Онцгой байдал, цагдаагийн 600 гаруй албан хаагч завьт болон явган эргүүл хийж байна

Нийслэлийн Онцгой байдлын газар, Нийслэлийн Байгаль орчны газар, Нийслэлийн Эрүүл мэндийн газраас хамтран цаг үеийн асуудлаар мэдээлэл хийлээ. Мэдээллийн эхэнд Нийслэлийн Онцгой байдлын газрын Гамшгаас урьдчилан сэргийлэх хэлтсийн дарга, хурандаа Г.Нэргүй "Ойрын өдрүүдэд нийт нутгаар хур бороотой байх мэдээллийг цаг уур, орчны газраас өгч байгаа. Тиймдээ ч Туул, Тэрэлжийн усны түвшин нэлээд нэмэгдэх шинжтэй байна. Энэ хүрээнд бид урьдчилан сэргийлэх ажлыг мэргэжлийн байгууллагатай хамтарч хийж байгаа. Нийслэлийн Засаг даргын захирамжийг биелүүлэх үүднээс Тэрэлж, Хэрлэн, Туул голын дагуу эргүүл хийж байна. Тодруулал, Баянзүрх дүүргийн 22 дугаар хороо, "Хар усан тохой"-гоос Баянзүрхийн болон Төмөр замын гүүр болоод Нисэхийн эцсийн хадан хясаа хүртэлх маршрутаар НОБГ-ын томилгоот болон бэлтгэл ээлжийн албан хаагч өдөр бүр эргүүл хийж байна. 

НОБГ-ын 515, Нийслэлийн цагдаагаас 61, Нийслэлийн гэр бүл, хүүхэд залуучуудын газрын 60 албан хаагч 94 техник хэрэгсэлтэйгээр хөдөлгөөнт завьт болон явган эргүүл хийж, Туул голын эрэг дагуу амарч, зугаалж буй иргэдэд усанд живж осолдохоос урьчилан сэргийлэх зөвлөмжийг өгч байгаа. Бид зургадугаар сарын 10-аас эхэлж эргүүлд гарч эхэлсэн. 19124 иргэнд сэрэмжлүүлэг хүргэсэн. Хэдийгээр эргүүл хийж байгаа ч гэсэн иргэд усанд осолдож, амь насаа алдах тохиолдол гарч байна. Тиймээс бага насны хүүхдүүдийг гол усны эрэг дагуу явуулахгүй, тоглуулахгүй байх шаардлага байна" хэмээлээ.