"Лестер", "Челси" хожигдож, "Арсенал" хожлоо

Английн премьер лигийн 32 дугаар тойргийн ихэнх тоглолтууд өнгөрсөн шөнө боллоо. Энэ тойрогт хүснэгтийн гуравдугаар байрт бичигдэж байгаа "Лестер" клуб "Эвертон"-ы талбайд зочилж, 2:1-ээр хожигдлоо.  Ингэснээр 55 оноотой хэвээр үлдлээ.  Харин "Эвертон" хожиж, 44 оноотой болсноор 11 дүгээр байр руу орж ирэв. 

Тоглолтын 10 дахь минутад Ришарлисон гоолдож, тооны харьцааг нээсэн. Араас нь 16 дахь минутад Сигурдссон торгуулийн цохилтоос нэгийг нэмжээ. "Лестер"-ээс дөнгөж 51 дэх минутад Ихеаначо тооны харьцааг ойртуулсан ч үлдсэн хугацаанд тэнцүүлж дөнгөсөнгүй. 

Тэгвэл дөрөвдүгээр байрт бичигдэж байгаа "Челси" клуб энэ тойрогт "Вест Хэм"-ийн талбайд очиж, 3:2-оор хожигдлоо. Уг нь "Лестер" бүдэрснийг ашиглаж оноо авсан бол гуравдугаар байр руу ахих боломж байсан юм. Гэвч ашиглаж чадсангүй.  Тэгвэл "Вест Хэм" 3 оноо авснаар 16 дугаар байр руу орж ирж, унах бүсээс түрч болов холдож байна. 

Эзэн багаас  Соучек 45, Антонио 51, Ярмоленко 89 дэх минутад нэг нэгийг оруулсан. "Челси"-гээс Виллиан 42, 72 дахь минутад дубль хийжээ. 

Лондон өөр нэг баг болох "Арсенал" энэ тойрогт талбайдаа "Норвич"-ыг хүлээж авч, 4:0-ээр буулгаж авлаа. Ингэснээр 46 оноотой 7 дугаар байрт бичигдэж байна. Одоо "Тоттенхэм" болон "Шеффилд"-ын тоглолтоос хамаарч нэг байр доошоо буурах магадлалтай.  Тэгвэл "Норвич" 21 оноотой хэвээр үлдэж, 20 дугаар байртаа улам шигдэж байна.  Үлдсэн 6 тойрогт бүгдэд нь хожоод ч тэд доод лиг рүү унах аюулаас аврагдахаасаа өнгөрлөө. 

Энэ тоглолтод Обамеянг 33, 67 дахь минутад дубль хийж, премьер лигт энэ улиралд 19 дэх гоолоо орууллаа. Тэрбээр Вардигийн хамтаар мэргэн буучийн жагсаалтыг тэргүүлж байгаа. Тэгвэл Жака 37, Соареш 81 дэх минутад нэг нэгийг нэмжээ.