгууллагууд болон манайхаас дадлага сургуулилтыг зохион байгуулж, мэргэжлийн зөвлөгөө өгч ажилладаг.

Мөн түүнчлэн тухайн өдрийн үйл ажиллагаанд оролцсон улсын байцаагчид бие биенийхээ халууныг хэмжих, бүртгэл хөтлөх зэрэг дотоод хяналт тавих журам байдаг. Иймээс эмнэлгийн хяналт тавьж, тэдгээрийг шинжилгээнд хамруулах, мөн хөдөлмөрийн аюулгүй байдлыг хангах хүрээнд ажил амралтыг нь зохицуулах, дараагийн ээлжийн хүмүүсийг бэлтгэх, нөөцийг бүрдүүлэх зэрэг шат шатлалтай арга хэмжээг авч байгаа.